Heseki’el 48 - NQAARIIT NE ROOG

A las ake na carind ake no ɓemb-roog o janoon

¹ «Keeke ndefu a kon ake na carind ake fo a las den: No ke xotitna no cat ke no ɓemb-roog o janoon, a joon fo a ƭat ale Hetlon boo no ndokand naa Hamat, a reef Hatsar-Enon, o ŋat ole Damaas no ɓemb-roog o janoon farna fa Hamat, a xotit no batand boo no mudand, a carind ale Dan, ta ref a las a leng.

² No ŋat ole Dan, no ke xotitna no batand boo no mudand, a carind ale Aseer, ta ref a las a leng.

³ No ŋat ole Aseer, no ke xotitna no batand boo no mudand, a carind ale Neftali, ta ref a las a leng.

⁴ No ŋat ole Neftali, no ke xotitna no batand boo no mudand, a carind ale Manaase, ta ref a las a leng.

⁵ No ŋat ole Manaase, no ke xotitna no batand boo no mudand, a carind ale Efrayim, ta ref a las a leng.

⁶ No ŋat ole Efrayim, no ke xotitna no batand boo no mudand, a carind ale Ruben, ta ref a las a leng.

⁷ No ŋat ole Ruben, a xotit no batand boo no mudand, a carind ale Yudaa, ta ref a las a leng.»

A las ale no Yaal oxe

⁸ «Denda fo o ŋat ole Yudaa, no ke xotitna no batand boo no mudand na refkaa a las ale nu mbatinkaa, o yaajel um a fi xa noonoong cuni qarɓeen ƭik fo xa noonoong cuni ƥetik, soo o cigdel ole a fodir fo leng na las ake nqotitna no batand boo no mudand, Mbind Roog ne a ref a ndeer ale.

⁹ A las ale nu mbatnankaa o Yaal oxe, o cigdel um xan a ref xa noonoong cuni qarɓeen ƭik fo xa noonoong cuni ƥetik soo o yaajel um a fi xa noonoong cuni xarɓaxay.

¹⁰ Saasadax we na njegkaa a las a tedu lene: Xa noonoong cuni qarɓeen ƭik fo xa noonoong cuni ƥetik no ɓemb-roog o janoon, xa noonoong cuni xarɓaxay o yaajel no mudand, xa noonoong cuni xarɓaxay o yaajel no batand soo xa noonoong cuni qarɓeen ƭik fo xa noonoong cuni ƥetik o cigdel no ɓemb-roog o ñamaak, Mbind ne no Yaal oxe a ref a ndeer ale.

¹¹ Saasadax we keseena ndeer xa ƥiy axe Saadok na njegkan, den we topatooxna calel es too mo’ee ye Ii-isra’el we a nduuxna a koƥ, ne Leelewi we a mo’it’ina.

¹² Den na njegkan nen a las a tedu tigi laa watniteena na qaaj ale no saax le na watinkeel denda fo o ŋat ole no Leelewi we.

¹³ A las ale no Leelewi we xan a fodir fo ale no saasadax we. A las a ƭak ake fop xan a njeg xa noonoong cuni qarɓeen ƭik fo xa noonoong cuni ƥetik o cigdel fo xa noonoong cuni xarɓaxay o yaajel.

¹⁴ O leng waagkee o sofnoox mbaat ta jikoox mbaat ta siiseer leng na las aleene no saax le refna ale moƴna jeg o njiriiñ na las ake fop, yaam kaa kesanel o Yaal oxe.»

A las ake na teeru fee fo ale no kelwaar oxe

¹⁵ «Xa noonoong cuni ƥetik axe na yoqkaa no yaajel ole na xa noonoong cuni qarɓeen ƭik fo xa noonoong cuni ƥetik axe xan a ndef o fiisel o xoolaƭaru laa xaƴaneena teeru fee, o genand ole fo xa kayand axe, soo teeru fee a fod a ndeer.

¹⁶ Neeke a fodkaa: No ɓemb-roog o janoon xa noonoong cuni nahik fo xa noonoong teemeed ƥetik, no ɓemb-roog o ñamaak xa noonoong cuni nahik fo xa noonoong teemeed ƥetik.

¹⁷ Teeru fee xan a jeg xa kayand axaa mbi’na xa noonoong teemeed ƭik fo xa noonoong qarɓeen ƥetik no ɓemb-roog o janoon, xa noonoong teemeed ƭik fo xa noonoong qarɓeen ƥetik no ɓemb-roog o ñamaak, xa noonoong teemeed ƭik fo xa noonoong qarɓeen ƥetik no batand, xa noonoong teemeed ƭik fo xa noonoong qarɓeen ƥetik no mudand.

¹⁸ Ke yoqna no cigdel ole fodirna fo a las a tedu le, xa noonoong cuni xarɓaxay no batand fo xa noonoong cuni xarɓaxay no mudand, xan a dend fo a las a tedu le. Kuu ta watna xan a ref ñaamel no we na mbugko njalanaa teeru fee.

¹⁹ Jaajal we na teeru fee nqoteena ndeer a carind ake Isra’el fop xan a nqooxan.

²⁰ A las a tedu le watneena fop xan a fi xa noonoong cuni qarɓeen ƭik fo xa noonoong cuni ƥetik o saax oo saax. Fat nu mbatin teen a qaaj a nahkandeer ale ta refan teeru fee.

²¹ Ke na yoqkaa o kelwaar oxe na jegkan, na xa saax xa ƭaq axe na qaaj a tedu le fo no ke teeru fee a jegna, lernooxna itam xa noonoong cuni qarɓeen ƭik fo xa noonoong cuni ƥetik axe na qaaj ale watneena boo no ŋat olaa no batand, a lernoox itam xa noonoong cuni qarɓeen ƭik fo xa noonoong cuni ƥetik axe boo no ŋat olaa no mudand, fodirna fo a las ake. O kelwaar oxe na jegkan. A las a tedu le fo Mbind tedu ne Roog xan a ndef a ndeer ale.

²² Ke lernooxna o jeg ole no Leelewi we fo ole na teeru fee, ke o kelwaar oxe a jegkaa xan a ref a ndeer ale, ndeer o ŋat ole Yudaa fo ole Bensame. O kelwaar oxe na jegkan.»

A las ake na carind ake no ɓemb-roog o ñamaak

²³ «Keeke ndefu a carind a lakas ake fo a las den: No ke xotitna no batand boo no mudand, a carind ale Bensame, ta ref a las a leng.

²⁴ No ŋat ole Bensame, a xotit no batand boo no mudand, a carind ale Simewon, ta ref a las a leng.

²⁵ No ŋat ole Simewon, a xotit no batand boo no mudand, a carind ale Isakaar, ta ref a las a leng.

²⁶ No ŋat ole Isakaar, a xotit no batand boo no mudand, a carind ale Sabulon, ta ref a las a leng.

²⁷ No ŋat ole Sabulon, a xotit no batand boo no mudand, a carind ale Gaad ta ref a las a leng.

²⁸ No ŋat ole Gaad farna fo ɓemb-roog o ñamaak, o ŋat ole xan a xotit Tamaar boo no poofi kaa Meriba kam Kades, a joon fo a ƈufnand ale Misira, a sag farna fo o maag olaa Mediterane.

²⁹ Keene refu saax le nu nqaajrandkaa a carind ake Isra’el nen lam na pexey mbanjang ne, too keene ndefu a las den. Mi o Yaal oxe na refkaa boo faw layun.»

Tokand xarɓaxay fo tokand ƭik ke Yeerusaleem

³⁰ «Keeke na ndefkaa tokand ke na teeru fee: No ɓemb-roog o janoon ole no saŋe ne fi’na xa noonoong cuni nahik fo xa noonoong teemeed ƥetik,

³¹ tokand ke na teeru fee xan a ne’tel a kon ake na carind ake Isra’el, tokand tadik no ɓemb-roog o janoon: Ndokand ne Ruben, ne Yudaa fo ne Lewi.

³² No batand, xa noonoong cuni nahik fo xa noonoong teemeed ƥetik, tokand tadik: Ndokand ne Yoseef, ne Bensame fo ne Dan.

³³ No ɓemb-roog o ñamaak, xa noonoong cuni nahik fo xa noonoong teemeed ƥetik, tokand tadik: Ndokand ne Simewon, ne Isakaar fo ne Sabulon.

³⁴ No mudand, xa noonoong cuni nahik fo xa noonoong teemeed ƥetik, tokand tadik: Ndokand ne Gaad, ne Aseer fo ne Neftali.

³⁵ Saŋe ne widna teeru fee xan a ref xa noonoong cuni xarɓaxay fo xa noonoong cuni ɓetuu tadik. No kaa xotitna a koom, teeru fee xan a xoyateel ee: ‹O Yaal oxe xey mene.› »