PA’PUDIAN 119 - Sura' Madatu

Kamala’biranna Sukaran alukNa Puang Matua 119:1-176

¹ Maupa’ tu mintu’ to malolo lalanna, sia to unturu’ mana’pa Sukaran alukNa PUANG.

² Maupa’ mintu’ to unnanna rara’i tu kasa’bianNa, sia to kalebu tallang penaanna undaka’ Puang.

³ Tu to tang umpogau’ duka kelok, sangadinna unturu’ mana’pa lalanNa Puang.

⁴ Mintu’ parentaMi Mipa’parentammo, kumua anna karitutui meloi tau.

⁵ Sangapaoi anna matontongan tu mintu’ tengkaku, unturu’ aluk mangka Mipondok.

⁶ Tae’ angku la kasirisan, ke kupalan ara’i tu mintu’ pepasanMi.

⁷ Ma’bulo lollongna’ la umpudiKomi, ke kupelada’i tu atoran maloloMi.

⁸ La kukaritutui tu apa Mipondok, da Mitampe tarru’na’.

⁹ Umba la nakua ungkaritutui gau’na tu to mangura anna masero? Iapi ke nakaritutui susitu kadamMi.

¹⁰ Kalebu tongan penaangku undaka’Komi, da Mieloranna’ pusa dio mai mintu’ pepasanMi.

¹¹ Iatu kadamMi kuanna rara’ lan batu ba’tengku, dikua da angku kasalan mati’ Kalemi.

¹² Kamumo sipatu dipudi, o PUANG; patuduna’ tu mai apa Mipondok.

¹³ Napa’peissanammo tongka’ dililaku tu mintu’ atoran ombo’ dio randan pudukMi.

¹⁴ Kuposende tu lalan kasa’biamMi, susina’ to umposende kasugiran.

¹⁵ La kutangnga’-tangnga’ tu mai parentaMi sia la Kupalan ara’ tu mintu’ lalanMi.

¹⁶ Kupoparannu tu apa Mipondok, sia tae’ angku la ungkalupai lenni tu kadamMi.

¹⁷ Pogau’i tu kameloan lako taumMi, angku tuo; kukaritutui mana’pai tu kadamMi.

¹⁸ Bungka’i tu matangku angku tiroi tu apa kalle-kalleanna lan sukaran alukMi.

¹⁹ Aku te to saena’ lan lino, da Mibunianna’ tu mintu’ pepasanMi.

²⁰ Bonnong tu penaangku, belanna tontong bang mamali’ lako atoramMi.

²¹ Miada’mo tu to matampo ditampakki ropu, tu pusa dio mai mintu’ pepasanMi.

²² Pa’dei tu attangan sia kamatunan dio mai kaleku, belanna kukaritutui tu mintu’ kasa’biamMi.

²³ Moi namarassan tu mai mintu’ tedong pariu’na tondok ma’kombongan la unneana’, apa iate taumMi mukkun untangnga’-tangnga’ aluk Mipondok.

²⁴ Mintu’ tu kasa’biamMi kuposende, sia iamoto ma’pakilalaku.

²⁵ Merrandanmo’ lako litak, patuona’ susitu kadamMi.

²⁶ Kuparampo nasangmo Mati’ tu diona torro ke’de’ku, amMi perangiimo’, patudumo’ tu mai apa Mipondok.

²⁷ Paissannina’ lalanna tu mai mintu’ parentaMi, angku tangnga’-tangnga’i tu mintu’ penggauran kalle-kalleamMi.

²⁸ Bonnong tu penaangku napobua’ rosso inaa, pabantangna’ susitu kadamMi.

²⁹ Patoyangi dio mai kaleku tu lalan kamo’rangan, sia kamaseina’ kapaissanan diona sukaran alukMi.

³⁰ Iamo kupilei tu lalan kamanapparan, sia mintu’ atoranMi kuallonni bang,

³¹ la’ka’ lakona’ kasa’biamMi, o PUANG, da Mieloranna’ kasirisan.

³² La kuturu’ tu lalan pepasanMi, belanna Mipamalosangmo tu penaangku.

³³ O, PUANG ada’ina’ tu lalan aluk Mipondok, angku karitutui landa’ lako ma’katampakanna.

³⁴ Benna’ tangnga’ kinaa, angku karitutui tu sukaran alukMi, sia angku kanannangi situang penaa kalebungku.

³⁵ Pate’tena’ unnola lalan pepasanMi, belanna iamo pa’poraiangku.

³⁶ Pamalang lakoi kasa’biamMi tu penaangku, sia da Mipalulakoi ianan bu’tu kadake.

³⁷ Patipero’i tu matangku, da anna ta’pai tu mai apa tang kebattuan. Sia patuona’ diona lalanMi.

³⁸ Pamanda’i tu pangallu’Mi lako taumMi, tu to matinuru’ ungkataku’Komi.

³⁹ Patoyangi dio mai kaleku tu kadilangdoan kukataku’, belanna maelo tu mintu’ atoramMi.

⁴⁰ Iatu penaangku ungkamali’ mintu’ parentaMi, patuona’ tete dio kamaloloamMi.

⁴¹ Sangapaoi anna rampoina’ kamasokanamMi, o PUANG, iamotu kasalamaran lu dio mai Kalemi, susitu Miallu’na.

⁴² Angku belai umpebalii tu to ullangdona’, belanna umposande’na’ kadamMi.

⁴³ Da Mipasisayuran tarru’i pudukku tu kada situru’ tonganna, belanna umposande’na’ mintu’ atoramMi,

⁴⁴ angku tontong untoe manda’ sukaran alukMi, landa’ sae lakona.

⁴⁵ Angku la lolang malona’, belanna undaka’na’ parentaMi.

⁴⁶ Sia tang masiri’na’ umpokada mintu’ kasa’biamMi dio olona mintu’ datu.

⁴⁷ Sia kuposande’ tu mintu’ pepasanMi, tu kupa’buda-budai.

⁴⁸ Iamoto angku mempala’ lako mintu’ pepasanMi tu kupa’buda-budai; sia kutangnga’-tangnga’ tu mintu apa Mipondok.

⁴⁹ Kilalai tu kadamMi lako te taumMi. Belanna Mibenmo’ kapa’rannuanan;

⁵⁰ iamote tu pa’pakatana lako kaleku lan kamandasangku, kumua napatuomo’ pangallu’Mi.

⁵¹ Lendu’ natelle-telleku to matampo, apa tae’ angku sepang dio mai sukaran alukMi.

⁵² Iake kukilalai tu atoramMi sangbara’ padang, matanami tu ba’tengku.

⁵³ Nakendekkina’ palla napobua’ tu mai to tang mekaaluk tu umboko’imo sukaran alukMi.

⁵⁴ Mintu’ tu apa Mipondok kuposengo, lan inan pempueangku.

⁵⁵ Iake bongi kukilalai bang tu sangamMi, o PUANG, sia kuallonni tu sukaran alukMi,

⁵⁶ Iamo kataanangku to, belanna kukaritutui tu parentaMi.

⁵⁷ Iatu PUANG iamo kataanangku, kuallu’mo la ungkaritutui kadamMi.

⁵⁸ Lantuk penaangku umpalaku pa’kamaseamMi, katuru-turuina’ susitu pangallu’Mi.

⁵⁹ Kutimbang-timbang tu diona lalanku, angku palulakoi mintu’ kasa’biamMi tu tengkaku.

⁶⁰ Madomi’na’ sia tang panandakanna’ unturu’i tu mintu’ pepasanMi.

⁶¹ Natekkemo’ poyana mintu’ to tang mekaaluk, apa tae’ angku kalupai tu sukaran alukMi.

⁶² Iake ma’tangngai bongi millikna’ umpudiKomi, belanna mintu’ atoran malambu’Mi.

⁶³ Akumo tu solana mintu’ to ungkataku’Komi, sia mintu’ to ungkaritutui parentaMi.

⁶⁴ O PUANG, iate lino naponnoi kamasokanamMi, ada’ina’ tu mai apa Mipondok.

⁶⁵ MangkamoKomi umpogau’ melo lako taumMi, o PUANG, sitinaya tu pangallu’Mi.

⁶⁶ Ada’ina’ kamatarrusan sia kapaissanan, belanna kukatappa’i tu mintu’ pepasanMi.

⁶⁷ Iatonna tang urrampoipa’ parri’, pusana’, apa totemo umpengkaolaimo’ kadamMi.

⁶⁸ Masokan tonganKomi, sia umpogau’Komi melo; ada’ina’ tu mai apa Mipondok.

⁶⁹ Napasussuimo’ kadake to matampo apa kukaritutui tu mintu’ parentaMi situang penaa lantukku.

⁷⁰ Babun tu tau iato mai butung to nakapu’ lompo tu penaanna, apa iatu aku te umposendena’ sukaran alukMi.

⁷¹ Melo duka sia angku mangkamo narua parri’, kumua angku ma’din umpelada’i tu mintu’ apa Mipondok.

⁷² Iatu atoran Sukaran aluk ombo’ dio randan pudukMi mandu maelo lako kaleku, anna iatu bulaan sia salaka massa’bu-sa’bu.

⁷³ LimamMimo tu ungkombongna’ sia umpatepuna’, benna’ kapaissanan angku issanni umpelada’i tu mai pepasanMi.

⁷⁴ Iatu mintu’ to ungkataku’Komi la sende untirona’, belanna kurannuan tu kadamMi.

⁷⁵ Kuissan, o PUANG, kumua mintu’ pangra’ta’Mi malolo nasang. Sia tete dio kamarurusamMi ammi pa’dikkimo’.

⁷⁶ Sangapaoi anna iatu kamasokanamMi kupomatana, susitu pangallu’Mi lako taumMi.

⁷⁷ Sangapaoi anna rampoina’ tu mintu’ mamaseMi angku tuo, belanna iatu sukaran alukMi iamo kuposendena.

⁷⁸ Da’ito anna kasirisan tu mintu’ to matampo, belanna tae’ bannangna nanii umpakario-riona’; apa iatu aku la untangnga’-tangnga’na’ mintu’ parentaMi.

⁷⁹ Sangapaoi anna lu lako kaleku tu mintu’ to ungkataku’Komi, iamotu to unnissan mintu’ kasa’biamMi.

⁸⁰ Sangapaoi anna kalebu tallang tu penaangku umpengkaolai mintu’ apa Mipondok, da angku kasirisan.

⁸¹ Mamali’ tungka tu penaangku lako kasalamaran dio mai Kalemi, sia urrannuanna’ kada pangallu’Mi.

⁸² Mata’ka’ tu matangku umpemanta pangallu’Mi, angku ma’kada: Piranra amMi la umpakatanana’?

⁸³ Moi susimo’ to bila ditapai, apa tae’ duka sia angku kalupai tu mintu’ apa Mipondok.

⁸⁴ La sangapapi lambe’na tu sunga’na te taumMi? Sia piranra amMi paolai salunna tu mintu’ to unnula’ sumpuna’?

⁸⁵ Nagaragammo’ patuang lambe’ to matampo, tu mai to tang unturu’ sukaran alukMi.

⁸⁶ Tang balle tu mintu’ pepasanMi; iatu tau iato mai tae’ bannangna nanii unnula’ sumpuna’, tunduina’ dikka’.

⁸⁷ Sidi’mora anna sabu’ina’ lan mai lino, apa tae’ angku rampanan lenni tu mintu’ parentaMi.

⁸⁸ Patuona’ sitinaya kamasokanamMi, angku toe manda’i tu kasa’bian ombo’ dio pudukMi.

⁸⁹ O PUANG, tang tiberu susuk tu kadamMi, dao suruga tontong sae lakona.

⁹⁰ Sia iatu kamarurusamMi landa’ lako disituran-turananni, mangkamo Miparandanganni te lino anna bantang pole’.

⁹¹ Tete dio atoranMi anna bantang tu mintu’nato, sae lako totemo, belanna mintu’nato mengkaola lako Kalemi.

⁹² Iakenna tang la ia kuposende tu sukaran alukMi, manassa sabu’na’ lan kamaparrisangku.

⁹³ Inang tae’ angku la ungkalupai len parentaMi, belanna tete diori amMi patuona’.

⁹⁴ Akumo tu taumMi; lendokanna’ dikka’, belanna umpengkaolaimo’ mintu’ parentaMi.

⁹⁵ Naaungammo’ to tang mekaaluk la nasanggangi, apa la kuparinaa tu mintu’ kasa’biamMi.

⁹⁶ Iatu mintu’na moi anna sundun, kutiromo tu anggenna, apa iatu pepasanMi tae’ randanna.

⁹⁷ Lendu’ kukamali’na tu sukaran alukMi! Kiallo-kiallo kunannung bang.

⁹⁸ PepasanMi mandu umpakinaana’ anna iatu mai ualingku, belanna tontong bang kuselle’.

⁹⁹ Sia mandu matarru’na’ aku anna gurungku, belanna mintu’ kasa’biamMi iamo kutangnga’-tangnga’.

¹⁰⁰ Mandu paisanna’ anna to matua-tua, belanna umpengkaolaina’ mintu’ parentaMi.

¹⁰¹ Kupamari’pimo tu lentekku tang la unnola lalan kakadakean, kumua angku belai ungkaritutui kadamMi.

¹⁰² Tae’ angku sepang len dio mai mintu’ atoramMi, belanna Kamu tu mangka umpatuduna’.

¹⁰³ Lendu’ ia marasanna kusa’ding tu mintu’ kadamMi, mandu matappa’ lan sadangku anna tani’ enoan.

¹⁰⁴ Dio mai parentaMi kunii unnappa’ kapaissanan; iamo bannangna to, angku kabiri’i tu lalan kamo’rangan.

¹⁰⁵ Iatu kadamMi sitinti palita diong to’ lentekku, sia butung bia’ unnarrang lalanku.

¹⁰⁶ Mangkamo’ umpalao sumpa sia la kupakatua te iannate: La kukaritutui tu mintu’ atoran malambu’Mi.

¹⁰⁷ Lendu’ masangna tu parri’ urruana’, o PUANG, patuona’, susitu pangallu’Mi.

¹⁰⁸ O PUANG, timangi tu mintu’ pemala’ tanning inaa nasa’bu’ tongka’ dililaku; sia patuduna’ tu mai atoranMi.

¹⁰⁹ Tontong bang narandanni kasanggangan tu sunga’ku, apa tae’ angku kalupai len sukaran alukMi.

¹¹⁰ Natanannimo’ poya to tang mekaaluk, apa tae’ angku sepang dio mai parentaMi.

¹¹¹ Mintu’ kasa’biamMi kualamo kupokataanan matontongan, belanna naposende penaangku.

¹¹² Kupamalang tu penaangku la tontong umpogau’ apa Mipondok, landa’ sae lako ma’katampakanna.

¹¹³ Kukabiri’ tu mai to ma’ranga’-ranga’ penaanna, apa kukamali’ tu sukaran alukMi.

¹¹⁴ Kamumo tu pentirerungangku sia balulang toto’ku, kurannuan tu kadamMi.

¹¹⁵ MallaiKomi dio mai kaleku, e kamu to umpogau’ kakadakean, Angku kullei ungkaritutui pepasanna Kapenombangku.

¹¹⁶ Sande’na’ susitu pangallu’Mi, angku tuo, sia da Mieloranna’ kasirisan diona tu kapa’rannuangku.

¹¹⁷ Tulakna’ angku makarimman, angku tontong umposendei tu apa Mipondok.

¹¹⁸ Mitibe tu mintu’ to sepang dio mai apa Mipondok, belanna tang kebattuan tu mintu’ pakira-kiranna.

¹¹⁹ Iatu mintu’ to tang mekaaluk Miroto’i lan mai te lino butung bura-bura, iamo bannangna to, angku kamali’i tu mintu’ kasa’biamMi.

¹²⁰ Rumonting tu kaleku diona kametakuramMi, sia mataku’na’ belanna mintu’ pa’paolaimMi salu.

¹²¹ Mangkamo’ umpogau’ katonganan sia kamaloloan, da Misorongna’ lako to umpakario-riona’.

¹²² Payo-payoi tu taumMi anna pomeloi, da anna pakario-riona’ to matampo.

¹²³ Mata’ka’ tu matangku untayan kasalamaran lu dio mai Kalemi, sola tu kada kamaloloamMi.

¹²⁴ Pogau’i lako taumMi sitinaya kamasokanamMi, sia ada’ina’ tu mintu’ apa Mipondok.

¹²⁵ Akumo tu taumMi; benna’ kapaissanan, angku belai unnissanni tu mintu’ kasa’biamMi.

¹²⁶ Nalambi’mo tu tanda allu’na, sipatu Nanii PUANG ma’pogau’, belanna nalendaimo tau iato mai tu sukaran alukMi.

¹²⁷ Iamoto angku pa’buda-budai tu mintu’ pepasanMi, ondong anna bulaan, bulaan tasak.

¹²⁸ Iamoto angku bilang maloloi lan mintu’na tu mai parentaMi, angku kabiri’i tu mintu’ lalanna to mo’rang.

¹²⁹ Kalle-kallean tu mintu’ kasa’biamMi. Iamoto anna pengkaolai penaangku.

¹³⁰ Kadipapayananna kadamMi umpamasiang sambu’ penaanna tau. Sia umbenni tangnga’ kinaa tu to tang unnampui tangnga’ kinaa.

¹³¹ Mengangana’ sia mangussu’na’ belanna ungkamali’na’ mintu’ pepasanMi.

¹³² Sailena’ sia katuru-turuina’, susitu inang pato’na lako mintu’ to ungkamali’ sangamMi.

¹³³ Pabantangi tu mintu’ tengkaku situru’ pangallu’Mi, sia da anna den kakadakean umparentana’.

¹³⁴ Lendokanna’ dio mai pa’pakario-riona tolino, kuturu’ mana’pai tu mintu’ parentaMi.

¹³⁵ Paarrangi rupamMi te taumMi, sia ada’ina’ tu apa Mipondok.

¹³⁶ Iatu uai matangku lolong susi uai salossok, belanna tae’ tau umpengkaolai sukaran alukMi.

¹³⁷ O PUANG, Kamumo tu tang pakayun bimbang, sia iatu mintu’ atoramMi manappa’.

¹³⁸ Iatu kasa’biamMi Mipalao situang kamaloloan sia kamarurusan tongan.

¹³⁹ Nabonnongmo’ kamukkunangku, belanna naboko’imo mintu’ ualingku tu kadamMi.

¹⁴⁰ Iatu kadamMi masallo’ tongan, iamoto anna kamali’i taumMi.

¹⁴¹ Aku te to bitti’ sia to tang disaile, apa tae’ angku kalupai tu parentaMi.

¹⁴² Iatu kamaloloamMi iamo kamaloloan tang tileluk sae lakona, sia iatu sukaran alukMi sanda tonganna.

¹⁴³ Iake naruana’ kapussakan sia kadipakario-rioan, apa mintu’ pepasanMi kuposende.

¹⁴⁴ Iatu mintu’ kasa’biamMi malolo sae lakona, benna’ dikka’ kapaissanan, angku tuo.

¹⁴⁵ Meongli’na’ situang penaa lantukku: Perangiina’ dikka’, o PUANG! Angku karitutui tu mintu’ apa Mipondok.

¹⁴⁶ Meongli’na’ Mati’: Lendokanna’ dikka’! Angku pengkaolai tu mintu’ apa Mipondok.

¹⁴⁷ Tae’pa anna tilalek masiang, angku inang mangkamo mengkamoya, sia urrannuanna’ kada pangallu’Mi.

¹⁴⁸ Kutu’turan bongi tang mamma’ kumua angku ma’din untangnga’-tangnga’i tu pangallu’Mi.

¹⁴⁹ Perangii tu peongli’ku sitinaya kamasokanamMi; o PUANG, patuona’ situru’ tu mintu’ apa Mipantok.

¹⁵⁰ Iatu to umparri-parri kakadakean, mengkareke’mo, tau iato mai toyangmo dio mai sukaran alukMi.

¹⁵¹ O PUANG, mareke’ duka sia Komi, sia mintu’ pepasanMi sanda tonganna.

¹⁵² Tempon diopa mai angku issanni lan kasa’biamMi. Kumua Mipabantangmo tontong sae lakona.

¹⁵³ Tiroi tu kamandasangku, amMi rampananna’! Belanna tae’ angku kalupai tu sukaran alukMi.

¹⁵⁴ Pasanda salunnana’ diona kasipakkangku tau, amMi lendokanna’; patuona’ susitu pangallu’Mi.

¹⁵⁵ Toyang ia tu kasalamaran dio mai to tang mekaaluk, belanna tae’ anna anga’ lenni tu apa Mipondok.

¹⁵⁶ Kapua tongan tu mamaseMi, o PUANG, patuona’ situru’ tu mintu’ atoramMi.

¹⁵⁷ Buda tu tau unnula’ sumpuna’ sia unneana’, apa tae’ angku lesangi tu kasa’biamMi:

¹⁵⁸ Magi’gi’na’ untiroi tu mai to balik, belanna tae’ natoe manda’i tu kadamMi.

¹⁵⁹ Tiromi, umba kukua umpa’buda-budai tu mintu’ parentaMi; o PUANG, patuona’ sitinaya kamasokanamMi.

¹⁶⁰ Makalima’na kadamMi sanda tonganna nasang. Sia mintu’ atoran malambu’Mi tang tileluk sae lakona.

¹⁶¹ Mintu’ tedong pariu’na tondok unnula’ sumpuna’ natae’ bannangna, apa lendu’ ia ma’parondona tu penaangku diona mintu’ kadamMi.

¹⁶² Sendena’ diona kada pangallu’Mi, butung to unnala buda pangrampa.

¹⁶³ Na iatu mo’rang kukabiri’ sia kukagi’gi’, apa kukamali’ tu sukaran alukMi.

¹⁶⁴ Pempituna’ lan sangallo umpudiKomi, diona atoran malambu’Mi.

¹⁶⁵ Iatu to ungkamali’ sukaran alukMi, unnappa’ kamarampasan kapua, belanna tae’ apa umpatitodoi tu tau iato mai.

¹⁶⁶ O PUANG, kurannuan tu kasalamaran lu dio mai Kalemi, sia kukaritutui mintu’ pepasanMi.

¹⁶⁷ Natoe manda’ deatangku tu kasa’biamMi, sia kupa’buda-budai tongan.

¹⁶⁸ Kutoe manda’ tu mintu’ parentaMi sia kasa’biamMi. Belanna mintu’ lalanku payan nasang dio oloMi.

¹⁶⁹ Sangapaoi anna rampo mati’ oloMi tu peongli’ku, o PUANG, sia benna’ kapaissanan susitu kadamMi.

¹⁷⁰ Sangapaoi anna lattu’ mati’ oloMi tu pengkamoyaku, sia rinding pala’na’ susitu pangallu’Mi.

¹⁷¹ La ma’uai lolong tu pa’pudi-pudian dio mai randan pudukku, belanna Miada’ina’ tu mintu’ apa Mipondok.

¹⁷² La naposengo tongka’ dililaku tu kadamMi, belanna kamaloloan tu mintu’ pepasanMi.

¹⁷³ Sangapaoi anna tumayo tu limamMi untunduina’, belanna iamo kupilei langsa’ tu parentaMi.

¹⁷⁴ O PUANG, kukamali’ tu kasalamaran lu dio mai Kalemi; na iatu sukaran alukMi iamo kuposende.

¹⁷⁵ Patuoi tu sumanga’ku, anna pudiKomi; sia sangapaoi anna tunduina’ tu mintu’ atoramMi.

¹⁷⁶ Pusamo’ susi domba natampe solana, daka’i te taumMi; belanna tae’ angku kalupai tu mai pepasanMi.