HINI UWASI-BIADRCIMOWA ya-sfadoci MAFIYO 19 - Hini Uwasi-u-Biadrcimowa 1929

¹ Chena ini biamikvtwi ina Jesise iah mahci lutvgi yolumv kvlvwewanv, Galale uci wapfa, macimi sqriv Cudia si biawv vlikv ini Jrtane;

² chena maci mahsa-lalici u nakvla-kuhi; macimi u gega-hvhi ’n’tvsi.

³ Chena ’n’tvsi utfa-kuhi Palasihi, u pami kutvhkuwr-lakuhi, Hv ini mvyrwvtwi kutaladewa-nagi wvhsi ilani pgah-whrci wewv-li jrgi wiahi uci? u takuhi.

⁴ Chena rpvfsa macimi, Hv mvtv ge-lvwv ki mah’ Irbrtudr-nrwv, yasi inv ma-machrtv nihi ina vlamvh-kvmikvtwi uci ilani chena iqawv u tas’ hvhi nihi,

⁵ macimi, Xvga yomv uci ilani wah nvkvlrli u fvli macimi u gali, chena wa hrye-dala-mrli wewvli; macimi nihki wah nakudefa-nili wivufi iwv? isi-wa.

⁶ Waciganvhi wvhsi bur gidani nihki neswi-wrci, wakv nakude-mahi wivufi. Wiahi waciganvhi Mvnatu mviahci tvqinvgi, tagi welrni ilani wi piginv, u talvhi.

⁷ Gociwa chena Mosise tapigamu wvhsi meli-wagi pgahudewi awigrdagi, chena wvhsi pgaho-fuci inv? u takuhi.

⁸ Mosise xvga sepafeiv ki tahiwv welrni ki tala-lamakuwv wvhsi pga-whaqa gewrki : wakv ina vlamvh-kvmikvtwi uci mvtv ini biaci inwi.

⁹ Macimi gi tala-pwv nelv, Goqa-nafv-grci wa pgah-whrli wewvli, waciwaphi wabaladewa uci, macimi kutvkvli wah wewi-nrli, mvci-lvwi wrpvsiphigawa : macimi inv wa-wewi-nrtv nili iah pgaho-fulici mvci-lvwi wrpvsiphigawa, u talvhi.

¹⁰ Qahqi yone lafe-mrta ilani wewvli, mvtv uwas-fanwi fvpv wvhsi wechatigi, u takuhi nihi kvgahgimrfhi.

¹¹ Pvyaqa, Mvtv jrivhki ilaneki u tvh kvtvwi utvhpanr-nrwv yomv iyowa, nihki wakv ini ma-melofucki, u talvhi.

¹² Xvga vbeki nrpahfa-moki, wacitv yone yasi negicki u giwvhi u lrmvdrkv-nilici uci : chena vbeki nrpahfa-moki, na-nrpahfamhr-wrci ilaneki : chena vbeki nrpahfa-moki, pasiqi na-nrpahfamdo-cki weyrwv xvga ini wafapvh-kvmigigi ugimrwi-drmqa uci. Hinv wiyafv ga-kvtvwi ilafitv wvhsi utvhpanvgi ini, welrni inv utvhpanvga ini.

¹³ Hina uwa ’n’tvsi biadrqi vpaluh-fafhi, wi husgici nihi si bonvgi u laci-wvli, macimi mvmrtu-maci : chena nihki kvgahgimrfvki u kutalr-wvhi nihi,

¹⁴ Pvyaqv Jesise Welrni la-lamahku nihki vpaluhfa-fvki, macimi tagi kutalahku nihki, wvhsi bialutvwi-wrci : xvga iuhgoni welvwv ini wafapvh-kvmigigi ugimrwi-drmqa, isiwa.

¹⁵ Chena usgici nihi ut bonrnv u laci-wvli, chena ini uci wapfa.

¹⁶ Chena wrpv-mahku, nakuti wiyafvli utfa-goli, macimi, Ga-gahgimiwatv, nahiwa wa-uwasrgi wiahi nah si lvwi, wvhsi manvwvh’ bonvmv goqa-lrqvsi lanvwawewa? u tagoli.

¹⁷ Chena, Gociwa nelv gi nvtuhtvwi ini wa-uwasrgi? nakutihi vpiwv inv wa-lafitv : pvyaqv wesv becfr-ivna ini lanvwawewa, gjetvwafilu nili tapigamowanv, u talrli nili.

¹⁸ Drniliwa? u talrli inv. Macimi Jesise, Tagi gelv ga nsiwa, Tagi gelv gah mvci-lvwi wrpvsiphigawa, Tagi gelv gah gimota, Tagi gelv gah nrnhrcimowi-jegin-gamu,

¹⁹ Hutvga-lami g’uhfv macimi gi giv; chena, Hvhqa-lami gelv mr-pvyacigrlahkv brsi nahvlwrkv geiv, u talrli nili.

²⁰ Jrivhki yolumv naiahkv ni gjetvwafi : nahiwa gawvgi ni notkufi? u tagoli Jesise nili mvyrni’laneli.

²¹ Wesv mafafi-ivna, nhrla, myagilu ba-bonv-mvni, macimi meli inv gitamrfv, chena gah bonv pvwrwa betiga wafapvh-kvmigigi : macimi birlu nakvsilu, u talrli Jesise.

²² Pvyaqv inv mvyrni’lani iah notvgi ini iyowa, wapfa mvci-lapwv; xvga inv nakuti mahsi bonvkv pvwrwanv.

²³ Chena Tapilo gi tala-pwv nelv, Gesanr-tatwi ini wvhsi bec-frci pvwawi ’lani ini wafapvh-kvmigigi ugimrwi-drmqa, u talvhi Jesise u kvgahgimrfhi.

²⁴ Chena gi tala-pwv nuhgi, Vlikv wacihi ini wahsi srbweci gamvli tv husgesaku-wigi srpunikv, notv pvwawi ’lani wvhsi becfrci ini ugimrwi-drmku-mi Mvnatu.

²⁵ Macimi nihki kvgahgimrfvki iah notvmu-wrci ini, vnhiwawi cihsi-tahaki, Nafvwa uwa wih kvtvwi wrpvnas-hofu? iwvki.

²⁶ Chena Oesise u tah wrpvmvhi, Welvwv ilaneki mvtvyaci-wvtwi yomv; wakv Mvnatu jrivhki wiahi kvtv-wvtwi, u talvhi nihi.

²⁷ Hina Betv rpvfsa macimi, Ci, ni nvkvdrpa nelvwv jrivhgi, chena ki nakvla-lapa; nahiwa uwa nah bonrpa? u talrli.

²⁸ Macimi Jesise, Tapilo gi tala-pwv nelv, gelvwv naiahkv na-nakvsi-yaqa, mi lrpi-lanvwawewa-nagi ina inv u Qihfvli ilani wa ipvpi ini u wvhfrci-makufewa uci ugimrwi-vhpvbewa, nahfrpi gelvwv ga ipvpi-nrwv matvhfwi-gita-neswi ugimrwi-vhpvbewanv, pamvh-kuwrlr-wrki nihki matvhfwi-gita-neswi u dwalo-wanhi Iswelv, u talvhi.

²⁹ Chena jrgi wiyafv mviahci nvkvtvkv wegiwr-pvli, walr ujaninrnvhi, walr utiqami-mvhi, walr ufimrli, walr ugali, walr vpalufhi, walr vsisgi-wvli, xvga ni wefowa uci, wa hutfaku tabawa-tfwagfanwi, macimi wah lrpsinwv goqa-lrqvsi ianvwawewa.

³⁰ Pvyaqv maci wa gci-udrnrgi-feki na-nhihdr-wicki; macimi na-nhihdr-wicki wa gci-udrnrgi-feki.