1 Korint 12 - NQAARIIT NE ROOG

Ke Yiif le Roog a ci’taa

¹ Fog es, bugiim dara a mo a nuun no ke Yiif le Roog a ci’taa.

² Nu anda yee, ye nu ndefaa yeefar, kaa nu ndeɓoox’u no pangool ke, mbaɗooxaa a den, den we mbaageerna fa lay.

³ Ten taxu, um bug o lay ee: Oxuu na laytaa Yiif le Roog, waagee o lay ee: «Yeesu a salooxe!» Neene itam, o leng waagee o lay ee: «Yeesu refu o Yaal oxe!», yaa Yiif le Roog a riñeeruuna teen.

⁴ Ci’it ke a maya, too mbogree, ndaa Yiif leng kut le na ci’taa a den.

⁵ A tagoorooƭ ale a maya, too fogree, ndaa o Yaal oxe, o leng kut oo.

⁶ Ke na fi’eel a maya, ndaa Roog fa leng kut fee na fi’aa fop no fop.

⁷ Oxuu refna koy, kaa danqel no ke Yiif le Roog a ci’taa, a reefandel no ke jeganna mbokatax ne no gimu we fop o njiriiñ.

⁸ Kaa oxeeke a danqel ɗelem o and na pexey Yiif le Roog, oxaana ɗelem o jeg-yiif,

⁹ o lakas a danqel o ngim. Keene fop koy, Yiif leng kut le na ci’tan. A jega itam oxaa ci’eena a waag o wodand jiru na pexey Yiif leng le,

¹⁰ soo oxene a ci’el a waag o fi comlaand, oxeeke a jo’tanaa a Roog, oxeeke a waag o jektirand a yiif ake, oxaana a waag o lay lak-yiif, o lakas a waag o lapatoox lak keene.

¹¹ Keene fop koy, Yiif leng kut le Roog na fi’an, oxuu refna ta danqin ci’it um ne ta bugtuuna.

Mayu, no njer leng

¹² Nen cer ke, neene we ngimna na Kiristaa a nandu: Njer leng kut ne yoo, ndaa kaa xaajoox, a ref kene xa ƥay, keeke nof, keeke a kid, fo lakas fo lakas…

¹³ In fop, no Yiif leng kut le i mbatiise’e, ndax i mbog, ndefat njer leng kut na Kiristaa, ta ref o Yaawuur mbaat o tefee o Yaawuur, o paɗ mbaat jaambuur. In fop, no Yiif leng le i yerne.

¹⁴ Njer refee a seek a leng kut, a seek a mayu yoo.

¹⁵ Ii, neene koy a caf ale a moof’angaa boo bes, ta lay ee: «Feek refiim o ɓay, fogiim no cer ke», ndax ñak o ref o ɓay a sutaan no cer ke?

¹⁶ Mbaat nof ne a lay’angaa yee: «Feek refiim a ngid, fogiim no cer ke», ndax ñak o ref a ngid a waaga tax fogkee no cer ke?

¹⁷ Ha’aa, yaam cer ke fop a tapoor’angaa, a ndef a ngid, mam fa nan a refkoogu? A reeƭangaa nof ƥor, mam tuñ a mbugkoogu o ndeefaa?

¹⁸ Kaa Roog a doon tig oo tig no cer ke maa feluuna.

¹⁹ Fop a fokatoor’angaa a ref a seek a leng, mam cer ke a ndefkoogu?

²⁰ Mee ndax a seek a mayu mbokatooru, a ndef njer leng kut.

²¹ A ngid ale waagee o lay o ɓay ole yee: «Soxla’iroong!» Mbaat xoox le lay a caf ake yee: «Soxla’iim a nuun!»

²² Ke nandna a in nen ke moƴna o hees no cer in sax, a jega o njiriiñ,

²³ too ke i ƭeetaa no cer in nen kaa deyaandeena o niw sax, a mbare o niw tigi. Neene o mat a gartu boo ke haal’aandeena no cer ke a moƴatel o haal,

²⁴ soo ke deyeena o haal, soxla’katiran. Kaa Roog a sak cer ke, a saktin naa andoona yee ke deyeerna o niwel a deyataan,

²⁵ ndax nqaajoor jegkee no cer ke. A seek aluu refna no ke fokatoorna, a ref njer leng kut ne, a topatooxaa o kend um.

²⁶ Boo leng teen a ɗomeel, fop na ƭomeel nen o ten, too boo leng teen a tedlandeena, yoq we fop na sawaraa nen o ten.

²⁷ Neene nu ndeftu cer ke Kiristaa, oxuu refna a ref teen a seek.

²⁸ Kam o fog ole no gimu we Roog kaa eet o dalin apootar we, we na njo’tanaa a Roog a ndeef, jaajangin we a ndoonoox, soo cinj kaaga, we ci’eena a mbaag o mbi comlaand, cinj weene we mbaagna o mbodand, soo we mbaagna o ƈufig a ngar fo we mbaagna o adooxan lakas we fo we na layaa lak-yiif.

²⁹ Ndiiki koy, kaam bug o laamit a nuun keeke: Ndax fop mbokatooru a ndef apootar mbaat waa na njo’tanaa a Roog mbaat jaajangin? Kaam ee ndax fop ci’e a mbaag o mbi comlaand

³⁰ mbaat a mbaag o mbodand jiru mbaat da layaa lak-yiif mbaat da lapatooxaa lak keene?

³¹ Ndiirooxyo ci’it ke moƴna. Ndiiki koy, bugaam o lal a nuun a ƭat ale moƴna.