1 Korint 13 - NQAARIIT NE ROOG

O mbeq

¹ Mi fa xoox es sax, boo andoona yee kaam ci’’el o waag o lay fo lak no wiin fa fee no malaaka ke, um fexangee lakas we, kaam nandkoogu nen a qiin alaa na ƭawƭawnaa soom.

² Boo andoona itam ee waag’aam o jo’tan a Roog, and kunpa fuu refna, jeg o and oluu refna, kaam ee boo jeg’uuma o ngim onqaa waagna o jiƭit xa coong axe sax, um fexangee lakas we, refkoogiim tus boo tus a fag.

³ Waag’aam o lasit ke jeguuma fop itam, ndax rool we a njeg kaa da ñaamna boo um fakooxaa, ndaa um jegangee o mbeq, keene fop ɗaxkoogee dara.

⁴ O mbeq kaa muñ, a may fo o paaxel, naagee o siisaa, ga’atinooxee, magnandooxee.

⁵ O mbeq rokkee no qoolaƭaru, naagee o gindaa ke faaxna no ten soom, naagee o xaadooxaa, naagee o geekaa o njaaku kam.

⁶ Kaam ee njofaƭar ɓekkiran no sawar, cofu kañ na cooxan o ɗaay.

⁷ Kaa waasantaa fop, a gim fop, a yaakaar fop, a muñ fop.

⁸ O mbeq sooƴkee muk. O jo’tanaa a Roog koy xan a faaf, lak ke a sooƴ, o and ee mes,

⁹ yaam a seek a leng rek i andaa, too a seek a leng i njo’tanaa a Roog.

¹⁰ Boo ke deyna sik a garna koy, xan ke deyeerna a mooc.

¹¹ Ye um refaa o njaaƈ, kaam laytoogu nen o njaaƈ, xalaattaa nen o njaaƈ, saq a yiifooƭ no njaaƈ, ndaa ye maakuuma, naagaam buc ndeƥandoong.

¹² Ke i nga’aa ndiiki, kaa nand nen no ɗeendoor i nga’aa, xoolee qac, ndaa a koom xan i njasnoor fo xe i ƈookna no ɗeendoor ole. Xaye, a seek a leng rek um ga’aa, ndaa na bes faaga, xam and ne Roog a andtaxama.

¹³ Yaaga koy, tig tadik kene rek saƭku, too den na yoqkaa, ta ref o ngim fo yaakaar fo o mbeq, ndaa ke moƴna o magin no tadik keene refu o mbeq.