O leetar ole Pool a bindna GIMU WE NGENNA ROM 3 - NQAARIIT NE ROOG

¹ Xar refu a seek ale o Yaawuur oxe a waagna o hupit o tefee Yaawuur? Ndi xar refu o njiriiñ onqe nquc a jegna?

² No kuu refna a adoorun. Eetu, Roog kaa doxin Yaawuur we fa lay um.

³ Xar na laykeel boog, a soƥangaa yee leng-leng na den kaa ngore’aƭar’u? Ndax ngore’aƭar den neene a waaga o riñ a Roog no gore’aƭar?

⁴ Muk! Boo o kiin oxuu refna a maaɓaa yoo, yaqanee Roog a layaa ndigil, ne a Pind a Tedu ke a laytuuna no ten ee: «Xan o andtel o jof na fa lay of, too oxuu layoorna fa wo xan o ɓurin.»

⁵ Ndi xar i laykaa? (Kaam laytaa nen wiin we sax.) Boo njofaƭar in a lalitna o cofel ole Roog, ndax Roog kaa jofaƭar, yaa ta xawaa a in no fuux um?

⁶ Muk! Nam a waagkoogu o hate’it adna fee boog?

⁷ A soƥangaa yee na pexey o maaɓ es ndigil ne Roog a moƴ’u o xaytaa boo ta jeg teen o ndam, xar taxu mi fa xoox es um hate’el nen o paabakaad?

⁸ «Yaaga boog, xar taxu i mbi’kee paaxeer, ndax paax a waag o sutoor teen?» Leng-leng kaa ñu’aa a in, yaam a nqalaataa yee keene fa lay in oo. Weene wiin, a qaw ale a hela a den.

O kiin o leng jofee

⁹ Xar i laykaa boog? Ndax in Yaawuur ngupu wiin lakas we? Muk! Yaam i njaɓa yaaga yee Yaawuur we mbaat we ndefeerna Yaawuur, den fop, owe na sañ-sañ bakaad.

¹⁰ Keene a Pind a Tedu ke a ne’oogu ye da layna yee: «Jegee oxaa jofna mbaambir Roog, refee o leng sax.

¹¹ O leng jegee yiif, jegee oxaa na waaƭaa a Roog.

¹² Fop kaa ƭap a ƭat ale, soo a mbokatoor, a laawoox. Jegee oxaa na fi’aa paax, jegee o leng sax.

¹³ Fa nqon soom na sutooraa na xa paƭanq den, da mbi a ƭelem den naanaxir, fa lay den a ref daŋat saamaand,

¹⁴ xa ton den a may fo a salax, a nqaaɗ xut,

¹⁵ da njeg fitna no ndet mbarik o kiin,

¹⁶ muu da ndeefna, a mbaas maaga yaqe fo boom.

¹⁷ Andee a ƭat jam ale,

¹⁸ too saɗar a Roog jegee a seek a leng no ñoow den.»

¹⁹ I anda koy ee ke kebil ke a layaa fop, kaa layanin we njaɓna o ndeef kebil ke, ndax o don oluu refna a naag meek, soo adna fop a njaɓ ee baabakaad a ndefu mbaambir Roog.

²⁰ Ten taxu, o leng ɗeetkaand nen o cofu mbaambir Roog, yaam ne ta fadnaa kebil ke. Kebil ke kaa andnooraa o kiin oxe bakaad um soom.

A ƭat ale Roog a ɗaapna, ndax ta mucil o kiin

²¹ Ndiiki koy, Roog a feeñla a in ne o kiin a waagna o jofit mbaambir um, too reefkee no kebil ke. Kebil ke fo duleer we sax a layit’aan.

²² Roog kaa ɗeetaa wiin we nen jofu mbaambir um na pexey o ngim den na Yeesu Kiristaa. Kaa fi’anan we ngimna na Kiristaa fop, yaam jegee njektirand leng:

²³ Fop a mbakaada boo a ñak o ndam onqe Roog,

²⁴ ndaa kam yirmande um, Roog a ci’a a den, da ndef jofu mbaambir um na pexey Kiristaa Yeesu fee watna a den na bakaad.

²⁵ Ten o mat Roog a jilu, ndax no we na ngimkaa, fo’oy um a ref sadax fee na ñufaa a qaw ale Roog yaam pakaad ke. Roog a fi’aan, ndax ta waag o lalit o cofel um, yaam ne andoona yee kaa maad’u o muñaa pakaad ke mbi’’eena yaaga.

²⁶ Neene a laltitu o cofel um na jamaane fee ndiiki, yaam ten fa xoox um kaa jof, too kaa ɗeetaa oxe jegna o ngim na Yeesu nen o cofu.

²⁷ Mam o kiin a waagu o fakoorit? Sen! Xeƈa yaa ta fadnaa ke kebil ke a simitna? Boo muk! Fak le kaa sutel yaam o ngim onqe.

²⁸ I anda yee, o kiin, na pexey o ngim a joftu mbaambir Roog, ndaa refee yaam ne ta reefaa ke kebil ke a simitna.

²⁹ Ndi boog Roog o mat, Yaawuur we soom a refanu? Ndax kaa refee itam Roog fee no we ndefeerna Yaawuur? Aha kañ!

³⁰ Yaam Roog fa leng soom jegu, ta ref oxe na jofanditkaa we nqucooxna o ngim onqe, a jofanditkaa we nqucooxeerna itam o ngim onqe.

³¹ Ndax neene i ñufitkaa kebil ke yaam o ngim onqe? Muk! Kaa i moƴ o saƭkinaa kebil ke sax.