Эфес 5 - Гирами Китаб

Аквнахь яшамиш шулайиси гъузай

¹ Аллагьдин ккуни веледарси, Гьадгъаз ухшар йихьай.

² Кабалгру ицци ниар адаури, Аллагьдиз Месигь Учв фици гъурбан гъахьнуш ва фици ухьу ккун гъапӀнуш, гьаци масанди яшамиш йихьай.

³ Ичв арайиъ кьяппаваликан, вая жара чиркинваликан, ясана тямягькарваликан гафаркьан даришри – мурар Аллагьдин гирами халкьдиз хас дар.

⁴ Ичв ушвниъ гьич фицикӀа лайикь даруб, ичӀи улхуб вая кацӀу зарафтар духьну ккундар, Аллагьдиз чухсагъул кӀури гъабшиш, ужу шул!

⁵ Кьяппавалиъ ахъру гьич сар кас, я чиркин кас, я тямягькар (мицир идолариз икрам апӀрурик гьисаб ву) Аллагьдинна Месигьдин Паччагьлугъдиъ ирснан эйси хьидар.

⁶ Гъит, зиихъ дупнайибдиз къаршу удучӀвну, гьич сарира учву алдатмиш дарапӀри, гьаз гъапиш мютӀюгъ дарудари чпиина Аллагьдин хъял алапӀура.

⁷ Мицдар адмийирихъди ичв фукӀа уртахъуб дарибшри.

Аквнан баяр

⁸ Саб ухди учву мучӀушин вуйчва, хъа гьамус, учву Агъайиъ саб вуйиган, акв вучва. Аквнан баярси яшамиш йихьай.

⁹ Хъа аквнан бегьер – гъянивал, дугъривал ва гьякьвал ву.

¹⁰ Агъайиз фу кьабулди шулуш, аьгъю апӀури йихьай.

¹¹ МучӀушнан бегьерсуз ляхнариъ иштирак махьанай, хъа дурар дюз дарувал улупай.

¹² Дурари жиниди апӀурайидарикан пуз гьеле начра шулу.

¹³ Хъа вари жиниб аквнахь ачухъ хьибди.

¹⁴ Вари рябкъюри апӀруб акв ву, гьаддиз гьамци кӀурира а: «Даахнайир, хъирг! ДукӀнайир, гъудужв! Месигьди уву аквнакк ккаъди».

¹⁵ Лигайгьа, ахмакьарси яшамиш махьанай, хъа фагьумлуйирси.

¹⁶ Жвуван вахт ужуйи гьапӀуз ял апӀинай, гьаз гъапиш му йигъариъ гизаф писвал а.

¹⁷ ПчӀу юкӀв ади махьанай, хъа Агъа Аллагьдин ният фу вуш, гъавриъ ахъуз чалишмиш йихьай.

¹⁸ Ички гизаф мубхъанай, диди ягь-намус дубгуз гъитру, хъа Рюгьнахьди ацӀай.

¹⁹ Чиб-чпихъди Мяълийирин китабдиан тярифнан ва рюгьнан мяълийириинди сюгьбатар апӀинай. Ичв юкӀвариъ Агъайиз мяълийир апӀури, Дугъан ад апӀинай.

²⁰ Ихь Агъа Иса Месигьдин ччвур дибисну, Адаш Аллагьдиз гьаммишан ва варибдихъан чухсагъул йипай.

Жилиринна хпирин аьлакьйир

²¹ Месигьдиз айи лап дерин гьюрматнаан чиб-чпиз мютӀюгъ йихьай.

²² Учву, хпар, Агъайизси, ичв жиларизра мютӀюгъ йихьай.

²³ Гьаз гъапиш Месигь фици Чан бедендин – вари хъугърударин – КӀул ва дурар Уьрхрур вуш, жилирра чан хпирин кӀул ву.

²⁴ Месигьдиз хъугърудар фици мютӀюгъ вуш, ари хпарра чпин жилариз гьаци мютӀюгъ духьну ккунду.

^25-27 Хъа учву, жилар, Месигьди Чахъ хъугърудар фици ккун гъапӀнуш, ичв хпарра гьаци ккун апӀинай. Дугъу, гафналантина штуъ марцц дапӀну, гирами апӀбан бадали, я миж, я камивал, ясана жара фукӀа гьациб ктарди, швушвси, чпин вари аднаъди Чан улихь дерккну Чаз бахш апӀбан бадали, тахсир ктру хъугърударин гирами Жямяаьт хьпан бадали, хъугърударихъанди Чан жан тувну.

²⁸ Гьаци жиларра, чпин жанар фици ккундуш, чпин хпарра гьаци ккун апӀуз буржлу ву. Шлиз чан хпир ккундуш, дугъаз учв ккунду.

²⁹ Хъа мегьел чан жан даккнир гъахьундар, адми дидин гъайгъушнаъ шулу, думу тухъ апӀури шулу. Гьаци Месигьра хъугърударин гъайгъушнаъ а,

³⁰ гьаз гъапиш ухьу Дугъан бедендин паяр вухьа.

³¹ «Гьаддиз адми, чан адашна дада гъитну, чан хпирик карсди, ва кьюрикан саб жан хьибди».

³² Мушваъ зурба вуйи сир а, узу кӀурайиси, думу сир Месигьдинна вари хъугърударин аьлакьйирикан ву.

³³ Хъа учвуз кайиб, гъит гьар жилири, чаз учв ккуниси, чан хпир ккун апӀри ва хпирира чан жилирин гьюрмат уьбхри.