Марк 10 - Гирами Китаб

Нюкягь чӀюбгъбакан

¹ Му йишвʼан Иса Ягьудия юрдназ ва Ярдан нирин тмуну жилариина гъягъюру. Дугъахьна хъана халкьар гъюйи, Дугъу, гьарганси, дурариз аьгъювалар улупуйи.

² Иса ахтармиш апӀуз ккунди, фарисйир гъюру ва Дугъаз суал тувру: – Къанундиинди жилириз хпир адауз ихтияр айин?

³ – Хъа Мусайи фици табшурмиш гъапӀунчвуз? – кӀуру Исайи.

⁴ – Мусайи, жара хьпан кагъазра дибикӀну, хпир адауз ихтияр тувну, – жаваб тувру дурари.

⁵ – Мусайи, ичв гъициркъу юкӀвариз дилигну, гьаци гъапунчвуз, – кӀуру Исайи.

⁶ Хъа дюнʼя ккебгъхъанмина Аллагьди жилирна хпир халкь дапӀна.

⁷ Гьаддиз жилир, чан адашна дада гъитну, чан хпирик карсди,

⁸ ва дурар кьюрид саб беден хьиди. Гьаци вуйиган, дурар сарун кьюб ваъ, хъа саб беден ву.

⁹ Гьамци Аллагьди китӀдар инсанди жара дапӀну ккундар

¹⁰ Хъасинси дурар хулаз гъафиган, ученикари Исайихьан хъана нюкгьикан гьерхру.

¹¹ Дугъу жаваб туву: – Шли, чан хпир гьадаъну, жарар гъахиш, дугъу кьяппавал апӀура.

¹² Хъа эгер дишагьли, чан жилирихьан гьудучӀвну, жарариз гъушиш, гьадму дишагьлийира кьяппавал апӀура.

Исайи бицӀидариз ужʼвал ккун апӀуб

¹³ Исайихьна, Дугъу кӀуллан карк алдатбан бадали, бицӀидар хуру, хъа ученикари хуз гъитри гъахьундар.

¹⁴ Гьамци гъябкъю Исайик хъял кубчӀвру ва Дугъу дурариз кӀуру: – БицӀидар узухьна гъюз гъитай, гъадагъа мапӀанай. Аллагьдин Паччагьлугъ гьацдаринуб ву.

¹⁵ Гьякь кӀуразачвуз: шли Аллагьдин Паччагьлугъ бицӀириси кьабул дарапӀиш, думу душваъ учӀвидар.

¹⁶ Хъа Исайи бицӀидар хабаъ тӀаъну, дурариин хилар иливури, ужʼвал ибшричвуз, кӀуру.

Девлетлуйин суал

¹⁷ Иса рякъюъ учӀврайиган, сар касди, Дугъахьна жаргъури дуфну, икрам апӀури, кьамкьариина дусну, гьерхру: – Я гъяни Мялим, узу женнетдиъ ахъбан бадали гьапӀну ккунду?

¹⁸ – Гьаз Узуз гъянир кӀурава? – кӀуру Исайи. – Сар Аллагьдилан гъайри саркьан гъянир дар.

¹⁹ Увуз Дугъан табшуругъар аьгъявуз: адми миликӀан, кьяппавал мапӀан, мигьитӀибкӀан, кучӀлин шагьидвал мапӀан, алдатмиш мапӀан, адашдизна дадайиз гьюрмат апӀин.

²⁰ – Мялим, узу дурар вари бицӀидихъанмина тамам апӀураза, – жаваб гъабхьи Исайиз.

²¹ Иса дугъахьинди лигуру ва дишла Дугъаз думу ккун шулу. Исайи кӀуру: – Сабсана увуз гьубкӀрадар: гъарах, увуз айиб вари масу тув ва пул касибариз пай апӀин, гьадмуган аьршариъ яв девлет хьибдивуз. Хъасин Узухъди гъач.

²² Хъа думу му гафарикан пашман шулу ва гьудучӀвну гъягъюру, гьаз гъапиш думу гизаф девлетлу вуйи.

²³ Исайи, ул илбицну, ученикариз кӀуру: – Девлетлуйириз фукьан читин дарин Аллагьдин Паччагьлугъдиъ учӀвуз!

²⁴ Дугъан гафариин ученикар аьжайиб духьнайи, хъа Исайи дурариз хъана гъапи: – Йиз веледар, фукьан читин дарин Аллагьдин Паччагьлугъдиъ учӀвуз!

²⁵ Девлетлуйиз Аьршарин Паччагьлугъдиъ учӀвубтӀан девейиз рубдин гъюнʼан удубчӀвуз рягьят ву.

²⁶ Дурар хъана артухъ аьжайиб гъаши ва сари-сариз гъапи: – Дици вуйиган, шилхьан учв уьрхюз хьиди?

²⁷ Дурарихьинди дилигну, Исайи кӀуру: – Инсанарихьан му удукьруб дар, хъа Аллагьдихьан удудукьруб адар.

²⁸ Гьадмуган Петри пуз хъюгъру: – Хъа магьа, учу, вари гъибтну, Увухъди хъача.

²⁹ – Гьякь кӀуразачвуз, – кӀуру Исайи, – Шли Узу ва Ужувлан хабар бадали чан хал, чвйир, чйир, дада, веледар, хутӀлар гъитнуш, дугъаз му дюнʼяйиин

³⁰ варж ражари артухъ хулар, чвйир, чйир, дадйир, веледар, хутӀлар, хъа гьацира жвувахъ хъчӀирккувалар хьиди, хъа гъюз ккимбу уьмриъ – гьаргандин уьмур.

³¹ Аммаки, гьаму ражари гизаф сарпидар думуган аьхиримжидар хьиди, хъа аьхиримжидар – сарпидар.

Исайи хъана чан аьжаликан пуб

³² Гьамус дурари Ерусалимдиз рякъ дибиснайи. Улихьди Иса гъягъюрайи. Исайихъди гъягъюрайи ученикарик гъалабулугъ кабхънийи, хъа дурарихъди хъайи имбудар гучӀбу ккагънайи. Исайи, ЙицӀикьюридра гъирагъдиз гьадаъну, Чаз фу шулуш, пуз хъюгъю:

³³ – Магьа ухьу Ерусалимдиз гъягъюрахьа. Инсаниятдин Бай аьхю маллйиринна къанунчйирин хилиз тувди. Думу, карсну йикӀуз жаза адабтӀну, жугьуд дарударин хилиз тувди.

³⁴ Хъа дурар Дугъак кялхъди, рихшанд апӀиди, тутйир катӀди, гъирмажарихьди урччвиди ва йикӀиди. Аммаки шубуд йигълан Думу чӀиви хьиди.

Югьандинна Якьубдин тӀалаб

³⁵ Зеведейин баяр Якьубна Югьан Исайиз багахь улучӀвуру ва кӀуру: – Мялим! Учу кӀурайи тӀалаб тамам апӀина.

³⁶ – Узу учвуз гьапӀну ккундучвуз? – гьерхру Дугъу.

³⁷ Дурари жаваб тувру: – Яв аднаъ Уву учӀвган, учу Яв гъвалахъ деърубси апӀин – сар арччул, тмунур гагул терефнаъ.

³⁸ – Учву фу тӀалаб апӀураш, учвуз аьгъдарчвуз, – кӀуру Исайи. – Узʼина гъюз ккайи аьзабар учвхьан аьх апӀуз хьибдин? Ясана, Узу марцц шлуганси, учвхьан шулин?

³⁹ Дурари: «Ав, шулчухьан», – гъапнийи. Хъа Исайи дурариз гъапи: – Дугъриданна, Узу кьабул апӀуз ккайи аьзабар учвура аьх апӀарчва,

⁴⁰ хъа Йиз арччулну ва гагулну терефарихъинди дитувал Узлан асиллу дар: думу йишвар, Йиз Адашди шлиз улупнаш, гьадрариндар ву.

⁴¹ Якьубдинна Югьандин гафар гъеерхьиган, имбу йицӀбидарик хъял кубчӀвру.

⁴² Хъа Исайи дурариз Чахьна дих дапӀну кӀуру: – Халкьарин гьякимарди гьисаб апӀурайидари халкьарин зиин агъавал апӀурайивал ва аьхюдари дурарин зиин чпин гьюкум улупурайивал учвуз аьгъячвуз.

⁴³ Хъа ичв арайиъ дици дарибшри: шлиз ичв арайиъ кӀулинур хьуз ккундуш, гъит думу ичв гъайгъушнаъ ишри,

⁴⁴ ва шлиз ичв арайиъ сарпир хьуз ккундуш, дицирикан варидарин лукӀ ишри.

⁴⁵ Инсаниятдин Байра Чаз жарадари гъуллугъ апӀбан бадали ваъ, хъа Чав гъуллугъ апӀбан бадали ва, гизафдарин гунгьарилан хил алдабгъуз кӀури, Чан уьмур тувбан бадали Дуфнайир ву.

Исайи кур сагъ апӀура

⁴⁶ Хъасин дурар Ерихон шагьриз гъюру. Иса Чан ученикар ва гизаф халкь хъади Ерихондиан удучӀвурайиган, рякъюхъ, тувру садакьайиз ккилигури, кур вуйи касиб, Тимейин бай Вартимей деънайи.

⁴⁷ Дугъу, душвхьантина Назарет шагьриан вуйи Иса гъягъюра кӀури деебхьну, чӀигъ апӀуру: – Давудгъярин Бай Иса, йиз язухъ апӀина!

⁴⁸ Гизафдари дугъаз ккебехъ кӀуйи, хъа кур вуйири айибтӀан артухъ чӀигъар апӀуз хъюгъю: – Давудгъярин Бай, йиз язухъ апӀина!

⁴⁹ Иса хъугъужвуру ва Дугъу кӀуру: – Мина гъач йипай дугъаз. Куриз дих апӀуру: – Чкиди гъудужв, Исайи увуз Чахьна гъач кӀура!

⁵⁰ Вартимей, чуха хъидипну, гъедергуру ва Исайихьна жаргъуру.

⁵¹ – Узкан фу ккундувуз? – гьерхру Исайи. – Мялим, узуз рябкъюз ккундузуз! – жаваб тувру кури.

⁵² – Гъарах, яв хъугъвали уву гъюрхюнву, – кӀуру Исайи. Дугъаз дишла рябкъюри шулу, ва думу Исайихъди гъягъюру.