HINI UWASI-BIADRCIMOWA ya-sfadoci MAFIYO 27 - Hini Uwasi-u-Biadrcimowa 1929

¹ Huwa, iah whrpvgi, jrivhki nihi ugimrwi mkvtaukul-viahi chena nihi u gigi-lane-mwvhi nihki lanvwaki u tapuwr-lakuhi Jesise wvhsi nabowa-nagi si bona-kuci :

² chena u gjepila-kuhi, macimi ud rmwala-kuhi, chena u tah pvgfana-kuhi Brlvdeli inv kvpanvli.

³ Hina uwa Jotvse, inv mviasdru-hrtv nili, iah namagi yasi myrlvhkuwr-fulici, mvtveni si taha weiv, macimi patagi u tasi watv-wvhi nihi ugimrwi mkvtaukulviahi chena gigi-lanihi nili nfwr-pitvgi baxkvhki wrpi-muni,

⁴ Ni mvci-lvwi yasi mahci masdru-doiv fvfv-yrgi msqi, isiwa. Pvyaqv nihki, Nahiwa ini nelvwa si? gelv ini ma-maginr-pvtvnu, u takuhi.

⁵ Macimi svhgigi ini ufapi-kvmiqi u tah becfa pvgidrnv nili baxkvhki wrpi-muni, chena ini uci srwa; macimi wapfa chena u Irpicido-weiv.

⁶ Chena nihki ugimrwi mkvtaukulv-yaki u mvma-nrwv nili bax-kvhki wrpi-muni, chena Mvtv mvyrwvtwi ku-taladewa-nagi wvhsi ini munigr-nagi si bono-daki nili, xvga ini msqi yala-lamakugi nili, iwvki.

⁷ Chena tapuwaki, macimi nili uci tapanr-nrwv ini ya-sisgi-wvkkun-gatv u gitikv, wvh-tvh laku-nr-wrci goqa-nafhi.

⁸ Yoni-uci ini gitikv, Ini msqi si gitikv sidota, ivskv inugi grsagigi.

⁹ Hina uwa uqrufadota ini yasi kv-lvwigi srpwi Calamriv inv mrmosiges-qatv, Macimi u mvma-nrwv nili nfwrpitvgi baxkvhki wrpi-mnui, ini yala-lamakufici inv ini ya-lvgimo-futv, nili ya-lvgimr-wrci nihki nr-nakuti ut vpaluhfa-mhi Iswelv,

¹⁰ macimi nihki meli-waki nili vsuwa ini ya-sisgi-wvkkun-gatv u gitikv, yasfatv-wrci inv Dabalamiwatv, iupi.

¹¹ Huwa nepvwi Jesise ya-lvhfv-melici nili kvpanvleli : chena inv kvpanvli u nvtuhtv-wrli, Hv nihki Josvki ugimr-mwvli gelv? u talrli. Gi taiu gelv, u talrli Jesise.

¹² Chena iah cvhtvwrci-makuci nihi ugimrwi mkvtaukulviahi chena gigi-lanihi, mvtv wiahi rpvfsa.

¹³ Hina Brlvde, Hv mvtv gi notv gelv yasi maci wiahi nihki cvhtvwrci-mahki? u talrli.

¹⁴ Macimi mvtv u melrli rpvfsa-wa, mvtv muhci nakuti kvlvwewa : waciganvhi inv kvpanvli ulrmi mvivci-taha.

¹⁵ Huwa ini tvh wihfanci-gagi inv kvpanvli u br-pvgfanvmv-wvhi nihi mahsa-lalici nakuti geganigr-fvli, yonv yasi taha-wrci nihki.

¹⁶ Chena u bonr-wrli ina giginoda-lamaku-feli geganigr-fvli, Pvlapvse yr-lofoli.

¹⁷ Hina waciganvhi iah mrwv-tusgr-lici, Brlvde, Drnvwa yonv ki tasi tahapwv wvh pvg-fanvmo-lvku? hv Pvlapvse walr tuga Jesise inv Klvisde yr-lofutv? u ta-lvhi.

¹⁸ Xvga u wrkutv yasi vhbaladewa uci nihi biadr-kuci nili.

¹⁹ Chena ia-haiahi ini tapuwawi-vhpvbewa-nagi lamvtv-pici, wewvli biaci wrwen-gali, Tagi wiahi bonvnu wv ipanv-lvci inv tapvsvwi-lani : xvga ni mahci vhqinv maci wiahi vhpuwawa-nagi inugi grsa-gigi, u tagoli.

²⁰ Huwa nihki ugimrwi mkvtaukulv-yaki chena nihki gigi-laneki u kulapgrmr-wvhi nihi mahsa-lalici wvhsi nihki nvtumr-wrci Pvlapvseli, macimi mvci-lutvwr-wrci Jesiseli.

²¹ Pvyaqv inv kvpanvli rpvfsa macimi, Drnvwa inv nih-ki neswi yonv ki tasi tahapwv wvh’ pvgfanvmo-lvku? u talvhi. Macimi Pvlapvse iwvki nihki.

²² Nahiwa uwa na ipanvlv Jesise inv Klvisde yr-lofutv? u talvhi Brlvde. Welrni wi hrsitaf-hofu, iwvki jrivhki nihki.

²³ Macimi, Gociwa, nahiwa ma-jrfigi si mahci lvwi inv? isiwa. Pvyaqv nihki vnhiwa-wvhotv-moki, Welrni wi hrsitaf-hofu, lvhotv-moki.

²⁴ Waciganvhi iah namagi Brlvde yasi brmaci grjekv tvtv-wrn-gawa pami pvfaqe-yrlici, u tah mvma napi, macimi gifi-lacv ya-lvhfv-melici nihi mahsa-lalici, Ni fvfvyr-gifi ini u mskumi yrmv tapvsvwi-lani : gelvwv mamaginr-pvtv-muku, isiwa.

²⁵ Chena nihki jrivhki lanvwaki rpvf-saki, Welrni usgici neyrnv wi vdawi u mskumi macimi nit vpaluhfama-nrki, iwvki.

²⁶ Hina uwa nihi u pvgfanvmv-wvhi Pvlapvseli : wakv Jesiseli u lihfewvn-whrli macimi pvgfanv-mrga wvhsi rsitafhi-fulici.

²⁷ Hina uwa nihki u svmrkvna-mhi inv kvpanvli betiga ini Pla-dolivm’ u tasi walr-wrli Jesiseli, macimi jrivhki nihki nakudwa-lanv svmrkvnvki u mrwvskutvwr-wrli.

²⁸ Chena u svhsrgi-donr-wrli, macimi u betanigahr-wrli msqrwi mvgotv-goti.

²⁹ Chena nihki u tvpganr-nrwv ugimrwi-patvkhowa grwihi, macimi welagi u tah bonv-mvwr-wrli ini, chena mfvsqvlwi u mvyrwen-gigi; chena u jeqvnvhga-beki ya-lvhfv-melici, macimi u wrpvlrcimr-wrli, Hai, Ugimr-mwrli Josvki ! iwvki.

³⁰ Macimi u fe-faqrlr-wrli, chena u mvma-nrwv ini mfvsqvlwi macimi u cvci-nvlr-wrli welagi.

³¹ Chena iah mahci wr-pvlrchr-wrci nihki, u leginr-wrli ini mvgotv-goti, chena u beta-nigahr-wrli welv u betanikvnv, macimi ud rmwalr-wrli wvhsi rsi-tafwhr-wrci.

³² Chena yasi biaci luhfr-wrci nihki u mkvwr-wrli ilaneli, Svimvn’ si foli Srilene uci : nileni nihki u mvmelowih-kvwr-wrli wvhsi wedamaku-wrci, wvhsi manvwv’ hinv rmwatv-wrci nili ud rsi-tahfage-milici.

³³ Chena nihki iah bir-wrci ’n’tvsi Kvlgofa sidota, Ini ukv-nrtapigi, iahiugi ini,

³⁴ u melr-wrli wveni wvhsi manalici gi lag-fan wi wefwi : chena iah mahci kutvtvgi inv, mvtv wesv manwv.

³⁵ Chena iah mahci nihki rsitafwhr-wrci nili, pvpvh-fanvmr-deki ubetanikv-nilici, pami gisginikvni-tvlwr-deki;

³⁶ chena ’n’tvsi lamvtv-beki u gcitv-wrpvmr-wrli.

³⁷ Chena u tah bonr-nrwv nihki spama-fagi welagi uci inv u cvhtvwrcimo-fowa mahtv-wigrta, VLV-YRMV INV JESISE NILI UGIMR-MWRLI NIHKI JOSVKI, Ivwigrta.

³⁸ Hina ’n’tvsi vbeki weci rsitafho-foki nili neswi jekuniwah-feki, nakuti ini mvyrwen-gigi, chena nakuti ini nvmvjen-gigi.

³⁹ Chena nihki bamfacki u pagisgimr-wrli, u pami pvpvu-qahtvwr-wrli,

⁴⁰ macimi Gelv wvh lekvta-nvkv ini mvmr-tumawi-kvmiqi, macimi ini wv hupvta-nvkv nfuku, wrpvnas-dolu geiv : henv-wivna u Qihfvli Mvnatu, ini yr-sitahfagi uci qvsfrlu, u talr-wrli.

⁴¹ Heni-ivskv nahfrpi nihki ugimrwi mkvtaukulv-yaki u pami wrpvlrcimr-wrli nili gilagi nihki yr-ivwi-gacki chena gigi-laneki,

⁴² Hu wrpvnas-hvhi kutvkhi; weiv ud rlwi wrpvnastu. Henv-iu nili u Gimr-mvli Iswelv; welrni uwa ini yr-sitahfagi uci qvsfrta, macimi gah dapwahtv-wrpa-weiv.

⁴³ Hu mfala-mrli-iu Mvnadoli; welrni uwa nili pvgfana-kuta, skvtv la-lamrta nili : xvga Neiv inv u Qihfvli Mvnatu iwv-iu, u takuhi.

⁴⁴ Chena nihki jekuniwah-feki wa-weci rsitafho-fucki nili nahfrpi utpvgitvmvwr-wrli ini ivskvsi mvdrmadewa.

⁴⁵ Huwa ini mvwi-nakutwvh-fana yrtafvgi uci ’n’tvsi vhdawi ba-pagijrgi patvkufanwi malsga ini vsisgegi brlu’ hini mvwi-jr-kvtfana yrtafvgi.

⁴⁶ Chena nvwitu ini mvwi-jrkvtfana yrtafvgi ulrmvho-tvmwv Jesise, Elvi, Elvi, lrmv sapvgfanvi? Ni Mvna-domv, ni Mvnadomv, gociwa gi pvgida-lami? hiwv galv ini.

⁴⁷ Chena nrlatv nihki ’n’tvsi na-nepvwicki, iah notvmu-wrci ini, Yrmv ilani u nvtu-mrli Elvicvli, iwvki.

⁴⁸ Macimi walanv nakuti nihki ma-maqi, chena u mvmrli gcikvme-wvtuwvli, macimi uqikvm-hrli nili psgibrpu, chena mfvsqvlugi u tah bonrli nili, macimi u tah melr-li Jesiseli wvhsi mana-lici.

⁴⁹ Chena nihki mvisi nrlatv, Welrni; wrpvmrdrku qahqi Elvicv wah biawv wvhsi wrpvnas-hrci, iwvki.

⁵⁰ Chena nuhgi ulrmvho-tvmwv Jesise, macimi u pvgfa-nrli u cvjrlvh-qvli.

⁵¹ Macimi wrpvtv-muku, ini Irpici-mutv ini mvmrtumawi-kv-miqi uci neswa-lanv si pvhfahkv ini spamagi uci brlu’ hini svh-gigi; chena ini vsisgi nomaskv; chena nihki sekunvki pvpvhfah-grki;

⁵² macimi nili nabowr-lvku tvwa-nota; chena maci u weyrn-wvhi nihki wa-fapa-ficki mviahci rgicfrcki nabrwa unsgrno-fuhi;

⁵³ macimi pami biaci luhfahi nili nabowr-lvku uci yasi mahci rpafe-wi-unsgrwa-nici nihki utdr-nrwv ini ufapi udawa macimi u tapinr-kufih-tvwr-wvhi maci.

⁵⁴ Huwa inv kvpdenv, chena nihki weci nili bami gcitvwrpv-mrcki Jesiseli, iah namu-wrci ini vsisgi-nomas-grwa macimi nili wiahi ya-ipanvdo-daki, vnhiwawi kupanaki, Dabwawa yrmv nileni u Qihfvli Mvnatu, iwvki.

⁵⁵ Chena maci iqaki ’n’tvsi paluwihi uci pami ilrpvmr-wrli, nihi mviahci Galale uci nakvla-kuci Jesise, u pami mesvmr-kuhi :

⁵⁶ alagenv nihi Male Magi-talenv, chena nili u giwrli u qifhi Sapade.

⁵⁷ Chena ia hulrqe-figi, ’n’tvsi biawv pvwawi ’lani Rlima-fia uci, Jose sinofu, nileni nahfrpi Jesise u kvgahgimrfvli :

⁵⁸ yrmv iiani Brlvdeli hawv, macimi nvtutv-mrga nili u weyr-nvli Jesise. Hina uwa Brlvde tapigamu nili wvhsi meli-wagi.

⁵⁹ Chena Jose u mvmrli nili weyr-nvli, macimi u ta hufapvta-nrli fvfvyrgi mvfrni-mudrgi,

⁶⁰ macimi u tah saxi-mrli nili betiga usginwi na-hvlwrkv welv nabowr-lvqi-mviahci ini sekunagi udrlvk-hvgi : chena u tah tatapa-nrli msi sekunvli sqrdagi ini nabowr-lvqi, macimi ini uci srwa.

⁶¹ Chena Male Magitalenv ’n’tvsi vpiwv, macimi inv kutvkv Male, pamv-beki vsuwa wvyatvhqa ini nabowa.

⁶² Huwa ini wvyrpvgi, ulrkusi ini Nvnvhewa si grsagigi, nihki ugimrwi mkvtaukulv-yaki chena nihki Palaseki Brlvdeli si mr-wvsgrki,

⁶³ Yalani-wivni, ni mkvwala-drpa yasi inv wa-nigamu, ia-haiahi gawvgi lanvwa-wici, Mahci nfukunv-giga na hunskv nuhgi iuci.

⁶⁴ Tapiga-mulu waciganvhi wvhsi ryeci gcitvwr-fegi brlu’ hini mvwi-nfukunv-giga, wvhsi bur gikvmoci u kvgahgimrfhi birlici chena gemiwalr-wrci nili, macimi Unskv inv nili na-palici uci, ilr-wrci lanvwahi : chena ini jaiahqi bemi-lvwewa vlikv wa hinwi notv ini nhihtv, isiwaki.

⁶⁵ Huwa Brlvde, Ki bonrwv gelvwv gr-gcitvwvh-dotv : nhrkuna, ini si ryeci-doku yasi gelvwv kvtvwelafi-yaqa, u talvhi nihi.

⁶⁶ Waciganvhi nhaki nihki, macimi ud ryeci-fado-nrwv ini nabowa, ud ryecsimr-wrli nili sekunvli, inv gahci-tvwvh-dotv pami weci nihi.