1 Timote 2 - NQAARIIT NE ROOG

A saƭakinax na qeƭ

¹ Mexe eet o heblaa fop boog, da nqeɗaa, a nqeɗooxaa, a nqeɗanaa lakas we itam, a ngidmaa a Roog yaam wiin we fop.

² Fat a mbi’anan maad we fo fop we ndefna wiin maak waa mbarna o niwel, ndax i mbaag o ñoowaa o ñoow o lewu na jam fa jam, ndeefaa a Roog, too ñak ƥanjel.

³ Keene a faaxa, too a fela a Roog fee o Muumucil in.

⁴ Ten fa xoox um a buga wiin we fop a muc, too a andat ndigil ne.

⁵ Yaam Roog fa leng soom jegu. A jega itam o ndok-a-ndeer o leng kut onqaa refna a ndeer wiin we fa Roog. Ten refu Kiristaa Yeesu o kiin oxe,

⁶ wuusna o ñis um, ndax ta wat a in, in fop. Neene, ye hap fee a fadna, a cooxta seede yee Roog a buga wiin we fop a muc.

⁷ Ten taxu itam, um doonel o baawaare fo apootar – ndigil kak um layaa, too maaɓiim no dara – kaam doxnel o jangnaa we ndefeerna Yaawuur, ke refna o ngim fo ndigil.

⁸ Yaaga boog, kaam bug boo goor we a nqeɗaa muu da ndefna ndef, da ndekaa xa ƥay xa qoolu, too a mbaas fuux fo a qalaat a paaxeer.

⁹ Kaam bug itam rew we a ndokooraa naa warna, a njeg teen jom fo kaa da mbootooxna, a mbañ o misiiraa kaa jofna no maar cafeñu mbaat wurus mbaat xa peme mbaat toki mosu kaa da nga’atinooraa.

¹⁰ Kaa koy, fat a tokax den a ref a pi a paax, ne rew waa na ndagooxaa a Roog a mbarna o nand.

¹¹ A ndefangaa na cang kam mbokatax ne no gimu we, fat rew we a naang cel, a nan-giloox a cangin ale, too a njaɓan ke da njangneel.

¹² Ci’iim o tew ta jangin mbaat ta hup o koor sañ-sañ. Kaa war o tiimaa rek.

¹³ Aadama kaa eet’el o sak, soo Awa a doonooxkaa.

¹⁴ Refee itam ee Aadama nax’e. O tew oxe o mat a reeƭu, too ten nanaƭar’u a Roog.

¹⁵ Kaa koy, xan a muc na pexey o ƥiy onqe reefandteena no ten. Yaqanee koy, a wara o saƭik no ngim onqe, a yelef, a saq o mbeq, a gen no tedel.