Heseki’el 46 - NQAARIIT NE ROOG

Bargal ke njaginna no kelwaar oxe

¹ Keeke o Yaal oxe na refkaa boo faw a layu: «O don-maax ole no maax-kam ole faambirna no batand xan a wegeel no ñaal ɓetuu fa leng ke na njalteel, ndaa xan a wetel na bes fee na ñootnax ale, a wetel itam na xew fee no nqool o ndeɓ onquu refna.

² O kelwaar oxe xan a rokit na ƭat ale no ndambalaan onqe no don-maax tafil ole soo a geenoox na toodook ake no don-maax ole. Saasadax we xan a ƥoxot sadax fa ndoxel fee ten fo sadax camsa’oor ke ten. Xan a gung no peg ne no don-maax ole, cinj kaaga ta sutoox, too o don-maax ole wegkaand a refangeerna njeeƈ ne kaa mud.

³ Xeet fee no saax le xan a ngung mbaambir es, mi o Yaal oxe, no ndokand ne no don-maax oleene no pes a ñootnax ke fo no fo nqool fo ndeɓ ne.

⁴ Sadax fa ndoxel fee o kelwaar oxe a ɓoxotkaa o Yaal oxe na bes fee na ñootnax ale xan a ref fo mbaal ɓetuu fa leng naa njegeerna sik fo suk mbaal laa jegeerna sik.

⁵ Xan a doon teen a ɓisiid sadax ngap kilo qarɓeen tadik bele, a yoonandtin suk mbaal le, soo fo mbaal ne, ta yoonandit a den kaa jofooxuuna na bele. Xan a ɓaat teen ngap xa liitar ɓetaa ƭaq diwliin axaa ta yoonanditna kilo qarɓeen nahik bele ke.

⁶ Na bes fee no nqool o ndeɓ onqe, xan a sadaxit nqoox ndeɓ naa jegeerna sik, paal ɓetuu fa leng fo suk mbaal njegeerna sik.

⁷ Xan a yoonandtin sadax ngap kilo qarɓeen tadik bele no nqoox nuu refna fo no suk mbaal luu refna, soo paal ke, ta yoonandit a den kaa jofooxuuna na bele. Xan a ɓaat teen ngap xa liitar ɓetaa ƭaq diwliin axaa ta yoonanditna kilo qarɓeen tadik bele ke.

⁸ O kelwaar oxe xan a rokit soo a sutoor na ƭat a leng kut ale, a xaañ no ndambalaan onqe na ndok ale matna ndokand ne.

⁹ Yaa xeet fee no saax le a ngarkaa mbaambir no Yaal oxe no toofeen ke, oxuu rokitna no don-maax ole no ɓemb-roog o janoon, xan a sutoor no le no ɓemb-roog o ñamaak, too oxuu rokitna no don-maax ole no ɓemb-roog o ñamaak, xan a sutoor no le no ɓemb-roog o janoon. O leng sutoorkee me ta rokitna, ndaa oxuu refna xan a reef no don-maax ole ta faambritna.

¹⁰ O kelwaar oxe xan a rokandoor soo a sutooxandoor fa xeet fee.»

Bargal ke njaginna no sadax pogreer ke

¹¹ «Yaa fo qew ke fo toofeen ke, sadax fee xan a ref ngap kilo qarɓeen tadik no nqoox ne fo ngap kilo qarɓeen tadik no suk mbaal le, soo kuu feluuna ta yoonandtin paal ke, ngap xa liitar ɓetaa ƭaq diwliin no kilo qarɓeen tadik kuu ndefna.

¹² Boo o kelwaar oxe a ɓoxotna o Yaal oxe sadax fa ndoxel no fud o letu mbaat sadax fa njamsa’oor no fud o letu, xan a wetanel o don-maax ole faambirna no batand soo ta ɓoxot sadax fa ndoxel um fo sadax fa njamsa’oor um ne ta fi’tan na bes fee na ñootnax ale, cinj kaaga, xan a sutoox, soo o don-maax ole a wegel cinj yaa ta sutooxna.

¹³ Ñaal nuu refna xan o ɓoxot o Yaal oxe nen sadax fa ndoxel o mbaal onqaa jegna o hiid too jegee sik. Xan o ɓoxotan nqes nuu refna.

¹⁴ Nqes nuu refna itam, xan o Yaal oxe a ɓoxotel ngap kilo ƥetik mbiɗel kaa mbosolteena ngap xa liitar xa ƭaq diwliin. Sadax no Yaal oxe yoo. Bargal keene ñufkee boo kili.

¹⁵ Nqes oo nqes, o mbaal onqe, sadax fee fa diwliin fee xan a ƥoxoteel nen sadax fa ndoxel faa ñufkeerna.»

Lam ne na xa ƥiy axe no kelwaar oxe

¹⁶ Keeke o Yaal oxe na refkaa boo faw a layu: «Boo o kelwaar oxe a ci’na o leng na xa ƥeem o ɗeg no lanq ke ten, ci’it neene xan a fogat no lam ne no ƥiy onqe, too xan a ɓoxotel xa ƥiy axe no xeene.

¹⁷ Kaa koy, boo o kelwaar oxe a ci’na o ɗeg no lanq ke ten o leng no dag we ten, ci’it neene o tag oxe na jegkan boo no Hiid o mbelakinax olaa, cinj kaaga, ta ɓoxotel o kelwaar oxe. Xa ƥiy axe no kelwaar oxe soom njegu lam ne ten.

¹⁸ O kelwaar oxe koy, waree o jaɓ kaa oxaa fogna na xeet fee a jegna, tee kaa suqtaa o jeg um. Ke ta cooxkaa xa ƥeem nen lam, xan a xottin no ke ta jegna, ndax o leng na xeet es ñakkee o jeg um.»

Cawand ke no Mbind Roog ne

¹⁹ Cinj kaaga, o koor oxe a reefnaxam no ndokand ne refna denda fo o don-maax ole, a ɓisaam no tok tedu ke mbaambirna no ɓemb-roog o janoon, too a kesan’el saasadax we. A lalaxam maaga o mbiñ o yaaju kam ee kam fee no saax ole no mudand.

²⁰ Maaga, a layaxam ee: «Mene refu o mbiñ onqe saasadax we a mbaƴnitaa a tegeƴ ake no muumeen ke sadaxteena yaam tooñ ke, ndax a baasan pakaad a daawtel na Roog. Teen a njuɗtaa itam sadax ke. Neene, dara teen ɓiskaand no maax-tafil ole too xeet fee tedlanditkaand o ten.»

²¹ Cinj kaaga, o koor oxe a ɓisaxam no maax-tafil olaa soo a reefnaam mbaambir kooñ nahik ke ten: No kooñ nuu refna a jeg’a o maax.

²² Xa maax xa nahaq axeene kaa neew’u soo a mbodir den fop, o cigdel den a reeƭa xa noonoong qarɓeen nahik, soo o yaajel ole a ref xa noonoong qarɓeen tadik.

²³ Saŋe wid’u a den, den nahuk fop, soo cawand a maxel, a mbaxnel no saŋe ne me widuuna fop.

²⁴ O koor oxe a layaxam ee: «Keene ndefu cawand ke no jaajaw we, me diidimle we no Mbind Roog ne a njuɗtaa a tegeƴ ake no sadax ke na xeet fee.»