Heseki’el 25 - NQAARIIT NE ROOG

Ke yegniteena no Aa-amon we

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, geleerooxi farna fo Aa-amon we too jo’tanaam a den!

³ Fat o lay Aa-amon we yee: Nan-gilooxyo fa lay fee no Yaal oxe na refkaa boo faw! Keeke o Yaal oxe na refkaa boo faw a layu: Feek kaa o jalaa Mbind tedu ne mi maasandeena fo o fiisel ole Isra’el fiitneena fo mbind Isra’el ne ƥiseena gilaa saax took o hup doole,

⁴ mi itam xam ɓoxotong qeet ke no batand. Xan a sip a ndeer of saŋe den, a ngeenin a ndeer of kenand den. Den na ñaamkaa xa tim axe wo, a yer fo sis ole wo.

⁵ Xam supit teeru fee Raba o yisand keeleemb, saax le no Aa-amon we um fi’in ged paal. Maaga, xan nu and ee mi refu o Yaal oxe.»

⁶ Keeke o Yaal oxe na refkaa boo faw a layu: «Feek kaa o fox, fecoox soo felakinoox, doon teen xeef a Isra’el tigi kam ee kam of,

⁷ ten taxu xan o ɓay es a dal took of, um ɓoxotong a saax ake, ndax da mbalit o jeg of fop, suudong a ndeer qeet ke soo moocandong a ndeer a saax ake. Xam saŋkong too xan o and ee mi refu o Yaal oxe.»

Ke yegniteena no Moomowaab we

⁸ Keeke o Yaal oxe na refkaa boo faw a layu: «Feek Mowaab fa Seyiir kaa lay ee: ‹Mbind Yudaa leng kut oo fo qeet lakas ke›,

⁹ ten taxu, xam wet o fiisel ole Mowaab boo na xa ŋat axe ten, gef teeru keeke ndefna qaaƴoor no saax le: Bet-Yesimot, Baal-Me’on fa Kiryatayim.

¹⁰ Wetanaanum qeet ke no batand na songiidaa Aa-amon we, cooxin a den da njegkin, ndax Aa-amon we mbetandooxkataand a ndeer qeet ke.

¹¹ Xam fadin kate es took Mowaab, too xan a and ee mi refu o Yaal oxe.»

Ke yegniteena no Ee-edoom we

¹² Keeke o Yaal oxe na refkaa boo faw a layu: «Yaam a pi a tabdinoor ake Edoom a soobooxna took mbind Yudaa, feek kaa gadin a xoox um tooñ ye ta rabdinooxna,

¹³ ten taxu keeke layum, mi o Yaal oxe na refkaa boo faw: Xan o ɓay es a dal took Edoom, um suud teen wiin we fo cegel ke. Xam gefin no ke xotitna Temaan boo Dedaan soo laƥ a ñaam a den.

¹⁴ Xam rabdinoox took Edoom na pexey o ɓay ole Isra’el fee xeet es. Xan a mbesoor deŋ fa Edoom nen fuux es fo ngañak es. Xan a andir fo ndabdinax es. Mi o Yaal oxe na refkaa boo faw layun.»

Ke yegniteena no Fiifilista we

¹⁵ Keeke o Yaal oxe na refkaa boo faw a layu: «Feek Fiifilista we kaa njimboox no ndabdinax, a ndabdinoox, a ndoon teen a nqeef a Isra’el kam ee kam a qeeñ den, ndax da yaqin kam ngañak den ne refna kili,

¹⁶ ten taxu keeke layum, mi o Yaal oxe na refkaa boo faw: Xan o ɓay es a dal took no Fiifilista we, um moocand Keekeret weene soo saŋik we yoqna na ƥeeraamb ale no maag ole.

¹⁷ Ndabdinax es fo a qaw es xan a ƭom tigi took den, too yaa da ndalkaa a den, xan da and ee mi refu o Yaal oxe.»