HINI UWASI-BIADRCIMOWA ya-sfadoci MAFIYO 17 - Hini Uwasi-u-Biadrcimowa 1929

¹ Chena nakutwvh-fukunv-giki vhkuwihi Jesise ud rmwa-lvhi Betvli, chena Jamseli, macimi u janinrli Jrneli, chena u ta kuqici-walvhi mospv-tanwi maqvhgigi nrnsihkv :

² macimi ya-lvhfv-melici via kutvgi-itwv; ya-lakuqr-baci wvhfafv-moiv brsi inv gesagi-gesfwv, chena u betanikv wvhkvnvgiv brsi ini wvivhfa-yrgi.

³ Chena wrpv-mahku, ’n’tvsi u tapinrqi utfakuhi Mosiseli chena Elvicvli bami kvlo-lakuci inv.

⁴ Chena Betv rpvfsa macimi, Dabalamiwatv, uwasv ini wvhsi gelvwa utvsi vpivqa : si taha-ivna, na husdonv utvsi nfwi rjewi-kvmiku; nakuti gelv, chena nakuti Mosise, chena nakuti Elvicv, u talrli Jesiseli.

⁵ Ia haiahi gawvgi pami kvlvwici, wrpvtv-muku, wvhfata brfqvhgi ut vwikv-nsgrku-nrwv : macimi sci, kvlvwa-wihsimowa ini brfqvhgi uci-faiv, Yrmv inv ivhqala-mvkv ni Qihfv, weyrgi inv ni manwi-taha; notvwahku gelvwv iyoiv.

⁶ Macimi nihki kvgahgimrfvki iah notvmu-wrci ini, mrsi ulamqi beqahsi-noki, chena lvkuqa wesrla-bwrki.

⁷ Ma-cimi Jesise biawv macimi u tah pahsa-nvhi chena, Pvfaqeku, tagi wesrla-bwrku, u talvhi.

⁸ Chena mr pami lrbeki, mvtv wiyafvli u nawr-wrli nihki, waciwaphi Jesiseli pahi.

⁹ Chena yasi pami biaci brlvcsinu-wrci ini maqvhgigi uci, Jesise u tapimvhi nihi, Tagi ini sinvmowa wetvmv-wahku ilani, brluhi inv u Qihfvli ilani nili na-palici uci unsgrta, u talvhi.

¹⁰ Chena u kvgahgimrfhi u nvtuhdr-kuhi, Gociwa chena nihki yr-ivwi-gacki yrwvki wvhsi Elvicv qelvhi nhihtv birci? u takuhi.

¹¹ Macimi rpvfsa, chena Svpkvhi Elvicv biawv, chena wah patagfatu jrivhki wiahi :

¹² pvyaqv gi tala-pwv nelv, yasi naiahkv birci Elvicv, macimi nihki mvtv u wrkumr-wrli nili, wakv goqa-nahi-grci yasi taha-wrci ut ipanvlr-wrli. Datapilvhi yone nahfrpi wah si vhqinvgi niheni uci inv u Qihfvli ilani, u talvhi.

¹³ Hina uwa nanuh-saki nihki kvgahgimrfvki yasi rtutvmrku-wrci Jrneli inv Fvfvhqi-ulalhiwanv.

¹⁴ Chena nihi Mahsa-lalici iah si birwrci, ’n’tvsi utfa-goli ilaneli, pami biaci u jeqv-nvhga-beli, macimi,

¹⁵ Dabalamiwatv, bonv-mvwi gitaminrqa-ladewa ni qihfv : xvga inv mr-mrtvkuskv, macimi mvmyanrni vhqi-nvmwv : mosvgi lrqv xvga ini skudagi yr-sfa, chena mosvgi ini napigi.

¹⁶ Chena ni biatv-wrki gi kvgahgimrfvki, macimi ud rlwi gegahr-wrli nihki, u tagoli.

¹⁷ Chena Jesise rpvfsa,

⁰ buryr dapwasawani macimi wa-nrtafitv sqewanv, drniwa lrqvsi gah weci vbemala-pwv? drniwa Irqvsi gah gihfah-whrcih-golapwv? biatv-wilu inv nelv, isiwa.

¹⁸ Chena Jesise u kutalrli nili; macimi inv wvninah-fi nili uci luhfa : chena gega-hofu inv sgilvwah-fefv ini yrtafvgi.

¹⁹ Hina nwa utfr-wrli Jesiseli nihki kvgahgimrfvki nrnsihkv, Gociwa nelvwa nid rlwi luhfa pvgilrpa inv? u talr-wrli.

²⁰ Xvga mrcqrfi ki dapwahsawa-nwv : tapilo gi tala-pwv nelv, Xvga bonv-maqa gelvwv dapwahsawa brsi nakuti paqa mvstvdewi menkv, Yoci vlvina hrla itv-maqa yomv maqvhgigi, macimi ini wa haiv; chena mvtv wiahi wah mvtvyaci-wvtwi geyrwrgi, u talvhi.

²² Chena Jesise, Hinv u Qihfvli ilani nili u laciwv ilaneki wah si pvgfa-nofu;

²³ macimi nihki wa nfr-wrli nili, chena ini mawi nfuku-nvgigi wa hunsgr-nofu, u talvhi nihi. Chena nihki vn-hiwawi mvci-labwrki.

²⁴ Chena Gabrnivme iah si bir-wrci, nihki wv-utvhpa-nvgiki ini pvhfi-sakvli muni utfr-wrli Betvli, chena Hv mvtv dr-taphiga ki kvgahgimr-mwv ini pvhfi-sakvli? u talr-wrli nili.

²⁵ Hvnkv, iwv inv. Chena nili wegiwr-pagi iah birlici, Jesise nhihtv u kvlo-lrli, Nahiwa gi tasi taha, Svimvn’? nihki ini usgi-drmqa uci ugimrki, nafhiwa u wv uci utfaku-nrwv ini taphigawa walr dax-hudewa? Hv u qihfwvhi, walr tuga goqa-nafhi? u talrli.

²⁶ Ma-cimi Jesise, Nihi goqa-nafhi uci, ia hiulici nili, Waciganvhi nihki uqihfi-mrki tabalatvma-feki.

²⁷ Pvyaqv, belabaga wvhsi utv-gikvh-sinu-wrci ki ipanv-lrpa nihki, nhrla ini msi-napigi, chena npvgitvnu kugrti, macimi mvmi inv nvmahfv nhihtv ma-musgifrtv; chena ina mahci drwvlu-nvta, ga mkv nakuti sakvli : mvmalu ini, chena meli nihki nelv macimi gelv uci, u talrli.