Heseki’el 41 - NQAARIIT NE ROOG

¹ Maaga, o koor oxe a ɓisaxam kam o Mbiñ o tedu nqe. A liiƥa a toodook ake da mbi xa noonoong ɓetaa fo leng o saax oo saax.

² O yaajel ole no don-maax ole a reeƭa xa noonoong xarɓaxay. Fo ndabax ne ndeerna o don-maax ole a mbi’a xa noonoong xa ƥetaq no saax o leng ole fo xa noonoong xa ƥetaq no lakas ole. A liiƥa o cigdel ole no Mbiñ o tedu nqe, ta fi xa noonoong qarɓeen nahik, soo o yaajel ole a ref xa noonoong qarɓeen ƭik.

³ Cinj kaaga, a roka kam fee. A liiƥa a toodook ake no don-maax ole, da mbi xa noonoong xa ƭaq, o don-maax ole a fi xa noonoong ɓetaa fo leng, fo ndabax ne ndeerna o don-maax ole a mbi xa noonoong ɓetaa ƭaq.

⁴ A liiƥa xa noonoong qarɓeen ƭik o cigdel fo xa noonoong qarɓeen ƭik o yaajel no mbaambrand ne no Mbiñ o tedu nqe, soo a layaam ee: «Meeke refu o Mbiñ onqe moƴna ted.»

Fo ndok-fo-mbulanq ne

⁵ O koor oxe a liiƥa o tinqel ole no Mbind Roog ne, ta fi xa noonoong ɓetaa fo leng, soo o yaajel ole no fo ndok-fo-mbulanq ne mbidna Mbind ne a ref xa noonoong xa nahaq.

⁶ Fo ndok-fo-mbulanq ne ndend’ina, a mbi xa per xa tadaq axaa cokrandoorna, oluu refna a jeg fo ndok qarɓeen tadik kaa ndokir’u fo saŋe ne wid’ina Mbind Roog ne, ndax fo ndok neene a taƥnel teen, a mbidin. Taƥrand’aand fo tabax ne no Mbind ne fa xoox um.

⁷ Tok ke kaa moƴ’u moƴ o yaajaa nuu da moƴ’ina o ngoƭtaa took, a ŋaayteel o toŋ-toŋ me widna Mbind ne. Neene, took fee no Mbind ne kaa moƴ’u o yaaj, too taax-took ne took no ne ndeer a reefooge.

⁸ Ga’aam a peroŋ me widna Mbind Roog ne. A per ake no fo ndok-fo-mbulanq ne a ndeeƭa o siind o muum, geel den a fi xa noonoong ɓetaa fo leng.

⁹ Tabax tafil ne no fo ndok-fo-mbulanq ne a fi’’a xa noonoong xa ƥetaq o tinqel. O wooƥ o yaaju le reeƭna ndeer tabax ke no fo ndok-fo-mbulanq ne

¹⁰ fo tok ke mbidna Mbind Roog ne a jeg’a o yaajel olaa fi’na xa noonoong qarɓeen ƭik me widna Mbind ne boo ta xet.

¹¹ Xa ton-maax axe no fo ndok-fo-mbulanq ne farna fo o wooƥ o yaaju le kaa ndeeƭu xa ƭaq, o leng farna fo ɓemb-roog o janoon, o lakas farna fo ɓemb-roog o ñamaak, soo o yaajel ole no wooƥ o yaaju le a ref xa noonoong xa ƥetaq me widna Mbind ne.

¹² Tabax ne jasnoor’ina fo o maax ole, a faambir no mudand, o yaajel um a reeƭa xa noonoong qarɓeen ɓetuu ƭik, soo o tinqel um a ref xa noonoong xa ƥetaq me widuuna fop, o cigdel um a ref xa noonoong qarɓeen ɓetuu nahik.

¹³ A liiƥa Mbind ne. O cigdel ole a reeƭa xa noonoong teemeed, o maax ole, tabax ne fo saŋe ke ten a njeg’a o cigdel olaa fi’na xa noonoong teemeed.

¹⁴ O yaajel ole no mbaambrand ne no Mbind ne fo o maax ole farna fo batand ne a reeƭa xa noonoong teemeed.

¹⁵ A liiƥa o cigdel ole no tabax ne no saax ole farna fo o maax ole garit’uuna a cinj, xa teefand axe ten no saax boo no lakas, ta fi xa noonoong teemeed. O Mbiñ o tedu nqe fo o ndambalaan onqe no ndokand ne,

Kam fee no Mbind Roog ne

¹⁶ peg ke, xa palangteer axe njegna tagar, xa teefand axe mbidna taax-took tadik cokrandooru ke njasnoorna fo peg ke kaa da singit’el a teex boo ta xet, a xotit a lanq boo na xa palangteer axe soo xa palangteer axe a mbegel.

¹⁷ Took fee no don-maax ole boo kam Mbind ne, tafil fee took saŋe ne widuuna fop, kam oo tafil oo kaa mosand’el,

¹⁸ soo pindel yeeyetax fo a naaq keec a mbi’’e teen. A naaq ngeec a sexel teen a leng a ndeer pindel yeeyetax ƭik kuu ndefna. Mbindel yeeyetax nuu refna mukit ƭik a jeg’u,

¹⁹ mukit no kiin naa faambirna no saax o leng farna fo a naaq ngeec fo mukit njogoy naa faambirna no saax o lakas farna fo a naaq ngeec. Neene a refit’u me widna Mbind ne fop.

²⁰ No ke xotitna a lanq boo took fee no don-maax ole pindel yeeyetax fo a naaq keec a mbi’’e took tabax ne no Mbiñ o tedu nqe.

²¹ A tayil ake no don-maax ole na ndok a maak ale kaa mbodir’u. Mbaambrand ne no Mbiñ onqe moƴna o ted o mem o leng kut ole a jeg’u.

²² O sadaxand ole a teex a fi’it’e, geel um a ref xa noonoong xa tadaq soo o cigdel ole a fi xa noonoong xa ƭaq. Kooñ ke ten, tiƈir ke ten fo xa saax axe ten, a teex a ndeeƭu. O koor oxe a layaxam ee: «A taabul ale refna mbaambir no Yaal oxe yoo.»

²³ O don-maax ole no Mbiñ o tedu nqe fo ole no Mbiñ onqe moƴna o ted a njeg’a begax ƭik.

²⁴ A jeg’a na xa ton-maax axe begax ƭik kaa mbirlooxoogna den ɗik fop, begax ƭik no don-maax o leng ole fo begax ƭik no lakas ole.

²⁵ Pindel yeeyetax fo a naaq keec a sex’e took begax ke no Mbiñ o tedu nqe, ne da mbi’it’eena took tabax ke. Jibir a teex a reeƭa no mbaambrand ne no ndambalaan onqe garitna tafil.

²⁶ A jeg’a xa palangteer axaa njegna tagar fo a naaq keec o saax oo saax, denda fo o ndambalaan onqe, no fo ndok-fo-mbulanq ne no Mbind ne fo no cibir ke.