HINI UWASI-BIADRCIMOWA ya-sfadoci MAFIYO 25 - Hini Uwasi-u-Biadrcimowa 1929

¹ Hina uwa ini wafapvh-kvmigigi ugimrwi-drmqa brsi matvh-fwi sasgi-iqafvki wah si tvqa-lamaqvtwi, ma-mrcki u netvwrkv-nwvhi, macimi wapfaki u pvh nvxkvwr-wrli nili mvivgi nhrkvnvli.

² Chena nyrlvnwi nihki wvnihsvgr-wafeki, macimi nyrlvnwi laburwa-feki.

³ Xvga nihki wvnihsv-grki mvtv gilagi ud rmwado-nrwv pami iah mvmr-wrci u netvwrkv-nwvhi :

⁴ wakv nihki la-burcki ud rmwado-nrwv pami u bonvhfu-wvkuku-nwrki gilagi u netvwrkv-nwvhi.

⁵ Huwa ia-haiahi nrgr-felici nili mvivgi nhrkvnvli, nihki jrivhki kvtuqr-moki macimi nabaki.

⁶ Pvyaqv tvh lrwi-tapahgigi ’n’tvsi-mupi, Wrpvmahku, inv mvivgi nhrkvnv ! Birku gelvwv pvh nvxkv-wah-ku iupi.

⁷ Hina uwa nahga jrivhki sasgi-iqafvki unsgrki, macimi u nhakulr-wvhi u netvwrkv-nwvhi.

⁸ Chena nihki wvnihsv-grki, Meli-nrga ki pami-mwv; xvga ni netvwrkv-nanrki wesv vhfoki, u talr-wvhi nihi la-burlici.

⁹ Pvyaqv nihki la-burcki rpvf-saki, Bofi manvwvh’ mvtv gikvmoci ivh dapvtwi nelvwa chena gelvwv : nhrkuna grjekv nihki mr myagicki, macimi tapanv-muku pasiqi gelvwv, isiwaki.

¹⁰ Chena ia haiah’ wapfa-wrci nihki wvhsi tapa-niga-wrci, inv mvivgi nhrkvnv biawv; macimi nihki mviahci nvnv-hecki u tah weclamr-wrli nili ini wechadewi wihfancigawa-nagi : macimi ini sqrta gibhota.

¹¹ Mviuhqrci biaki nahfrpi nihki nrlatv sasgi-iqafvki, Dabalamiwatv, Dabalamiwatv, tvwanv-mvwi-nrga, isi-waki.

¹² Pvyaqv inv rpvfsa macimi, Tapilo gi talapwv nelv, mvtv gi wrkuma-lapwv, u talvhi.

¹³ Gcitvwr-piku waciganvhi, xvga mvtv ki wrkudr-nrwv ini grsagigi gelvwv nuhgi ini yrtafvgi mvtv.

¹⁴ Xvga brsi galv inwi ilani, kutvgi vsisgegi ya-wesv hrci, u wihku-mvhi nahvlwrkv ut vlolrgrfhi, macimi u tah pvgfa-nvmv-wvhi nihi u wiahe-mi.

¹⁵ Chena nakuti nyrlvnwi talani-wvli u melrli, kutvkvli nakuti neswi, nuhgi kutvkvli nakuti; mosv tfwi nakuti yatfwa-lanv-wvgiki u kvtvwelafewanv; chena inv wapfa ya-lr-meci.

¹⁶ Walanv wapfa inv wa-tvhpanvkv nili nyrlvnwi talani-wvli macimi rsoniga nili, macimi kutvkvli u macdonv nyrlvnwi talani-wvli.

¹⁷ Hinv ini-ivskv nahfrpi wa-tvhpanvkv nili neswi u kvtv-wih-grnv kutvkvli neswi.

¹⁸ Wakv inv wa-tvhpanvkv ini nakuti wapfa chena wrlga ini vsisgegi, u gigitu u muna-milici dabalama-kuci.

¹⁹ Huwa mviuhqrci galu lrqv inv dabala-mrtv naha vlolrgrfhi biawv, chena u pami vgitvhfo-mvhi nihi.

²⁰ Chena inv wa-tvhpanvkv nili nyrlvnwi talani-wvli biawv macimi u biadonv kutvkvli myr-lvnwi talani-wvli, Dabalamiwatv, gi pvgfanv-mvwi nyrlvnwi talani-wvli : sci, naiahkv ni kvtvwih-grnv nyrlvnwi kutvkvli talani-wvli, isiswa.

²¹ G’uwasi Ivwi cahi, uwasi macimi tapvsvwi vlolrgrfv : gi mahci tapvsvwafi lrkufwe-mahi wiahi, maci wiahi gah tvlwvh-fala nelv : becfrlu gelv ini uwasi-labwrwa-nagi dabala-mahkv, u tagoli dabalama-kuci.

²² Chena nahfrpi inv wa-tvhpanvkv nili neswi talani-wvli biawv, Dabalamiwatv, gi pvgfanv-mvwi neswi talani-wvli : sci, naiahkv ni kvtvwih-grnv neswi kutvkvli talani-wvli, isiwa.

²³ G’uwasi Ivwi cahi, uwasi macimi tapvsvwi vlolrgrfv; gi mahci tapvsvwafi Irkufwe-mahi wiahi, maci wiahi gah tvlwvh-fala nelv : becfrlu gelv ini uwasi-labwrwa-nagi dabala-mahkv, u tagoli dabalama-kuci.

²⁴ Chena inv nahfrpi wa-tvhpanvkv ini nakuti talani biawv, Dabalamiwatv, gi wrku-mala gelv yasi gesanrci-lani-wivni, gi pami kvwvsqhrwa tvh bur gelv vhciga-ivni, macimi gi pami mrwv-tu-niga tvh bur gelv Ifwa-pvgidrwa-ivni;

²⁵ chena ni kupana, macimi ni wapfa chena ni gigitu vsisgegi gi talani-mi : sci, gi bonv ini nahvlwrkv gelv, isiwa.

²⁶ Pvyaqv rpvf-sali daba-lama-kuci macimi, Gelv wa-nrtafi macimi mvyalvwr-tafi vlolrkv, gi wrkutv yrsi kvwvsqhr-waiv tvh bur nelv vhcigaiv macimi mrwvtunni-gaiv tvh bur nelv lfwa-pvgidr-waiv;

²⁷ waciganvhi naiahkv-iu nihki munigr-fvki gih si bonv ni muna-mi, macimi tvh biriv naiahkv ni hutvh-panv patagi nahvlwrkv nelv gilagi ini tvh sqeyrgi, u talrli nili.

²⁸ Mvmv-wahku waciganvhi ini talani, macimi melahku ini inv ma-tvhfwi ba-bonvkv.

²⁹ Xvga jrgi wiyafv ba-bonvkv wah melofu, macimi inv wah bonv mrlafewa : wakv inv buryr bonvkv, weginrqi ini ba-bonvgi wa huci mvmrqi.

³⁰ Macimi gelvwv ini frgici si luhfa-pvgi-lahku inv vlolrkv buryr mkvhfowa-fitv Ir papagicv : macimi ’n’tvsi wah pami wihfvqawani chena ini wah tvlwawah-fanu wepitvli, isiwa.

³¹ Pvyaqv ina inv u Qihfvli ilani wah biawv u wvhfrci-maku-fewa-nagi, chena jrivhki nihki ancvleki weci nili, hina uwa wa ipvpi ini ugimrwi vhpvbewa u wvhfrci-makufewa uci :

³² macimi ya-lvhfv-melici nili wah mrwvtuskv jrivhki nili u tfwalowanv lanvwa : chena inv wah nuhbia-nvhi nakuti uci nakuti, yrsi inv gahcitvwv-hrtv nuhbianrci nihi magefhi nihi mrsi-magef hi uci;

³³ macimi nihi magefhi u mvyrwen-gigi wah si lamvtvp-hvhi, wakv nihi myrsi-magefhi ini nvmvjen-gigi.

³⁴ Hina uwa inv Ugimv wa hilvhi nihi u mvyrwen-gigi, Birku, gelvwv ga-gisrdala-mrci n’Uhfv, lrpi u welrmiku ini ugimrwi-drmqa mviahcfadofu-yaqa ina mahtvhgah-fanwi ini ya-lakuqvh-kvmigigi uci :

³⁵ xvga ni sqrlvwa, macimi gelvwv ki melipwv wvh meciv; ni kvhkvlrmu, macimi gelvwv ki melipwv ma-nowa; ni goqa-nafiwi, macimi gelvwv ki betiga-nipwv;

³⁶ ni svh-srgitwi, macimi gelvwv ki betaniga-hipwv; nit vhqi-luga, macimi gelvwv ki nvu-hipwv; giphudewa-nagi nit vpi, macimi gelvwv ki bia-lutv-wipwv, wa hilvhi.

³⁷ Hina uwa nihki ma-yrwela-ficki wa hrpv-ftvwr-wrli, Dabalamiwatv, drniwa lrqv ki nvu-lapa gi sqrlvwa, macimi kit svma-lapa? walr gi kvhkvlrmu, macimi ki mela-lapa mano-wa?

³⁸ Chena drniwa lrqv ki nvu-lapa gi goqa-nafiwi, macimi ki betigana-lapa? walr gi svhsrgitwi, macimi ki betanigaha-lapa.

³⁹ Chena drniwa lrqv ki nvu-lapa git vhqi-luga, walr gi giphu, macimi ki nvuha-lapa? wa hisiwaki.

⁴⁰ Macimi inv Ugimv wa hrpvfsa chena, Tapilo gi talapwv nelv, xvga yasi ini panv-laqa nakuti iuh-kumv ni janinrki, weginrqi iuhkumv gahci-macilo-ficki, nelv ini kit panv-sipwv, wa hilvhi.

⁴¹ Hina uwa nahfrpi wa hilvhi nihi ini u nvmvjen-gigi, Nelv uci srwaku, gelvwv pvhtvhgr-fvki, ini hrku goqa-lrqvsi skuta mviahc-fado-fuci inv mvci-mvnatu macimi ut ancvle-mhi :

⁴² xvga ni sqrlvwa, macimi gelvwv mvtv ki me-lipwv wvh meciv; ni kvhkvlrmu, macimi glvwv mvtv ki me-pwv manowa;

⁴³ ni goqa-nafiwi, macimi gelvwv mvtv ki betiga-nipwv; ni svhsrgitwi, macimi gelvwv mvtv ki betaniga-hipwv; nit vhqi-luga, chena ni gip-hu, macimi gelvwv mvtv ki nvu-hipwv, iva hilvhi.

⁴⁴ Hina nahfrpi nihki wa hrpvf-saki, Dabalamiwatv, drniwa lrqv ki nvu-lapa gi sqr-lvwa, walr gi kvhkvlrmu, walr gi goqa-nafiwi, walr gi svhsrgitwi, walr git vhqi-luga, walr gi giphu, macimi mvtv ki gisrci-panvla-lapa? wa hisiwaki.

⁴⁵ Hina inv wa hrpvftv-wvhi nihi, Tapilo gi talapwv nelv, xvga yasi bur gelvwv ini panv-laqa nakuti iuhkumv gci-macilo-ficki, mvtv ini kit panv-sipwv nelv; wa hilvhi.

⁴⁶ Chena iuhkumv goqa-lrqvsi vludrfewa-nagi wa haki : wakv nihki ma-yrwela-ficki goqa-lrqvsi lanvwawewa-nagi wa haki.