1 Sami’el 7 - NQAARIIT NE ROOG

¹ Maaga, wiin we Kiryat-Ye’arim a nqotiidaan, a ƥisin no mbind Abinadab fee sinj’ina took ñaang, soo da nqot o ƥeem Eleyasaar, a ndodin ndax ta yetooxaa arka ne no Yaal oxe.

Sami’el a adooxana Ii-isra’el we, da nqaw Fiifilista we

² A cinj ye arka ne no ngiɓoor ne a ɓiseena Kiryat-Ye’arim, a pe a mayu a ndoonooxa taaga, xa kiid qarɓeen ƭik xa muum. Maaga, Ii-isra’el we a iinoogata, a mbug o matiid o Yaal oxe.

³ Naaga, Sami’el a laya Ii-isra’el we fop ee: «A soƥangaa yee fo a qeeñ nuun fop nu nomtoortiidaa me no Yaal oxe, ndeɓyo roog can ke nu mbaɗooxaa fo xa taaƴ axe Astarte, soo ndam no Yaal oxe fo a qeeñ nuun fop too mbaɗooxan ten doŋ. Neene, xan a mucil a nuun na xa ƥay no Fiifilista we.»

⁴ Naaga, Ii-isra’el we a ndeɓa xa taaƴ axe Baal fo axe Astarte da mbi’’ina roog den, a mbaɗooxataa o Yaal oxe doŋ.

⁵ Sami’el a laya a den ee: «Fat nuun xeet fee Isra’el fop, nu mbokatoor Mispa, too xam xeɗan a nuun o Yaal oxe.»

⁶ A mbokatoora Mispa, a ƈeew foofi, a ƥaxin mbaambir no Yaal oxe soo a ngoor ñaal naaga fop. Maaga a laytu yee: «I tooña o Yaal oxe!» Maaga Sami’el a hate’toogu itam we ndaawroogna na xeet fee.

⁷ Ye Fiifilista we a yegna yee Ii-isra’el we kaa mbokatoor’u Mispa, gelwaar we fo xiixire den a ndeta, ndax da ñoxor fo Ii-isra’el we. Ye Ii-isra’el we a yegna kaaga, caƭar maak a dama a den.

⁸ Ii-isra’el we a laya a Sami’el ee: «Ba o xaƴ a in rek tiimaa, xeɗooxani a in o Yaal oxe Roog in, ndax ta mucil a in na xa ƥay no Fiifilista we.»

⁹ Sami’el a janga o njuk mbaal onqaa roɓafuleerna, a ɓoxotin o Yaal oxe ne ta fodeena fop, ta ref sadax fa ndoxel. Cinj kaaga, a xeɗooxana Ii-isra’el we me no Yaal oxe, too o Yaal oxe a jaɓa a qeƭ um.

¹⁰ Ye Sami’el a ɓoxotaa sadax fa ndoxel fee, Fiifilista we kaa ƥeroogu, ndax da song Ii-isra’el we. No ñaal naaga, o Yaal oxe a fangna ƭuuɗ njegu doole naa firɓandna Fiifilista we fop, too Ii-isra’el we a nqawa a den.

¹¹ Xiixire we no Ii-isra’el we a sutoora Mispa, a ndaxaa Fiifilista we, a mbaraa a den boo kaltaa Bet-Kaar.

¹² Sami’el a janga ɓil, a sipin ndeer Mispa fa Seen, a ne’in Eben-Eseer ee: «Boo fa ndiik o Yaal oxe kaa ƴufgaa a in.»

¹³ Neene Fiifilista we a ndaarooxtu boo saɗatee o ndak no fiisel ole Isra’el. O Yaal oxe a toroxandtooga a den katil um boo neen Sami’el a xonu,

¹⁴ too Ii-isra’el we a njangatina teeru ke Fiifilista we a njaɓit’ina na den: A xotit Ekron boo a damik Gaat fo me widna a den fop. Ii-isra’el we a njaɓatina a den na xa ƥay no Fiifilista we. Jam a jeg’a koy a ndeer Isra’el fo Aa-amori we.

¹⁵ Sami’el a ɗoxooga a Isra’el boo neen a xonu.

¹⁶ O hiid oluu refna, Sami’el a widooga, a xotit Betel boo Gilgal, a gar Mispa, a hate’aa we na ndaawraa na xeet fee Isra’el no fo mbiñ neene.

¹⁷ Cinj kaaga, a gatooga Rama, me mbind um a reeƭna. Maaga a ɗoxtoogu xeet fee Isra’el, a maxan maaga o Yaal oxe o sadaxand.