Yowel 4 - NQAARIIT NE ROOG

Hate fee no qeet ke

¹ O Yaal oxe kaa tee: «No camaane kaaga, yaa um supitkaa o roxanqol ole Yudaa fo ole Yeerusaleem,

² xam fokatiid qeet ke fop kam a yulanq ale na hate fee. Maaga xam layoor fa den yaam fop ke da mbi’na a Isra’el fee xeet es. Kaa pasar a den a ndeer qeet lakas ke, a lasir saax es.

³ A nqaajra xeet es na pexey mbanjang ne, a ndabdit o goor ole a caga le, fo ndik fo ndew ne, da njikooxit a den biiñ faa da yerna.

⁴ Nuun koy, teeru fee Tiir fa Sidoŋ fo nuun xa piisel axe no Fiifilista we fop, xar nu mbugaxam? Ndax kaa nu mbug o ndabdinoox took es? A soƥangaa yee keene nu mbosooxu, ñakkiim o nomit a nuun a pesoorooƭ nuun no ñofu.

⁵ Nu njanga xaaliis es fa wurus es, tig oo tig mosu ke mi moƴna o njeg o njiriiñ, ƥis a den na xa cuurand axe nuun.

⁶ We ngenna Yudaa fa Yeerusaleem, nu njikooxa a den Yaayawan we, ngoƭatirand a den fo saax den.

⁷ Kaa koy, xam nomtitiid a den no mbiñ onqe nu njikooxna a den, soo paaxeer ke nu mbi’na, um nomtin a nuun.

⁸ Xa ƥiy xa koor axe fo xa tew axe nuun, xam jikoox a den we ngenna Yudaa. Xan da njikooxatin a den Seeseeba we na ñoowaa no saax goƭu. Mi o Yaal oxe layun.»

Xire fa mbalakaand fee fa hate fee

⁹ Yegnityo kene a ndeer qeet ke: «Ƥogdooxanyo xire, nqoy a salma-koor ake. Fat xiixire we fop a matiid a nqot a ƭat!

¹⁰ Nqawinyo laƥ na xa koŋko xe nuun, soo na xa taaba xe nuun, nu njalin teen a salma. Fat o neewu doole xe a lay ee: ‹Jambaar refum.›

¹¹ Ñofandyo ngariid, nuun qeet ke fop, inoortiid o saax oo saax, mbokatoor kam a yulanq ale!» O Yaal oxe, ɓisiidi a salma-koor ake wo mene.

¹² «Fat qeet ke a inoox, a nqot a ƭat farna fo a Yulanq alaa na hate fee, yaam maaga um moofkaa, ndax um hate qeet ke fop inoortiidna o saax oo saax.

¹³ Nqotyo a ñand ake, yaam a saxad ale a foora. Ngaryo nduut, yaam o nirir ole xey muut too xa toon axe kaa caarooxaa yaam kañaan magnu ne den.

¹⁴ A yaj a yaj akey a ngaraa kam a yulanq ale na hate fee, yaam ñaal ne no Yaal oxe a matiida.

¹⁵ Njeeƈ ne fo o nqool onqe xan a nuk, xa qoor axe a ñak a qoolaand den.

¹⁶ O Yaal oxe xey a bumbtiidaa Siyoŋ, a fangnitaa o ñuxur um Yeerusaleem. Asamaan fo lanq kaa sendaa, ndaa o Yaal oxe refu ndaɗand ne na xeet um, laqooxand no Ii-isra’el we.»

¹⁷ Kaa tee: «Maaga, xan nu and ee mi refu o Yaal oxe Roog nuun, mi fee genna Siyoŋ, took o joong o tedu le mi. Yeerusaleem xan a ted, too wiin jan songkatiran muk.»

O neqatin ole na xeet fee Roog

¹⁸ No ñaal kaaga, xan o ngoon onqe na biiñ fee a xaytiidaa na xa coong axe, fo sis ole a yuurtiidaa na ñaang ake, poofi ke a nqayaa na ƈufnand ake Yudaa fop, a cur a balit no Mbind ne no Yaal oxe soo a sooraa a yulanq ale Sitiim.

¹⁹ Misira koy xan a wootat, Edoom a refat a koƥ-a-ƥor a bootu, yaam kaa mbariƴ fo wiin we Yudaa, a ƥax teen fo’oy le no caambuur ke.

²⁰ Kaa koy, Yudaa xan a geneel kili, Yeerusaleem oo neen no suk boo no suk.

²¹ Xam rabdinoox fo’oy den, ke fi’afuleeranuuma fop oo, soo mi o Yaal oxe, um gen kam Siyoŋ.»