Mise 5 - NQAARIIT NE ROOG

O Muumucil oxe xan a rimtel Betleheem

¹ O Yaal oxe kaa tee: «Wo Betleheem fee Efrata, wo fee moƴna o neew na qaw ake Yudaa, na wo um sutitkaa oxe na maadooxankaa a Isra’el! Oxe faqaqoora no camaane kaa yaaga, too o leng andee mberaandoong um.»

² Ten taxu xan o Yaal oxe a xaƴ xeet um boo no camaane kaa o tew oxe na fudkan a ñootkaa rek. Maaga, we na yoqkaa no fog um we pasaroox’ina xan a nomtooxiid me no Ii-isra’el lakas we.

³ Xan a inoox soo a gayit a den doole fee no Yaal oxe fo o magnel ole no gon le no Yaal oxe Roog um. Xan a ngenaa no yaadax, yaam xan a ɓoxotel o ndam boo no cat adna.

⁴ Ten fa xoox um na refkaa jam fee!» Yaa Aa-asuur we a songiidkaa saax le in, boo a ndok no pind mosu ke in, xan i ngebil took den aa-adax jaaku, sutan a den gelwaar mayu.

⁵ Weene xan a maadooxan saax le Asuur fo laƥ, a maadooxan saax le Nimrood fo ƥonax mboose. Neene o maad oxe na jam fee a watitkaa a in no Aa-asuur we, yaa da songiidkaa saax le in, boo a caf ake den a ndak no fiisel ole in.

Yoqatin we Isra’el na ñoowaa kam a saax ake

⁶ We yoqna na xa taan axe Yakoob ndeer qeet mayu, xan a ndef nen liim laa inoorna no Yaal oxe, nen mbuyaam took daaƭ. Ndoonkee yaakaar den no kiin, ngaɗooxkee no mbindeef.

⁷ We yoqna na xa taan axe Yakoob ndeer a saax ake, a ndeer qeet mayu, xan a ndef nen njogoy kam puufuɗag lakas ke, nen njogoy njanglax kam ged. Yaa ta songkaa mbuufuɗag um, xan a dak, a lisit, too o leng suqitkiran no ten.

⁸ «Fat o ɓay of a dal took no fañ of, da moocandel, den fop!»

Xan o Yaal oxe a moocand tamlooxand koɓong ke fop

⁹ O Yaal oxe kaa tee: «Ñaal ney a garaa naa um saŋikkaa pis ke nuun soo moocand a sareet-xire ke nuun.

¹⁰ Xam yaq teeru ke no saax nuun, jiƭit saŋe cegu doole ke nuun fop.

¹¹ Xam ɓool no cer nuun xa nombo xe nuun, too nu njegkatee o ƭeet o leng.

¹² Xam moocand a ndeer nuun pangool ke fo a ƥil a sexe ke nu mbaɗooxaa, too nu ngungkatee mbaambir ke xa ƥay nuun a njalna.

¹³ Xam fuurit a ndeer nuun xa taaƴ xa lupe xe Asera nu mbaɗooxaa, yaq teeru ke nuun.

¹⁴ Kam fuux ɗomu le mi, xam rabdinoox took qeet ke nananeeraxama fop.»