1 Sami’el 5 - NQAARIIT NE ROOG

Arka ne Roog me no Fiifilista we

¹ Ye Fiifilista we a njaɓitna arka ne Roog Eben-Eseer, a ƥisaan Asdod.

² A njanga arka ne Roog, a ƥekin no juurand ole Dagon da mbi’’ina roog den, a ndendandin fo o daaƴ ole ten.

³ No feet olaa ƥiiɓ teel, ye wiin we ngenna Asdod a yokooxna, a soƥa o daaƴ ole Dagon a yen ƭaasin mbaambir arka ne no Yaal oxe. A inaan, a nomtin me ta reeƭna.

⁴ No feet olaa ƥiiɓ teel, wiin waa a yokooxa, a ngarahin, a soƥ Dagon a yenahin ƭaasin mbaambir arka ne no Yaal oxe. Xoox le Dagon fo xa ƥay axe fop kaa ƭeg’u, a ndef no peg ne no don-maax ole, ta yoqɗat o fimb ole doŋ.

⁵ Ten taxu a koom boo fa ndiik, saasadax we Dagon fo fop we na ngaraa no juurand olaaga kam Asdod kaa ƈakandooxaa peg naaga.

⁶ O Yaal oxe a moƴa o lalit katil um no Aa-asdod we, a ɓisiid o njakad me den. A xawta a den xa tul, den oo we mbidna a den oo.

⁷ Ye wiin we Asdod a nga’na ke dalna a den fop, a laya yee: «I mbugatee arka ne Roog fee Isra’el a yoq me in, yaam katil fee ten a dala took in fo took Dagon fee roog in.»

⁸ A nqoyna gelwaar we no Fiifilista we fop, a laamit a den ee: «Nam i mbi’kaa arka ne Roog fee Isra’el?» A ndoona a den ee: «Ƥiseenoo Gaat.» Naaga, arka naa a ɓise Gaat.

⁹ A cinj ye da ƥisuuna maaga, o Yaal oxe a lalta katil fa maak fee ten no wiin we na teeru faaga, too a jega combol-combol maak. A xawta wiin we na teeru faaga fop xa tul, a xotit no we moƴna o neew boo no maak we.

¹⁰ Naaga, a lulta arka ne Roog Ekron. Ye arka ne a rokna kam Ekron, wiin we ngenna maaga fop a mbuuqa, a lay ee: «A ƥisiida a in arka ne Roog fee Isra’el, ndax ta saŋik a in, in fop.»

¹¹ Den itam a nqoyna gelwaar we no Fiifilista waa, a mbokat a den, a lay a den ee: «Yaxatikyo arka ne Roog fee Isra’el maa ta jegeena mbaat xan i saŋkoox in fop.» Teeru faa fop kaa ndiidoogu o nqon, yaam ne Roog a lalit’ina katil fa maak fee ten.

¹² We nqon’eerna no wiin we ngen’ina maaga fop, kaa njeg’u xa tul, too xa iin axe na teeru fee a njaaƥatilooxa boo maa Roog.