Heseki’el 6 - NQAARIIT NE ROOG

Ke layeena no we na mbaɗooxaa nitaal roog ke

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, geleerooxi farna fo xa coong axe Isra’el, too jo’tanaam a den paru na den.

³ Fat o lay ee: Nuun xa coong axe Isra’el, nan-gilooxyo fa lay fee no Yaal oxe na refkaa boo faw! Keeke o Yaal oxe na refkaa boo faw a layu xa coong axe fo a ñaang ake, a kamb ake fo a yulanq ake: Mexey! Mexe hebliidaa xire fee took nuun too xam yaq a ñaang a sadaxand ake nuun.

⁴ Xa sadaxand axe nuun xan a mbaytel, toxir cuuraay ke nuun a nduguñel, too xam maaf na nuun wiin da nqon mbaambir nitaal roog ke nuun.

⁵ Xam doon xa tal axe nuun, nuun Ii-isra’el we mbaambir nitaal roog ke nuun soo pasar xa kiiƈ nuun me widna xa sadaxand axe nuun.

⁶ Muu nu mbaagna o ngen, teeru ke nuun xan a mbes a pec soo a ñaang a sadaxand ake nuun a luƈtel. Neene, xan xa sadaxand axe nuun a yaqel, a mbaytel, nitaal ke nuun a ngefel soo a mooc, toxir cuuraay ke nuun a nduguñel, soo ke nu njalna a sooƴ.

⁷ Xan wiin nuun a yen a nqon, too xan nu and ee mi refu o Yaal oxe.

⁸ Kaa koy, yaa nu pasarkeel na saax a pogreer xam xaƴan a nuun yoqatin, waa mucitna na xire.

⁹ Maaga, yoqatin weene na nuun xan a mbetandoortaam ndeer qeet ke da ƥiskeel took o hup doole, mi fee gefna xeeñ den seeseeq le fesaxama a cinj fo a kid den a seeseeq ake ngaanna no pangool ke den. Saɗkatee o mbadraa a kid yaam paaxeer ke da mbi’na fo cednooxu ke den fop.

¹⁰ Ten taxu xan da and ee mi refu o Yaal oxe too xa koɓong taxee um lay a den ee xam doon a den taamaala feene.

¹¹ Keeke layum, mi o Yaal oxe na refkaa boo faw: Foxrandi xa ƥay of, dukoox a caf of soo lay ee ‹ey›, took cednooxu soxodu ke no mbind Isra’el fop na nqonkaa na xire, no biim fo na piste.

¹² Oxe na goƭkaa xan a xon na piste, oxe na matkaa a xon na xire, oxe na yoqkaa a widel o kurul-keƥ a xon no biim. Fuux le mi xan a jeg ne ta bugna took den.

¹³ Maaga, xan nu and ee mi refu o Yaal oxe, yaa xon we a ndefkaa ndeer pangool ke den, me widna xa sadaxand axe den, took a ñaang a ciig akuu ndefna, took xa cul axe na xa coong axe fop, yoora ndaxar saqtu nuu refna, yoora ngariñ niɓu nuu refna, fo me da ƥoxottoogna pangool ke den qeeñe-xeeñe pelu tuñ sax.

¹⁴ Xam doon o ɓay es took den, fi saax le a moƴ o woot, soo a moƴ o raad, a xotit na koƥ-a-ƥor ale boo Ribla, me da ngenna teen fop. Maaga, xan da and ee mi refu o Yaal oxe.»