Soros sereń 1 - সান্তালী বাইবেল

¹ Noa do jotoko khon mońj utạrakʼ sereń kana. Noa do Solomonakʼ sereń kana.

Dulạṛiạwakʼ katha: (Kuṛi)

² Cokʼạńme amakʼ moca reakʼ cokʼte, ente amakʼ dulạṛ do darkha rasa khon hõ sorosgea.

³ Amakʼ sunum reakʼ mońj so doe rạskạ ocoyediń kana; dul akatʼ mońj so sunum lekage amakʼ ńutumtam do. Onatege am do kuṛikoko dulạṛetʼmea.

⁴ Iń do rajiń metadea, “Am sãote idiyińme; dela, alaṅ do laṅ ńir senokʼa.” Uni do acʼakʼ oṛakʼteye aderkedińa. Ale do am sãotele rạskạkʼa arle hulạsokʼa; darkha rasa khon hõ amakʼ dulạṛ do ḍherle sarhaotama. Onko amko dulạṛetʼme ona do jutakʼ kangea.

Jerusalemren kuṛikoakʼ katha: Dulạṛiạwakʼ katha: (Kuṛi)

⁵ E Jerusalemren kuṛiko, kedar reakʼ tạmbuko lekań hendege rehõ Solomonakʼ tạmbu orwalko lekań cehragea.

⁶ Ińiń hendegete nonka do alope koyokʼạńạ, ente siń candogeye jharkao akadińạ. Ińren boehako do ińreko edre akante darkha bagwan horhoyicʼ menteko dohokadińa, onate ińakʼ darkha bagwan do bạń joton akada.

⁷ E ińren dulạṛiạtiń, mase lạiyạńme, amren pal bhiḍiko do okarem gupikoa? Ar tikin jokhecʼ do okarem aḍakoa? Am sãoten gupikoren pal bhiḍiko ṭhen cedakʼ kusumbiko leka doń ṭuṭuri calakʼa;

Gukʼpikoakʼ katha:

⁸ E maejiukoren mońj utạricʼ, am do ona bam baḍae khan palren bhiḍikoakʼ pańja ńel ńelte hijukʼme ar gupikoakʼ tạmbu aṛete amren merom hoponko gupikotam.

⁹ E ińren dulạṛiạtiń Pharaoakʼ rãt gạḍiren ghuṛi tulucʼ iń do amiń juriyetʼmea.

¹⁰ Cemkecʼ getama amakʼ johakin ar galaṅ upʼtam ar amakʼ hoṭokʼre mạnik mala do mońjge ńelokʼkana.

¹¹ Sona gunsikole galaṅama rupạ reakʼ ṭikliko salakʼ.

Dulạṛiạwakʼ katha: (Kuṛi)

¹² Raj do acʼakʼ ṭenḍar mạcire tinreye ṭenḍar akan tahẽkana unre ińakʼ jaṭamạnsi sunum do mahkao oḍokena.

¹³ Dulạṛiạtiń do gondhoroste perecʼ thạilạkʼ lekatiń one ińakʼ bạskin talare dohoakan.

¹⁴ Dulạṛiạtiń do mehndi baha thopa leka kantińae Engedi reakʼ darkha bagwan talare.

Dulạṛiạwakʼ katha: (Koṛa)

¹⁵ E dulạṛiạtiń, am dom mońjgea! Ńelme am do ạḍim cehragea. Amakʼ mẽtʼkin do potam mẽtʼkin leka.

Dulạṛiạwakʼ katha: (Kuṛi)

¹⁶ E dulạṛiạtiń, ńelme am dom mońjgea! Hẽ, ạḍitetʼgem napaegea. Alaṅakʼ aṭetʼ do hạriạṛ sakamte benao akana.

¹⁷ Alaṅakʼ oṛakʼ reakʼ koaliko do Debdạru dareko kana ar saro dare do alaṅakʼ oṛakʼ reakʼ koṭha kana.