Sakariạ 1 - সান্তালী বাইবেল

Probhu Isor ṭhen ruạṛ hijukʼ reakʼ hoho

¹ Darjawese rajokʼ dosarakʼ bochor reakʼ irạlakʼ candore Probhu Isorakʼ katha do Sakariạ nạbi ṭhen sodorena. Sakariạ do Berekiạren hopone tahẽkana ar Berekiạ do Idoren hopone tahẽkana.

² Probhu Isor do Sakariại metadea, “Aperen hapṛamko cetanre iń do ạḍiń edrelena.

³ Ona iạte am do hoṛkom metakoa, phạdkoren Probhu Isore meneda, ‘iń ṭhen ruạṛ hijukʼpe, enḍekhan iń hõ apeń beṅgetʼapea.

⁴ Aperen hapṛamko leka do alope hoyokʼa. Onko ṭhen lahaten nạbiko do niạ kathageko lạileda, jemon onko do akoakʼ bạṛicʼ hor ar bạṛicʼ hewa khonko ruạṛ hijukʼ. Menkhan bako ańjomleda ar ińakʼ katha hõ bako hetawada.

⁵ Aperen onko hapṛam do ńitokʼ okare menakʼkoa? Ar nạbiko do cetʼ jaejug jiwetʼko tahena?

⁶ Menkhan iń do ińren gutiko, metakʼme nạbiko okań hukumatʼko tahẽkan, ińakʼ onako katha ar niạm lekate aperen hapṛamko do cetʼ sạjại bako ńamleda? Unre onko do mon ạcurkateko menleda, sanam daṛeanicʼ Probhu Isor do onkoakʼ ạri cạli ar hewa lekate onko lạgitʼ okae ṭhik doholetʼ onageye kạmi akada.’ ”

Sadomko reakʼ

⁷ Darjawese rajokʼ dosar bochor reakʼ gelmitʼ cando reakʼ metakʼme Sebaṭ cando reakʼ bargel ponakʼ dinre Berekiạren hopon Sakariạ nạbi ṭhen Probhu Isorakʼ katha do seṭerena.

⁸ Ńindạ jokhecʼ iń Sakariạ do mitʼṭecʼ dorson iń ńelkeda. Iń doń ńelkeda, manwa leka ńelokʼte mitʼṭen serma goḍet do arakʼ sadomreye decʼakana. Ar sadom do mitʼṭecʼ copotʼ jaegare mehendi dareko talareye teṅgo akana. Ar uni hoṛ tayomre do arakʼ, sãoṛa ar ponḍ roṅan sadomko tahẽkana.

⁹ Iń doń kuliyana, “E ińren Probhu Isor, noako do cetʼkana?” Ar mitʼṭecʼ serma goḍet one okoe do iń sãote kathae roroṛkan tahẽkan uniye menkeda, “Onako cetʼkan ona do amiń udukʼama.”

¹⁰ Okoe do mehendi dareko talareye teṅgo akan tahẽkan uni do ińe metadińạ, “Goṭa dhạrti ạcurkate ńel ạgui lạgitʼ Probhu Isor do nokoe kol akatʼkoa.”

¹¹ Probhu Isorren okoeṭakʼ goḍet do mehendi dareko talareye teṅgo akan tahẽkan aswariko do uniko metadea, “Ale do goṭa dhạrti dãṛã ạcurkatele ńelkeda, goṭa dhạrtige khạtirjoma ar sulukte perecʼgea.”

¹² Unre Probhu Isorren goḍete menkeda, “E phạdkoren Probhu Isor, am do Jerusalem ar Jihudạ reakʼ eṭakʼ nagrahako cetanre nõkʼõe eaegel bochor raṅgao akanem tahẽkana ar tinạkʼ din onkore begor mãyãtem tahena?”

¹³ Unre okoeṭakʼ serma goḍet do iń sãoteye galmaraokan tahẽkan Probhu Isor do uni ḍher bhạlại ar jiwi raṛecʼ reakʼ kathae metadea.

¹⁴ Ona iạte uni serma goḍet do ińe metadińạ, “Am do noa lại sodorme, phạdkoren Probhu Isore meneda, ‘Jerusalem lạgitʼ, metatʼme Sion lạgitʼ iń do monre ạḍiń dukokʼ kana.

¹⁵ Ar nirdạndiko tahenkan onko sanam jạtrenko cetanre ạḍitetʼ iń raṅgao akana, ente iń do tinre ińren hoṛko cetanre thoṛa ghạṛicʼ iń raṅgaolena unre onko jạtrenko do ińren hoṛkoakʼ dosa sãote arhõ bạṛicʼ dosako juṭucʼatʼko tahẽkana.

¹⁶ Ona iạte iń do Jerusalem mãyãwakʼ lạgitʼ arhõń ruạṛ hijukʼa ar Jerusalemre sosoṅ baber do arhõ tijokʼa.

¹⁷ Iń phạdkoren Probhu Isorge noa doń gokʼetʼkana, ińakʼ nagrahakore arhõ bhạlại do se oḍokokʼa ar Sion do arhõ jiwiń raṛejtaea ar Jerusalem do arhõń bachaojoṅa.’ ”

Ponea dereń ar ponea mistri

¹⁸ Ona tayom iń doń beṅgetʼ rakapʼketʼ khan ponea dereń iń ńelkeda.

¹⁹ Ar okoeṭakʼ serma goḍet do iń sãoteye galmaraokan tahẽkan uniń kulikedea, “Noako do cetʼ kana?” Uni doe roṛ ruạṛạdińa, “Noa do onako dereńkana oka do Jihudạ, Israel ar Jerusalemren hoṛko eṭakʼ eṭakʼ ṭhạ̃ireye chirchạtur akatʼko.”

²⁰ Probhu Isor do ona tayom ponea mistriye udukʼ ạdińa.

²¹ Iń do uniń kulikedea, “Noko do cekae lạgitʼko hecʼakana?” Uni doe roṛ ruạṛạdińa, “Ona dereńko do hoyokʼkana onko jạtrenko reakʼ daṛe okoe do Jihudạren hoṛko nonkae chirchạtur akatʼkoa okoe do bohokʼge bako rakapʼ daṛe akatʼtako. Onko jạtren botor ocoko lạgitʼ ar onko maraoko lạgitʼge noko mistri doko hecʼakana.”