Heseki’el 15 - NQAARIIT NE ROOGNdaxar biiñ ne jooreena kam fiɗel le 1 O Yaal oxe a daawnaxam fa lay um na xa ƭelem axene: 2 «Wo fee o ƥiy no kiin, xar o juuƭ ndaxar biiñ ole a huptu o juuƭ o lakas oluu refna? Xar a refu no par ole refna ndeer taxar ke no suungaan le? 3 Ndax xan o juuƭ ndaxar biiñ a xotel, a jaltel tig? Ndax xan a fi’tel a pagal ndax o ƥaxañ a ɗagel teen? 4 Kaa umbeel na fiɗel le na raaɓkan. Fiɗel le kaa doxaa cat ƭik ke, soo a ndeer ale a dox. Ndax xan a faaxat o jaltel tig? 5 Neene, ye ta refaa o muum jaltoogaand tig, moƴtaa sax koy ye fiɗel le a raaɓuuna boo ta dox. Ndax xan a waagel o jaltat tig? 6 Yaaga koy, keeke o Yaal oxe na refkaa boo faw a layu: Nen o juuƭ ndaxar biiñ ole ndeer taxar ke no suungaan le, nen o juuƭ olene ɓoxotuuma fiɗel le ndax ta raaɓin, neene um ɓoxotitkaa we ngenna Yeerusaleem. 7 Xam inooxan a den. A sutoora na fiɗel le, ndaa fiɗel xan a raaɓ a den. Maaga, xan nu and ee mi refu o Yaal oxe, yaa um inooxankaa a den. 8 Xam fi saax le a refat o mbiñ o mbootu yaam ngore’aƭar den. Mi o Yaal oxe na refkaa boo faw layun.» |
Copyright © 2015-2023 by Eglise luthérienne du Sénégal
Eglise luthérienne du Sénégal