1 Sami’el 10 - NQAARIIT NE ROOG

¹ Maaga, Sami’el a janga o moon diwliin, a juurin took xoox le Sawul. A farakooxaan, a layin ee: «O Yaal oxe fa xoox um ɗuumong, ndax o kelfa xeet fee ta jegoodna.

² A cinj yaa o inoorkaa me mi xaye, xan o soƥ goor ɗik paam a mboy alaa Rakel, no ŋat olaa Bensame refna Selsax. Xan a layong ee: ‹Xa paam xa tew axe waaƭik’oona a mbeeña boo njaaxɗandatee a faap of, ndaa nuun a jambatataa boo a laamtooxaa yee: Xar warum o fi, ndax um ga o ƥees?›

³ O inoorangaa maaga, ret boo goƭ, no ngariñ naa refna Taboor, xan o xet maaga fo goor daduk waa na ndetaa Betel mbaambir Roog, o leng oxe a saq fo mbambe fo ndaduk, o ƭikandeer oxe puuru tadik, soo o tadkandeer oxe a saq mboxos biiñ.

⁴ Xan da simnong soo a ci’ong puuru ƭik kaa o jangkaa.

⁵ Cinj kaaga, xan o fad no ñaang laa Roog refna Gibe’a maa o yetooxand ole no Fiifilista we a refna. Boo o rokkaa kam teeru faa, xan o xet fo a yaj no duleer Roog waa na mbudoortiidaa no jul ole no ñaang sadaxand laa, too o nqilimb, ñal, a liit fo riiti a adooxan a den, da yenaa leer.

⁶ Yiif le Roog xan a rokong itam, o yenaa leer nen a den, refat o koor o lakas.

⁷ Xa anddiloor axeene fop a mbadnooxangaa, fat o fadin ke na refkaa calel of, yaam Roog oxey fa wo.

⁸ Cinj kaaga, fat o adookaam Gilgal. Neene, xam soƥiidong maaga, ndax um ɓoxot sadax toxel fo sadax camsa’oor. Fat o cungaam maaga boo ñaal ɓetuu ƭik. Um garangaa, xam andnoorong ke waroona o fi.»

⁹ Yaa Sawul a fesna a Sami’el a cinj rek ndax ta ret, Roog a supta xeeñ um, too xa anddiloor axaaga fop a mbadnooxa no ñaal leng kut naaga.

¹⁰ Yaa da mbadiidna Gibe’a, a nqeta fo a yaj no duleer Roog. Na waxtu faaga, Yiif le Roog a fudooxa took Sawul, ta yenaa leer a ndeer den.

¹¹ Ye we and’ina a Sawul yaaga a nga’uuna ta yoon fo duleer we, a yenaa leer nen a den, a laamtirooga a ndeer den ee: «Ndi xar damu o ƥiy onqe Kiis? Ndax Sawul itam no duleer we Roog a fogu?»

¹² O leng na den oxaa reeƭna maaga a doona fo a ƭelem akene yee: «Ndi an kelfa’u den?» No kaa xotitna maaga a jega o feƭit olaa na layeel ee: «Ndax Sawul itam no duleer we Roog a fogu?»

¹³ Ye Sawul a riimna, a reta no jul olaa no ñaang sadaxand laa.

¹⁴ Faap o ndeɓ Sawul a laamta a Sawul fo o tag oxe ten ee: «Mam nu ndet’u?» Sawul a doonaan ee: «Kaa i mbaaƭik’u xa paam xa tew axe, ndaa ye i nga’eerna a den sen, i ndet maa Sami’el.»

¹⁵ Faap o ndeɓ Sawul a layaan ee: «Layangaam ke Sami’el a layna a nuun.»

¹⁶ Sawul a doona a faap o ndeɓ um ee: «A andnoora a in ee xa paam axaa a mbeeña.» Kaa koy, lay’iran dara no kaa farna no maat ne Sami’el a lay’uuna.

Sawul a jile o maad na pexey mbanjang ne

¹⁷ Sami’el a xoya Ii-isra’el we fop Mispa mbaambir no Yaal oxe,

¹⁸ a lay a den ee: «Keeke o Yaal oxe Roog fee Isra’el a layu: ‹Mi refu oxe sutitna a nuun Misira, nuun xeet fee Isra’el, wat a nuun na xa ƥay no Miimisira we fo na xa ƥay no maat lakas ke toroxandoogna a nuun.›

¹⁹ Ndiiki koy, nuun oo weene ndeɓa a Roog nuun fee mucilna a nuun no taamaala ke fo no naqad ke nuun, soo lay ee: ‹Dalnani a in o maad!› Yaaga koy, fat a carind ake fop fo a qaw den fop a ndalit mbaambir no Yaal oxe ne da ndeepatiritna.»

²⁰ Sami’el a simta a carind ake Isra’el fop a matiid. A banjanga, too a yena na carind ale Bensame.

²¹ Sami’el a simta a qaw aluu refna na carind ale Bensame a matiid. A banjanga, too a yena na qaw ale Matiri. Cinj kaaga, a banjangahina, ta yen na Sawul fee o ƥiy Kiis. Sawul a waaƭe, ndaa ga’aand.

²² A laamtahina o Yaal oxe yee: «Ndax o kiin oxene a gara mene?» O Yaal oxe a doona a den ee: «Oxey me ta ɗasna kam tig oo tig ke.»

²³ A ndalfooxa o ƈuf, a suttiidin maaga, ta sog o gar a ndeer xeet fee. Den fop, ten hup’u a den geel.

²⁴ Sami’el a laya xeet faa fop ee: «Nu nga’a oxe o Yaal oxe a jilna. Ne xeet fee a fodeena fop, jegee o leng oxaa nandna fo ten.» A ndalfooxa o soroxole, a mbuuq ee: «Yaasam o maad oxe a ñoow!»

²⁵ Maaga, Sami’el a limana xeet fee ke helna o maad oxe soo a bind a den no safe, a doonin kam o mbiñ o tedu nqe mbaambir no Yaal oxe. Cinj kaaga, a nomta xeet faa, oxuu refna no mbind um.

²⁶ Sawul itam a xaada Gibe’a no mbind den, a yoon fo wiin maak we Roog a duq’ina a qeeñ den.

²⁷ A jeg’a koy wiin jaree tus waa layoogna yee: «Nam o mbindeef onqene a waagkaa o muclit a in?» A ndefa no ŋañan soo a mbañin o mbi’an ɗang leng.