Sosolhayic̕ 1 - সান্তালী বাইবেলJion do ạuṛiyakʼgea. 1 Sosolhayicʼakʼ katha; uni do Jerusalemren raj ar Dạudren hopon kanae. 2 Uni doe meneda, “Ạuṛiyakʼgea, ạuṛiyakʼgea! Okaṭakʼge tahẽ utạrokʼ lạgitʼ do baṅkana. Jotowakʼge ạuṛiyakʼgea!” 3 Siń cando latarre manwa okae khaṭaokʼkan ona khaṭaokʼ reakʼ porho do cetʼ tae? 4 Mitʼ bidạl calakʼa, ar eṭakʼ bidạl hijukʼa, menkhan dhạrti do jaejug hạbicʼ tahẽna. 5 Siń candoe rakabokʼ kana are hạsurokʼ kana, ar apnarakʼ jaegate usạrateye ruạṛkana arhõ onḍe khone rakabokʼ kana. 6 Hoe do dạkhin secʼe hoeyeda, ar ona tayom do utạr secʼ ạcur calakʼ kana; ona do ạcur ạcurte acʼakʼ horteye ruạṛ hijukʼ kana. 7 Joto gaḍa do jalapurire dul mitʼ akana, enhõ jalapuri do tisge baṅ perejokʼ kana; onḍe khon oka gaḍako oḍokʼ hecʼakan ona reakʼ dakʼ do arhõ onḍege ruạṛ calakʼ kana. 8 Jotowakʼge ạcur ạcurte hijukʼa ar nijorokʼ kana; onako manwa do bae lại caba daṛeakʼa. Mẽtʼ do ńeńelte bae tirpidokʼa, ar lutur hõ ańjomte baṅge perejokʼa. 9 Okaṭakʼ hoyen ona do arhõ hoyokʼa, ar oka kạmi hoyakan ona do arhõ kạmi hoyokʼa; siń cando latarre do nãwãnakʼ mente cetʼge bạnukʼa. 10 Nonkan jãhãnakʼ tahẽdaṛekokʼa one ona reaṅ hoṛko men, “Ńelpe, niạ do nãwãgea.” Menkhan ona ma ḍher laha khonge tahẽkan, ona do jug jug khonge tahẽkana. 11 Laha jugren hoṛkoakʼ katha do okoeyakʼ hõ disạ bạnukʼa; okoe tayom daramko janamokʼ onkoakʼ katha hõ onko tayom janamokʼko do bako disạya. Ạkil do ạuṛiyakʼgea 12 Iń doń sosolhayicʼ kana; iń do Jerusalemre Israelkoren rajiń tahẽkana. 13 Serma latarre okako cekae hoyokʼ ona do ạkil hotete biḍạu ar ḍunḍhạu lạgitʼ iń mone murukleda. Ariń ńelkeda, Isor do manwako cetanre tinạkʼ duke lade akatʼkoa! 14 Siń cando latarre jãhãnakʼge cekae hoyokʼ ona jotogeń ńelkeda; ariń ńelkeda jotowakʼge ạuṛiyakʼgea, eken hoe tayomte ńir calakʼkan chaḍa ar cetʼge baṅkana. 15 Okaṭakʼ konḍeawakʼ kan ona do baṅ sojhekʼa; ar bạnukʼakʼ do ohom lekha daṛelea. 16 Iń do mone moneteń menkeda, “Iń lahate okoe Jerusalemreko rajokʼkan tahẽkan onko khon iń do ạkilteń sorosgea; ińakʼ bud ar ạkil do ḍhergetińạ.” 17 Ona tayom iń do bud, ạkil ar bebuj reaṅ bujhạu lạgitʼ iń kurumuṭukan tahẽkana. Ar onateń bujhạukeda, hoe tayomte ńir calakʼkan chaḍa ar cetʼge baṅkana; 18 ente ạkil ḍherlen khan ona sãote ạṛisokʼ hõ ḍherokʼa; ar buj tinạkʼ ḍherokʼ unạkʼge duk hõ ḍher idikʼa. |
Santali Bible © Bangladesh Bible Society, 2021.
Bangladesh Bible Society