Mbeeñil 12 - NQAARIIT NE ROOG

O tew oxe fa Niŋki-naŋka

¹ O anddiloor o maak a feeña na asamaan: Ga’aam o tew oxaa hulooxna njeeƈ ne, a qoor ale a ref ɗuga a caf um, soo a rokoox o ndip onqaa saqna xa qoor xarɓaxay fo xa qoor xa ƭaq.

² Kaa reeƭu na pe um, soo a foygooxaa, yaam ne ta gaajooxoogna.

³ O anddiloor o lakas a feeña na asamaan itam. Niŋki-naŋka maak yaxgu coy a reeƭu. Kaa jeg a qoox ɓetaa ƭaq fo xa can xarɓaxay, a rokoox o ndip took xoox luu refna.

⁴ A laca fo a las um na qaaj a tadkandeer ale na xa qoor axe na asamaan, a yurdiid a den a lanq. Niŋki-naŋka a geenooxa paam o tew oxe gaajooxoogna, ndax oxaa mucaa ta ƴax o nqeq onqe.

⁵ Maaga, o tew oxe a ñoota o ƥiy o ngoor onqe na gayitkaa qeet ke fop o samb njelem. Kaa koy, o nqeq onqe ten a gife, too a ɓisel paam Roog fo gamb no maad le ten.

⁶ O tew oxaa koy a ƴufa kam a koƥ-a-ƥor alaa, maa Roog a jagandan’uuna, ndax ta ñoowaa maaga boo ñaal juni fo ñaal teemeed ƭik fo ñaal qarɓeen ɓetuu fa leng.

⁷ Neene, xire a dalfooxa o jeg na asamaan. Mika’el fo malaaka um a ñoxora fa Niŋki-naŋka, too Niŋki-naŋka fo malaaka um a ngomra fa den itam.

⁸ Kaa koy, Niŋki-naŋka a xawe, too ci’ataand ten fo malaaka ke ten sañ-sañ faa da ndefitna na asamaan.

⁹ Maaga, Niŋki-naŋka maak ne a foor’e tafil. Ten refu Mbangool ne yaaga na xoyeel o ƈiƴ oxe mbaat Saytaane. Ten oxe na naxaa adna fa muum a jooriide a lanq, ten fo malaaka ke ten.

¹⁰ Cinj kaaga, nanaam o ñuxur o maak olaa inoorna na asamaan, a layaa yee: «Ndiiki koy, a muc ale a fadiida, yaam Roog in a feeñla katil ne no Maat um. O Muumucil oxe ta regitna a feeñla sañ-sañ fee ta jegna, yaam o caajamb oxe geenoox’ina mbaambir Roog, a jambaa fog gimu we in ñaal fo yeng a foore tafil.

¹¹ Fog gimu we in a maafaan yaam fo’oy le no Mbaal onqe fo ndigil ne da seede’oogna. Mbex’ee itam o ñoow den boo a tax da saɗar fa nqon.

¹² Ten taxu, wo asamaan fo nuun we ngenna teen, mbelakinooxyo! Kaa koy, ndaw naqad took lanq ke fo o maag ole, yaam o ƈiƴ oxe a fudooxiida me nuun. Kaa fuux boo a buɓaa, yaam a anda yee jamaane um miñkatee.»

¹³ Ye Niŋki-naŋka a ga’na yee a joore a lanq, a refa no ɓeedaa o tew oxe ñoot’ina o ƥiy o ngoor onqe.

¹⁴ Maaga, o tew oxe a dufane a nafir a ƭak ake inoorna na canjiik a maak ale, ndax ta yetaa maa ta ñoowitkaa boo xa kiid xa tadaq fa genwal kam a koƥ-a-ƥor alaa. Neene, o tew oxe a goƭata a Mbangool.

¹⁵ Maaga, Mbangool a xuqta foofi no don um, ta fi nen a paas a cinj o tew oxe, ndax a yaand ake a ƥisin.

¹⁶ Kaa koy, lanq ke a ƈufgiida o tew oxe, a mbetooxa, a ƥuus a paas ale Niŋki-naŋka a xuqit’ina no don um.

¹⁷ Maaga, Niŋki-naŋka a fuuxana o tew oxe, too a reta a ñoxorik fo we yoq’ina na xa taan um, ndefna we na ngeekaa kebil ke Roog, too a ndam no ndigil ne Yeesu a feeñilna.

¹⁸ Naaga, Niŋki-naŋka a geenooxa na ƥeeraamb alaa no maag olaa.