Biblia Todo Logo
Bib sou entènèt

- Piblisite -

Heseki’el 43 - NQAARIIT NE ROOG


Roog a nomtooxiida no Mbind Roog ne

1 O koor oxe a ɓisaxam farna fo o don-maax ole, ole faambir’ina no batand.

2 Maaga, ga’aam o ndam onqe Roog fee Isra’el, ta inoortiidaa no batand. O ñuxur ole ten kaa nandtoogu fangax poofi cegu doole, lanq ke fop a may fo o ndam onqe ten.

3 Mbeeñil neene ga’uuma kaa nandtoogu ne ga’’uuma paam o xuluɓ olaa Kebaar ye ta garna ndax ta gef teeru fee. Maaga, yenaam, gung a lanq.

4 O ndam onqe no Yaal oxe a rokiida kam Mbind ne, a reef no don-maax ole jasnoor’ina fo batand ne.

5 Maaga, Yiif le a gifaxam soo a ɓisaam no maax-kam ole. Ga’aam o ndam onqe no Yaal oxe mayƭand’ina Mbind ne fop.

6 Nanaam oxaa na layaa fa mi taa kam Mbind ne, soo o koor oxe a geenoox paam es.

7 O Yaal oxe a layaxam ee: «Wo fee o ƥiy no kiin, meeke refu o mbiñ onqe no uum-maamaad es, o mbiñ onqe um dakkaa o jaf es. Xam gen teen boo faw a ndeer Ii-isra’el we. Mbind Isra’el fo maad we ten ndoɗganditkatee muk gon tedu le mi njaga ne den fo xa tal axe no maad we den took a ñaang a sadaxand ake den.

8 Kaa ndoonoogu peg ne den paam peg ne mi, a toodook ake na xa ton-maax axe den paam ake na xa ton-maax axe mi, too saŋe leng kut rok’u a ndeer es fa den. Neene, a nqoolaƭarandta gon tedu le mi cednooxu ke da mbi’na. Ten taxu sooynitaam a den fuux le mi.

9 Ndiiki koy xan a ndiƈat paam es njaga ne den fo xa tal axe no maad we den, too xam gen a ndeer den boo faw.

10 Wo fee o ƥiy no kiin, fiisani mbind Isra’el ne Mbind Roog ne a saxitna. Fat da sed ɓot yaam tooñ den, soo a liiƥ samandaal ne.

11 A sedangaa ɓot yaam fop ke da mbi’na, andnoori a den ne Mbind nene a saxitna, a keenooƭ um, xa ton-maax axe ten fo tokand ke ten, samandaal ke ten fop fo bargal ke ten fop, samandaal ke ten fop fo kebil ke ten fop. Dooni na kid den caq ne ten. Xan a ngoroox samandaal ke ten fop fo bargal ke ten fop, too xan a mbadin a den.

12 Keeke refu kebil ne no Mbind Roog ne: Took o jul ole no joong ole, ke widna fop me ta dayna kaa ted lool. Keene refu boog kebil ne no Mbind Roog ne.»


O sadaxand ole fo sadax ke

13 Neeke o sadaxand ole a fod’u, a reefandel na xa noonoong axe oluu refna a doon’ina o ɓay, a moƴ o jigid o noonoong ole na liiƥteel. O waaƥ ole a fi’a o noonoong o leng, o yaajel um a ref o noonoong o leng, soo a kiig ale widuuna a fi o yaajel o ɓay. Ten reeƭu tiƈoor ke no sadaxand ole.

14 No ke xotitna no waaƥ ole garitna a lanq boo na tiƈoor ale ɗuga fee, a jeg’a xa noonoong xa ƭaq fo o noonoong o leng o yaajel, soo ke xotitna na tiƈoor a neewu le boo na maak ale, a jeg’a xa noonoong xa nahaq fo o noonoong o leng o yaajel.

15 Keƥandand ne a jeg’a xa noonoong xa nahaq, soo xa can xa nahaq a yoɗoor teen.

16 Keƥandand ne a fi’a xa noonoong xarɓaxay fo xa noonoong xa ƭaq soo xa saax xa nahaq axe ten fop a mbodir.

17 A tiƈoor ale a jeg’a xa noonoong xarɓaxay fo xa noonoong xa nahaq o cigdel fo xa noonoong xarɓaxay fo xa noonoong xa nahaq o yaajel na xa saax xa nahaq axe ten fop. A kiig ale muuk’ina ke widuuna a fi’a genwal o noonoong. O waaƥ ole a fi’a o noonoong me widuuna fop, soo ta ŋaayteel o toŋ-toŋ olaa faambirna no batand.

18 O koor oxe a layaxam ee: «Wo fee o ƥiy no kiin, keeke o Yaal oxe na refkaa boo faw a layu: Kene ndefu bargal ke njaginna no sadaxand ole yaa ta maxkeel ndax sadax toxel ke a ƥoxoteel teen, fo’oy le a wiiseel teen.

19 Saasadax Leelewi we ndefna xa taan Saadok too a matiidaxam ndax da njalanaam, fat o coox a den nqoox ndeɓ nen sadax fa mbaasnoor pakaad. Mi o Yaal oxe na refkaa boo faw layun.

20 Fat o xot no fo’oy le ten soo ɗuumin na xa can xa nahaq axe no sadaxand ole, no kooñ nahik ke no tiƈoor ke fo took a kiig ale boo ta xet. Neene, xan o watin bakaad fee no sadaxand ole soo xoolandin.

21 Fat o xot nqoox neene ɓoxoteena yaam bakaad, soo doxin no mbiñ onqaa keseena kam Mbind Roog ne, tafil o Mbiñ o tedu nqe.

22 No ñaal ƭikandeer ne, fat o ɓisiid suk fambe laa jegeerna sik, ta ɓoxotel yaam bakaad fee, soo bakaad fee a watnel no sadaxand ole, ne ta watnit’eena na pexey nqoox ne.

23 O ƴutangaa sadax fa mbaasnoor pakaad fee, fat o ɓisiid nqoox ndeɓ naa jegeerna sik fa leng fo suk mbaal laa jegeerna sik fa leng, a xottel na ked ake.

24 Fat o ɓisiid a den mbaambir no Yaal oxe. Saasadax we xan a ƥax fo jem took den soo a ƥoxot a den o Yaal oxe nen sadax fa ndoxel.

25 Fat o ɓoxotaa ñaal nuu refna boo ñaal ɓetuu ƭik suk fambe nen sadax fa mbaasnoor pakaad. Nqoox ndeɓ fo suk mbaal laa hatna na ked ake xan a sadaxtel itam, a ñak sik den ɗik fop.

26 O sadaxand ole xan a ɓogdeel boo ñaal ɓetuu ƭik. Xan a xoolandel soo a kesel.

27 Ñaal ɓetuu ƭik keene a mbaafangaa, no ñaal ɓetuu ndadkandeer ne fo ñaal ke na ndeefkaa took um, saasadax we xan a ƥoxot took o sadaxand ole sadax toxel ke nuun fo sadax camsa’oor ke nuun, too xam jaɓ a nuun. Mi o Yaal oxe na refkaa boo faw layun.»

Copyright © 2015-2023 by Eglise luthérienne du Sénégal

Eglise luthérienne du Sénégal
Swiv nou:



Piblisite