Yeremi 45 - NQAARIIT NE ROOG

Ke yegneena a Baruk

¹ Keeke refu fa lay fee o tuleer Yeremi a daawnoogna a Baruk fee o ƥiy Neriya, ta bindan no laxas safe, no hiid o nahkandeer olaa no maat Yoyakim fee o ƥiy Yosiya, too a ref o maad Yudaa:

² «Keeke o Yaal oxe Roog fee Isra’el a layu na wo, wo Baruk:

³ Kaa o layaa yee: ‹Sabab took es! O Yaal oxe a ɓaata naqad na ƭomaan es. Kaam xij laƈ no iinaa too jegiim a ñootnax sen.›

⁴ Keeke o Yaal oxe a simaxam um layong: Ga’angi, mexe yaqaa ke max’uuma, fuuraa ke jimb’uuma, refna ref saax lene fop.

⁵ Soo wo o mat, o waaƭanaa a xoox of tig maak! Ba o waaƭ a den! Yaam mi o Yaal oxe, xam ɓisiid taamaala took mbindeef nuu refna. Kaa koy, xam ci’ong a muc o ñis of muu retoona.»