Heseki’el 32 - NQAARIIT NE ROOG

Ƭomatax ne took Misira fo o maad um

¹ No hiid xarɓaxay fo hiid o ɗikandeer ole a cinj ye i ƥiseena took o hup doole, no ñaal eetaand ne no nqool xarɓaxay fo nqool o ƭikandeer onqe, o Yaal oxe a daawnaxam fa lay um na xa ƭelem axene.

² «Wo fee o ƥiy no kiin, yoɗani a Firawon fee o maad Misira a kim a ƭomatax! Fat o lay ee: Kaa o nandtoogu o njogoy o njanglax ndeer a saax ake, ref nen fa noox kam xa maag axe. Kaa o balnoogu xa quluɓ axe wo, noottaa poofi ke a caf of, jiqtaa a kal ake den fop.

³ Keeke layum, mi o Yaal oxe na refkaa boo faw: Xam deɓ mbaal es took of kam mbokatoor no qeet mayu, too xan a qicong kam mbaal-ƭooq ne mi.

⁴ Xam deɓong a lanq, liilong na koƥ ale. Xam gennoor took of tiiƭ ke na asamaan fop, giñnoorit muumeen ke no lanq ke fop took of.

⁵ Xam doon cer of took xa coong axe soo mayƭandit a yulanq ake ƭaaq ke wo.

⁶ Xam soorit fo’oy le wo saax le, o weƴaa boo na xa coong axaa, too xan a mayƭand a kamb ake.

⁷ Yaa o naagkaa ɗuƭ, xam sing asamaan fee, niifaarin xa qoor axe ten. Xam singit njeeƈ ne eel too o nqool onqe cooxitkatee a qoolaand um.

⁸ Xam niifaarin qoolandir ke na asamaan fop yaam wo soo picit xa niɓaan axe took saax le wo. Mi o Yaal oxe na refkaa boo faw layun.

⁹ Xam fuuxnoor xeeñ no qeet mayu, yaa um ɓisiidkaa o njakad onqe wo me den na saax akaa and’eeroona.

¹⁰ Xam ɓek qeet mayu no jaq yaam wo, soo maad we den a ndaprapnaa yaam wo, yaa um yetinkaa laƥ ne mi mbaambir den. Xan a sendaa na waxtu fuu refna, oxuu refna a talaa o ñis um, na bes fee o yenkaa.

¹¹ Keeke layum, mi o Yaal oxe na refkaa boo faw: Laƥ ne no maad oxe Babilon xan a daawong.

¹² Xam maafit xeet fa mayaan fee laƥ ne no xiixire we moƴna o soxod no qeet ke. Xan a ngef ka’atinoor ke Misira, soo we ngenna teen fop a saŋkel.

¹³ Xam war cegel ke ten fop denda fo poofi maak ke. O jaf no kiin fiiqilkee a den, xa poxos axe no cegel ke mbiiqilkee a den.

¹⁴ Maaga, xam riimand poofi ke den soo xayin xa quluɓ axe den nen diwliin. Mi o Yaal oxe na refkaa boo faw layun.

¹⁵ Yaa um fi’kaa saax le Misira o mbiñ o mbootu, soo ta waltel boo qac, yaa um xawkaa fop we ngenna teen, xan da and ee mi refu o Yaal oxe.

¹⁶ Keene refu a ƭomatax ale, too xan a gimeel. Mboƥ ndoog ne no qeet ke xan a ngimaa a ƭomatax aleene. Xan a ngimanan a Misira fo wiin mayu we ngenna teen. Mi o Yaal oxe na refkaa boo faw layun.»

Ƭomatax ne took qeet ke maafeena

¹⁷ No hiid xarɓaxay fo o hiid o ɗikandeer ole a cinj ye i ƥiseena took o hup doole, no ñaal xarɓaxay fo ñaal ƥetkandeer ne no nqool onqe, o Yaal oxe a daawnaxam fa lay um na xa ƭelem axene:

¹⁸ «Wo fee o ƥiy no kiin, feri a kim a mboy took wiin mayu we ngenna Misira, fudni a den, den fo qeet cegu doole ke kam jaaniif, da yoon fo we na mbudooxaa kam gamb le na saŋkax ale.

¹⁹ Xar moƴanto lakas we? Fudooxi too wondoox fo a qucooxar ake,

²⁰ a ndeer we laƥ ne a fandna. Laƥ a cooxte. Maƥeenoo fo wiin um fop.

²¹ A salma-koor a cegu doole ke xan a lay fo ten a ndeer jaaniif, ten fo we ƈufgooguuna. A mbudooxa, a mbondoox, a qucooxar ake laƥ a fandna.

²² Asuur oo xeene fo a yaj um fop soo poy ke den a mbidin. Den fop kaa ndibel, we laƥ ne a maafna.

²³ Poy ke den owey no xooɗ-ee-xooɗ le kam gamb le na saŋkax ale, soo a yaj ake ten a mbid o kurul-keƥ a mboy ale ten. Den fop kaa ndibel, laƥ ne a maaf a den, den we oroogna diid le took lanq ke no ñoow we.

²⁴ Elam oo xeene fo a yaj um fop, a wid a mboy um. Den fop kaa ndibel, laƥ ne a maaf a den. A mbudooxa no xooɗ-ee-xooɗ le no lanq ke, den we oroogna diid le took lanq ke no ñoow we, too a ndoxondooxa gaci den fo we mbudooxna kam gamb le na saŋkax ale.

²⁵ Njong um a sipe ndeer no we mbareena, ten fo a yaj um fop, soo poy ke ten a ndeerin. A qucooxar akeene fop a ngodte laƥ ne, yaam kaa ndiidlandoogu lanq ke no ñoow we, too a ndoxondooxa gaci den fo we mbudooxna kam gamb le na saŋkax ale. A ndoone a ndeer no we mbareena.

²⁶ Mesek, Tubal fo a yaj den fop oo weene soo poy den a mbid a den. A qucooxar akeene fop a mbandte laƥ yaam kaa oroogu diid took lanq ke no ñoow we.

²⁷ A qucooxar akeene ngasaand me na salma-koor ake. A salma-koor akeene a nqaada jaaniif fo ƥonax qire’ir den, a ngakandnel laƥ den, soo pegoor den a ndoonel took xa kiiƈ den, yaam a salma-koor ake kaa ndiidlandoogu lanq ke no ñoow we.

²⁸ Wo koy, woxey duguñe ndeer a qucooxar ake, wondoox fo we laƥ ne a fandna.

²⁹ Edoom oo xeene fo maad um fo gelwaar um fop, andoona yee ke da ndefna ndef a salma-koor fop oo, a payande fo we laƥ a fandna, a mbondoox fo a qucooxar ake fo we nqaadna jaaniif.

³⁰ Gelwaar we no ɓemb-roog o janoon fop oo weene fo Siisidoŋ we fop mbudooxandoorna fo we mbareena, a sed ɓot, ke ngiin-goor den a diidlandoogna fop oo. A qucooxar akeene a mbondooxa fo we laƥ a fandna, too a ndoxondooxa gaci den fo we mbudooxna kam gamb le na saŋkax ale.

³¹ Firawon fee xan a ga a den too xan a yaaloox na yaj aleene. Firawon fee fo xiixire um fop xan laƥ a fand a den. Mi o Yaal oxe na refkaa boo faw layun.

³² Kaam xaƴ’un ta diidlandaa lanq ke no ñoow we, ndaa ten oo xeene a wondne a ndeer a qucooxar ake, we laƥ a fandna, ten Firawon fee fo a yaj um fop. Mi o Yaal oxe na refkaa boo faw layun.»