Sephaniạ 1 - সান্তালী বাইবেল

¹ Amonren hopon Jihudạren raj Josiạwakʼ rajokʼ jokhecʼ Kusren hopon Sephaniạ ṭhen Probhu Isorakʼ katha do sodorena. Kus do Gedaliạren hopon, ar Gedaliạ do Amariren hopon, ar Amari do Hiskiạren hopone tahẽkana.

Probhu Isorakʼ bicạr reakʼ din

² Probhu Isore meneda, “Iń do dhạrti khon sanamakʼ iń marao utạra.

³ Manwa ar janwar, coṭren cẽṛẽ ar jalapuriren hakoko hõń caba utạrkoa. Iń do bedhoromkoń sumạrkoa. Ar dhạrti khon manwa doń marao utạrkoa.

⁴ “Jihudạ upạrte ar Jerusalemre girobasokʼ kan sanamko upạrte ińakʼ tiyiń rakabtińạ. Niạ disạm khon Bakʼal debota sewawae reakʼ jotowakʼko ar lạṭu ar kạticʼ hudạren sanam naekekoń marao utạrkoa.

⁵ Sermaren sanam ipilko sewawako lạgitʼ okoe do chat cetanre decʼkateko ḍobokʼetʼkan ar okoe do Probhu Isor ńutume kiriạ tayom hõ Milkom debota ńutumteko kiriạkʼ kan onko hõń marao utạrkoa.

⁶ Ar okoe Probhu Isor tayom khonko ruạṛakan ar uniyakʼ sanaleka bako calakʼkan ar uniyakʼ sana baḍaejoṅ bako khojkan onko hõń marao giḍikoa.”

⁷ Ape do Probhu Isor samaṅre hape akan tahenpe, ente Probhu Isorakʼ din do hecʼ sor akana. Probhu Isor do mitʼṭecʼ samaṅokʼakʼ reakʼe nenḍa akada; ar uni okoeye neota akatʼko onko doe sapha akatʼkoa.

⁸ Probhu Isore meneda, “Ińakʼ ona samaṅokʼakʼ dinre iń do rajren kạmiyạko, rajren hoponko ar okoe bidisiạkoakʼ kicricʼko horokʼetʼkan onko sanam hoṛkoń sạjạikoa.

⁹ Okoe do duạr reakʼ ganaḍe donateko paromokʼkan ar santao ar phạsiạra hotete akoren debotawakʼ oṛakʼko perecʼetʼkan onko do enhilokʼgeń sạjạikoa”

¹⁰ Probhu Isor do arhõe meneda, “Enhilokʼ do hako phaṭok duạr ṭhen khon rakʼ reakʼ aṛaṅ ar nagraha reakʼ dosar hĩs khon homor halaṅ ar buruko secʼ khon do rạputʼ ńurokʼkan reakʼ saḍege ańjomokʼa.

¹¹ E Motteserre tahenkan hoṛko, ape do homor halaṅpe, ente aperen bepariko ar ṭaka poesa karbạriạko do jotogeko marao ocokʼa.

¹² Unre iń do diuheante Jerusalem reakʼ sanam ṭhạ̃ire khojiń hataoa ar okoe do apnartetʼ tirpit akae tahenteye men, ‘Probhu Isor do bhage bạṛicʼ cetʼge bae cekaea,’ onko doń sạjạikoa.

¹³ Onkoakʼ dhon do luṭ idikʼtakoa ar onkoakʼ oṛakʼ-duạr hõ maraokʼtakoa. Onko do oṛakʼ-duạrko benaojoṅa menkhan onare do bako tahẽdaṛeakʼa; darkha bagwan hõko benaojoṅa menkhan darkha rasa do bako ńũ daṛeakʼa.”

¹⁴ Probhu Isorakʼ ona maraṅakʼ din do sor hecʼakana ar ạḍi usạrage hijukʼkana. Ote Probhu Isorakʼ din reakʼ sabad ańjompe! Unre lạṛhại birko do hasoteko raga.

¹⁵ Ar enhilokʼ do Probhu Isorakʼ edre reakʼ dinge hoyokʼa, gạr ar cikʼpạ reakʼ dinge hoyokʼa, muhin ar jarkharokʼ reakʼ dinge hoyokʼa, dhund reakʼ dinge hoyokʼa, rimil ar kaṛaṅ ńut reakʼ dinge hoyokʼa.

¹⁶ Ona do pạcrite esetʼ joto nagrahako upạrte ar konac reakʼ sanam khon usul pahra oṛakʼ upạrte sakwa reakʼ saḍe ar lạṛhại reakʼ hoho dinge hoyokʼa.

¹⁷ Probhu Isor do hoṛko cetanre maraṅ kosṭogeye paṛao ocoyte onko do kãṛã hoṛ leka ṭạmḍạu baṛaea, ente onko do Probhu Isor upạrteko kại akada. Onkoakʼ mãyãm do dhuṛi lekage giḍi ocokʼa ar onkoakʼ hoṛmo do guricʼ leka giḍi akan tahena.

¹⁸ Probhu Isorakʼ edre hilokʼ onkoakʼ sona ar rupạ do bae rukhiyạ daṛeakoa. Uniyakʼ ontor jala reakʼ seṅgelte goṭa dhạrti do lokʼa, ente dhạrtire tahẽnkan sanamkoge uni do ackageye caba utạrkoa, hẽ uni do botorgeye ses utạrkoa.