HINI UWASI-BIADRCIMOWA ya-sfadoci MAFIYO 10 - Hini Uwasi-u-Biadrcimowa 1929

¹ Chena u tah wihku-mvhi u kvgahgimrfhi matvhfwi-gita-neswi, macimi u melvhi nihi vliwi simakufewa notv wivgilah-fihi, wvhsi luhfa-pvgilr-wrci nihi, macimi wvhsi gega-hiwa-wrci jrivhgi si kvtunawa chena jrivhgi si vhqi-lugawa.

² Huwa nili u wefowa-nwv nihki matvhfwi-gita-neswi apvstv-leki vlv-yolumv : Hinv nhihtv, Svimvne, Betv yr-lofutv, macimi u ja-ninrli Andloli; Jamse nili u qihfvli Sapade, macimi u janinrli Jrneli;

³ Filvbe, chena Pvfvlvmiu; Drmuse, chena Mafiyo inv mrwvtuni-gahfi; Jamse nili u qihfvli Rlfivse, chena Fvtivse;

⁴ Svimvne inv Ganvnewi-lani, chena Jotvs’ Isgalade, nileni ma-masdrwi-makuci nah-frpi.

⁵ Iuhoni matvhfwi-gita-neswi Jesise u wrwe-nvhi, macimi u tapinvlaqi-mvhi nihi, Tagi nihki Nvnvhkvwi-laneki wvyaci hrku, macimi tagi uttvmv-wahku wiahsi ut udawa-nwv Samalivki :

⁶ wakv nhrkuna grjekv nihki wrnewi magefvki ini Iswelv ya-tfwigaci uci, isiwa.

⁷ Macimi yala-hr-yaqa, nvnvhimi-waku, Hini wafapvh-kvmigigi ugimrwi-drmqa uwa mrlrqvhi, isiwaku.

⁸ Gega-hahku nihki ya-qilu-gacki, hunsgr-nahku nihki na-pagiki, fvfvyrg-hahku nihki wasgilhvgama-gicki, luhfa-pvgi-lahku wvninah-feki : gi gisrcha-gopwv gelvwv, gisrci meli-waku.

⁹ Tagi mvmuku ufrwi-muni, walr tagi wrpi-muni, walr tagi ufrwv-kuqv ki muni-bedrkv-nwrgi;

¹⁰ mvtv via bedrkv-niku ya-lrme-yaqa, mvtv nuhgi neswi gode-wvli, walr mgifanv, walr rpvt-howa : xvga inv ba-kvtafitv nvhekv iqa-lamakufi u wihfanewa.

¹¹ Chena goqa-nahi si udawa walr udawa-nahi gelvwv ga hutdr-nrwv, nvtuna-huhku nafvwa ini betiga dapi la-lamakufi; macimi ’n’ tvsi vpiku br-luhi gelvwv wapfa-yaqa.

¹² Chena yasi becfr-yaqa ini wegiwv, usi-lvwrtv-muku ini.

¹³ Chena ini wegiwv dapi la-lamakufe-yrga, welrni ki grmrne-lafewa-nwv usgici wah si biaiv ini : wakv ini bur dapi la-lamaku-fe-yrga, welrni patagi gelvwv wi haiv ki grmrne-lafewa-nwv.

¹⁴ Chena goqa-nafv-grci mvtv ga hutvhpana-kuwv, walr mvtv u pafadrnv ki kvlvwewa-nwv, yasi luhfr-yaqa ini wegiwv walr ini udawa, ki fidwr-ki uci pvwvtanv-muku ini paqi.

¹⁵ Tapilo gi tala-pwv nelv, Hini wa hvliwi grgilwa-wafeiv ini Srtvmewi vsisgi macimi ini Kumrlvwi vsisgi ini tvh jaiahqvh-kuwawi gesagigi, notv yomv udawa.

¹⁶ Wrpvtv-muku, ni gi ta lasgo-lapwv brsi magefvki ini ala-mwhauhi : labur-wafiku waciganvhi brsi mvnadoki, macimi nvnvhbrje-lafiku brsi myrsi-pvwefvki.

¹⁷ Pvyaqv mvhgani ilaneki : xvga nihki tapuwawanv gah si pvgfa-naku-wrki, chena u msi-kvmiku-mwrgi gah lih-fewvn-huku-wrki nihki;

¹⁸ hvnkv macimi ya-lvhfvme-wrci kvpanvleki chena ugimrki gah si biala-gopwv xvga nelv uci, wvhsi xvga nihki dabwawa-ngr-wrci chena nihki Nvnvhkvwi-laneki.

¹⁹ Pvyaqv ina nih-ki masanal-wrqa, tagi wesrfeku wvh svi-yaqa walr wvh kvlvwi-yaqa : xvga ini gah mela-gopwv ina yrtafvgi wvh kvlvwi-yaqa.

²⁰ Xvga mvtv ini gelvwv ki kvlvwi-pwv, wakv nili u Cvjrlvhqvli k’Uhfwv kvlv-weli geyrwrgi.

²¹ Chena ujaninrnv wah si pvgfa-nrli ujaninrnvli iqinvmowa-nagi, macimi inv ufimv ut vpaluhfa-mvli : chena vpaluhfvki wah pvfaqic-fvtvwr-wvhi gahgirmhi, macimi ut ipanvlr-wvhi wvhsi iqi-nvmowa-nagi si bono-fulici.

²² Chena gah sega-lamakufe-maku-wrki jrivhki ilaneki xvga ni wefowa uci : pvyaqv inv nvhekv ya-iqi wesigi-tahatv, henv wah wrpvnas-hofu.

²³ Pvyaqv nihki ufrmhal-wrqa yomv udawa-nagi, lasi-muku ini mrlrqvhi kutvgi : xvga gi tala-pwv nelv, Mvtv ki tvh mahci srbwe-pwv nili ut udawanv Iswelv, brluhi inv bia-wv u Qihfvli ilani.

²⁴ Kvgahgimrfv mvtv vliwi ilafi ga-gahgima-kuci, walr mvtv vlolrkv vliwi dabalama-kuci.

²⁵ Dapi ini wvhsi inv kvgahgimrfv ilafici brsi ga-gahgima-kuci, macimi inv vlolrkv brsi dabala-makuci. Qahqi nihki Pialsipvli mahci sinrwrta nili ini uci wegiwv mastalali, drniwa si vlikv nihi ya-drlici uci !

²⁶ Tagi kufahku waciganvhi : xvga mvtv vhdawi wiahi patvghota, ivh bur ini pvhkvsanota; macimi gigidota, ivh bur ini wrkudota.

²⁷ Gelvwv wa-wetvmolvku ini lr papagicv, kvlvwiku ini lr wvivhfayrgi : macimi na-notvmaqa ini utvwvgrgi gelvwv, Jfwrtutvmuku usgici nili wegiwrpi vkucikvmi.

²⁸ Chena tagi kufahku nihki nr-nfrcki nili wivufi-weyr-nvli, pvyaqv rlwi kvtvwafeki wvhsi nfrwrci nili mvyrwi-weyrnvli : wakv kufahku grjekv inv da-dapi ilafitv wvhsi mvci-lutvwrci nayeswi mvyrwi-weyrnvli macimi wivufi-weyrnvli vhqinvmowa-nagi.

²⁹ Hv mvtv nakuti msqvkuqa si myagipi neswi udawani-wisgiluhfvki? macimi mvtv nakuti nihki ini usgi-drmqa wah si pansinwv frgici k’ Uhfwv :

³⁰ wakv tapilo nili gelahfwv jrivhki giginotvgita.

³¹ Tagi kusiwaku waciganvhi; vliwi ki ta lalamakufipwv gelvwv notv maci udawani-wis-giluhfvki.

³² Jrgi wiyafv waciganvhi nah muhgrci tabrci rcimaqv ya-lvhfvmewrci ilaneki, nahfrpi nelv inv nah muhgrci tabrci rcimv ya-lvhfvmeci n’ Uhfv wafapvh-kvmigigi ya-pitv.

³³ Wakv goqa-nafv-grci nah girci-maqv ya-lvhfvmewrci ilaneki, nahfrpi nah gircimv inv ya-lvhfvmeci n’ Uhfv wafapvh-kvmigigi ya-pitv.

³⁴ Tagi si tahaku yasi biriv wvhsi ini usgi-drmqa sfvdoiv grmr-nelafewa : mvtv ni bir wvhsi biaci fvdoiv grmrnelafewa, gisghikv wakv.

³⁵ Xvga ni bir wvhsi ilani pvgicihgrde-mrci u fvli Ivhgap-hvgi, chena inv udrnfimv nili u gali, macimi inv ufamimv nili wa-silamrci-iqali :

³⁶ macimi ilani u mvdaladewanhi wa hilafihi nahvlwrkv ya-drci uci.

³⁷ Hinv ya-vhqalamrtv ufimrli walr u gali vliwi notv nelv notqa-lamakufi neiv; macimi inv ya-vhqalamrtv uqihfimrli walr udrnfimrli vliwi notv nelv notqa-lamakufi neiv.

³⁸ Chena inv ba-bur mvmakv ud rsitahfagemi macimi ni nrwvlwi nakv-laqv, notqa-lamakufi neiv.

³⁹ Hinv ma-mkvkv u ta lanvwawewa wah wvntu ini; macimi inv wa-wvndotv u ta lanvwawewa nelv uci wa mkv ini.

⁴⁰ Hinv gelvwv wa-utvhpanalwrqa n’ utvhpanaqv nelv, macimi inv wa-utvhpanitv nelv utvhpanrli nili wa-wrwenilici.

⁴¹ Hinv wa-utvhpanrtv mrmosigesqalici ini u wefowa-nagi mrmosigesqatv wa hutfaku mrmosigesqatv u taphufewa : macimi inv wa-utvhpanrtv tapv-svwi ’laneli ini u wefowa-nagi tapvsvwi ’lani wa hutfaku tapvsvwi ’lani u taphufewa.

⁴² Chena goqa-nafv-grci wah melrli wvhsi manalici nakuti iuhumv macilofilici nakuti taphikv pahi tahkvgi napi, in u wefowa-nagi kvgahgimrfv, tapilo gi talapwv nelv, mvtv wa hinv wiahisi wvntu u taphufewa.