Galati 2 - NQAARIIT NE ROOG

Pool fo apootar lakas we

¹ Cinj xa kiid xarɓaxay fo xa kiid xa nahaq, dakooxaam o nomtoox Yeerusaleem, yoon fa Barnabaas fa Tiit,

² yaam Roog a feeñooxaam, a heblaam a ñaaƈ aleene. Ye retuuma, wootaam fo aa-adax we soo lal a den Yegil mbaax ne um waare’aa kam we ndefeerna Yaawuur, ndax jalkiim mbaat ta ref ee kaam jal calel cegee xoox.

³ Tiit fee reeƭna fa mi, too a ref o Keegeres sax ser’aand nquc.

⁴ A jeg’a koy waa ƥerexoogna a ndeer in, too ndeeƭee gimu. Weene o mat mbug’u o nqucnoor a Tiit. Kaa ƥerex a ndeer in ndax da ngoroox o daaw ole i njeg’ina na Kiristaa Yeesu. Kaa mbug’u o ƥakand a in no mbaƭ ne kebil ke a ndalinna,

⁵ ndaa i ci’ee a den ñootand leng, too i nqoxa ke da ngebloogna, ndax nu mbaag o ndam Yegil mbaax ndigil ne.

⁶ We ndeeƭna aa-adax we – ne ta foogit’eena yaaga too kaaga haaliraam, yaam Roog naagee o samtaa – wiin waaga ƥaat’iraam yiif dara.

⁷ A nga’a sax ee kaam doxnel Yegil mbaax ne, ndax um waare’in we nqucooxeerna yaam Roog, ta ref we ndefeerna Yaawuur, ne Piyeer fa xoox um a doxniteena o ten yaam we nqucooxna, ta ref Yaawuur we.

⁸ Roog fa leng kut fee xiirna a Piyeer ta refat apootar a ndeer we nqucooxna, xiiraxam um refatin itam a ndeer we nqucooxeerna.

⁹ Ye Saak fa Kefaas fee refna ref Piyeer fa Saŋ we mbi’eena a toodook no mbokatax ne no gimu we a nga’na yirmande fee ci’eema, a nqaariitoora fa in, mi fa Barnabaas, ndax i nqot farna fo we ndefeerna Yaawuur, soo den, da nqot farna fo we nqucooxna.

¹⁰ A maƭooxa a in sax ee i mbara o mbetandoox rool we, too kaaga o mat, topatoox’aanum yaaga.

Pool a damra fa Piyeer

¹¹ Ye Kefaas a garna Ancook koy, faambraam fo ten, xasanin, yaam dam’ee na ƭat.

¹² Ye we inoortiid’ina maa Saak a mbadiid’afuleerna, Kefaas kaa ñaamoogu fo gimu we ndefeerna Yaawuur, ndaa yaa da mbadiidna mbadiid rek, ta dalfoox o naag kuraac a sayoox, yaam ndik we sertoogna nquc a layin tig.

¹³ Yaawuur gimu we itam a ndalfooxa o singooxaa, boo Barnabaas sax a rokaa no yememaar ne den.

¹⁴ Ye ga’uuma yee njagnee no Yegil mbaax ndigil ne, dalfooxaam o lay a Kefaas mbaambir no fop ee: «Wo fee refna o Yaawuur, too naagiro o ñoowtaa nen o Yaawuur, xar taxu o seraa we ndefeerna Yaawuur, da mbi nen Yaawuur we?»

Yaawuur oo refee Yaawuur oo, na pexey o ngim a mucitkaa

¹⁵ In, Yaawuur ndimu a in, too i nqalaatoogee yee baabakaad i ndefu nen we ndefeerna Yaawuur.

¹⁶ Kaa koy, i anda yee o leng ɗeetkaand nen o cofu mbaambir Roog, yaam ne ta fi’aa ke kebil ke a layna, ndaa yaam ne ta gimna na Yeesu Kiristaa. In sax, i ngima na Kiristaa Yeesu, ndax Roog a ɗeet a in nen jofu. Keene koy, refee yee yaam ne i mbi’aa ke kebil ke a layna, ndaa yaam ne i ngimna na Kiristaa, yaam i anda yee o leng ɗeetkaand nen o cofu yaam ne ta fi’aa ke kebil ke a layna.

¹⁷ Ndiiki koy, o nanangaa in Yaawuur, i mbaaƭaa o ƭeetel nen jofu mbaambir Roog na Kiristaa, kaa i ndeeƭu baabakaad nen waa ndefeerna Yaawuur. Yaaga koy, ndax Kiristaa kaa saqtandaa bakaad? Ha’aa, muk!

¹⁸ Bo um maxatinaa ke yaq’uuma no reef a Roog na pexey kebil ke, yaaga o and ee mi fa xoox es, o ƭaaɗap a ƭat refum.

¹⁹ No ke jofna no kebil ke koy, kaam nand nen o qon oxaa andoona yee kebil ke sax mbarun, ndax um waag o ñoowan a Roog. Rengandooreem na kurwaa fa Kiristaa.

²⁰ Refatee yee mi na ñoowaa, ndaa Kiristaa na ñoowaa na mi. Kaam ee um naagangaa o xuƥaa ndiiki sax oo, no ngim no Ƥeenqe Roog um ñoowaa, ten fee fexaxama boo a ɓoxot o ñis um yaam mi.

²¹ Fañkiim yirmande fee Roog, yaam a reeƭangaa yee o kiin a waaga ɗeetel nen o cofu mbaambir Roog yaam ne ta fi’aa ke kebil ke a layna, Kiristaa dey’ee o xon.