Saak 5 - NQAARIIT NE ROOG

Yaal kalal ke

¹ Nuun yaal kalal ke, nan-gilooxyo fa lay es. Nu mbara o lool, too iin, yaam taamaala ke na ndaawkaa a nuun.

² Halal nuun a fota boo a ƴut, max ke a ŋeeñ ñirax nuun.

³ Wurus nuun fa xaaliis nuun a ñaamooxa. Keene kaa lalaa a nuun ee xan fop a yaqoox. Cer ke nuun xan a yaqoox itam, wee ndax kaa ndoxel na fiɗel, yaam kaa nu ngindan a qoox nuun kalal no ñaal paktaand adna.

⁴ Kaa nu naxoogu wiin we njalna na xa qol nuun, mbañ o ndabid a den. Den koy, owe loolooxaa a Roog ne nu mbi’itna fa den. Wiin weene njalanna a nuun owe mbuuqaa, too Roog o Yaal oxe Hupna fop a nana a den.

⁵ Nu ñaama o ñoow ole na adna fee kam o neq fo no kuu felna a nuun. Nu yablooxa boo naang neeke naluƈ nen ƥuj kude.

⁶ We mbi’eerna paaxeer, kaa nu ƭeganaa a den hate, mbaraa a den itam, too mbañlooxanee a nuun dara.

Muñyo too nqeɗ!

⁷ Fog es, ten taxu mexe layaa a nuun, nu muñ boo na waxtu faa o Yaal oxe a nomtooxiidkaa mene. Nandyo fo o qooxoox: Ngam a fadangaa, o qooxoox kaa duufaa, soo a ref no cungaa bes faa a teƥ a ɓogkaa a cun ake.

⁸ Nuun itam, muñityo naaga, saƭik, yaam bes fee o Yaal oxe a nomtooxiidkaa a mata.

⁹ Fog es, ba nu ñunqumtiloox, ndik Roog a hate a nuun. Nan-gilooxyo, o Kaahate xe a mata, oxey no don-maax ole.

¹⁰ Fog es, mbetandooxyo duleer we layoogna yaaga no gon le no Yaal oxe. Njangityo na den no ke da ngomna no coono, too a muñin.

¹¹ In we layaa yee a ƭaaya, yaam kaa da saƭik’u. Yob o mat, nu nana boo ƈut o saƭkel ole ten. Nu andahina ke o Yaal oxe a coox’uuna cinj ƭeetlax ke ten. No ndigil, o Yaal oxe a yirma wiin we, a naaga o fi’anaa a den paax.

¹² Fog es, ke moƴna o jeg o njiriiñ refu yee ba nu ngaañ. Ba nu ngaañit a Roog, ba nu ngaañit adna fee, ba nu ngaañit tig lakas itam. O layangaa tig, too and ee ndigil oo, layi rek ee: «Iyo!» A warangaa layel: «Ha’aa» layi yee «Ha’aa» ndik Roog a hate’ong.

¹³ O leng na nuun a refangaa na coono, fat a ƴufginoox a Roog. O leng na nuun a felakinooxangaa itam, fat a xaanan a Roog.

¹⁴ O leng na nuun a jirangaa, fat a xoy we adooxanna mbokatax ne no gimu we, da ngar a ƭuumin diwliin no gon le no Yaal oxe, soo a nqeɗanin.

¹⁵ A nqeɗtangaa o ngim, yaaga xan o Yaal oxe a wodandin, a innin. A fi’angaa bakaad itam, xan Roog a waasanin o ten.

¹⁶ Ten taxu, um layaa a nuun ee: Mbeejliryo pakaad nuun, too nqeɗanraa a Roog itam, ndax nu mbod. A qeƭ no kiin o cofu a jega doole lool.

¹⁷ Mbetandooxyo a Eliya! Eliya, o kiin o nandu nen a in a reeƭu. A xeɗ’a a Roog fo xeeñ um fop, ndax deɓkee. Kaa hatna na bes faaga boo xa kiid xa tadaq fa genwal, a teƥ jeg’atee no lanq ke.

¹⁸ Cinj kaaga, a ɓaata o xeɗ, ndax ta deɓ. Maaga, Roog a deɓa boo a saxad a jegat.

¹⁹ Fog es, o leng na nuun a gulmangaa a ƭat ale no ndigil ne, soo koy o lakas a nomtiidin na ƭat aleene,

²⁰ fat nu and kene: Oxe na nomtitiidaa o paabakaad na ƭat a paaxeer um, a naaga o muclaa o kiin oxeene na fa nqon. A soƥangaa sax ee pakaad um a may’a, xan Roog a waasanin a den.