Ke bindeena no xe ne’eena YOB 3 - NQAARIIT NE ROOG

JEETAAY LE A NDEER YOB FO QAARIIT TADIK KE TEN ( 3—31 ) Yob a ɗomatooxa o rimel um

¹ Cinj ñaal ɓetuu ƭik kaaga, Yob a yaƥata, a saloox ñaal ne ta rimeena,

² a lay ee:

³ Ñaal ne no rimel es a hel’a o mooc koy, o yeng ole layna yee: «O ƥiy o ngoor a fude!», a sooƴ.

⁴ Yaasam ñaal neene a niɓaan tit! Baa haal a Roog maaga took-ee-took, too baa a qoolaand a meleƈ took um!

⁵ Yaasam o niɓaan fo a sisaaƥ a naangin salquƈ, eel niɓaanu taruus a iroox took um, soo o niɓaan ñaal a xufin!

⁶ Yaasam o niɓaan ole a maƥ o yeng oleene! Baa fog muk no ñaal ke no hiid ole, baa limtel na xa yeng axe na qool ake.

⁷ Yaasam o yeng oleene a xat, too baa xa ƈeel a njibit no ten.

⁸ Fat jaajat we a salooxin, den we mbaagna o yok a Lewiyatan.

⁹ Yaasam baa o xoor mbeet ole a meleƈ took um, too baa yakaƥaar a qoolaand ale, a ñak o ga mbeet ne a leeliidaa,

¹⁰ yaam ne ta jengeeraxama no fud ya es, ndax gomkiim coono kene.

¹¹ Xar taxu xoniim, ye um sutooraa no fud ya es, ɓut, ye um ñooteel?

¹² Xar taxu um soƥ meen kuɓay ke no xe gisaxama fo ƭeen ƭik ke numnaxama?

¹³ Um xon’angaa, wondooxkoogaam soo yaadoox. Ɗaankoogaam soo ñootnoox

¹⁴ fo maad we fo wiin maak we na saax ake, den we maxaneena a pooɗoom a maak ake

¹⁵ fo gelwaar we njegna wurus, pind den a yipoox xaaliis fa nqoolu boo muut.

¹⁶ Yaaga refkoogiim meen, nand fo o fud o watu laa uupeena, nen o nqeq o ndeyeer onqaa ga’eerna a qoolaand ale no ñaal ne.

¹⁷ Maaga, soxodu we yo’nooxkatee, soo we nqijna a ñootnooxataa.

¹⁸ We ndameena a ndefata no njaambuur den, too nanatee o ñuxur no we ñagadiloogna a den.

¹⁹ Wiin maak we fo fo mboƭomsogor ne leng a ndefatu, faɗ we a mbatel no yaal den.

²⁰ Xar taxu Roog a xaƴ oxe na coono’aa ta ñoowaa, oxe jegna naqad no xeeñ um ta maadaa?

²¹ Weene kaa cungaa fa nqon fee, ndaa garkee muk. Kaa mbaaƭtan ne halal a waaƭteel.

²² A sawarkooga lool too a may fo o ɗaay, yaa da ƥek’eena kam a mboy.

²³ O kiin oxey oxaa andeerna me ta jofaa, soo Roog a naagaam gik o saax oo saax.

²⁴ Xa iin es ndefu ñaamel es, xa ŋuus es a yuurtaa nen foofi.

²⁵ Ke um saɗaraa na dalaxam, ke um diidaa a daawaxam.

²⁶ Jegatiim o yaadax, jam ne’aand, a ñootnax a jalan. Coono soom um gomaa.