Rut reakʼ kạhini 1 - সান্তালী বাইবেল

Naomi ar Rut

¹ Bikʼcạrkoakʼ bidạlre Israelkoakʼ disạmre mitʼṭecʼ akal hoylena. Unre Jihudạ disạm reakʼ Bethlehem atoren mitʼṭen hoṛ do acʼren bạhu ar barea hoponkin soṅgekate thoṛa okte lạgitʼ Moab disạmte senkate girobasokʼe ehopʼena.

² Uni hoṛakʼ ńutum do Elimek tahẽkana. Ar uniren bạhuakʼ ńutum do Naomi ar banar hoponkinakʼ ńutum do Mahlon ar Kilion. Onko do Jihudạ disạm reakʼ Bethlehemren Ephati hoṛko tahẽkana. Ar onko do Moab disạmte senkate onḍegeko tahẽyena.

³ Elimeleke gocʼen khan Naomi ar uniren banar hopon sarecʼko tahẽyena.

^4-5 Naomiren hopon do Moab disạmren kuṛikin baplaketʼkinạ. Unkin kuṛikin modre mitʼ hoṛakʼ ńutum do Orpa ar eṭagicʼakʼ ńutum do Rut tahẽkana. Mahlon ar Kilion do Moab disạmre gel bochor tahẽkan tayomkin gocʼena. Naomi do jãwãetetʼ ar banar hoponkine atʼketʼkin khane acʼ eskarena.

⁶ Naomi do Moab disạmre tahẽkanregeye ańjomkeda, Probhu Isor do acʼren hoṛkoe disạ akatʼkoa ar jomakʼ reakʼe bebosta akatʼkoa. Onate uni do acʼren banar kimintetʼ soṅgekate Moab disạm khon ruạṛ hijukʼ lạgitʼe sapṛaoena.

⁷ Ar okareko tahẽkan onḍe khon banar kimintetʼ soṅgekate uni doe oḍokena ar Jihudạ disạm reakʼ horte calakʼe ehopʼena.

⁸ Naomi do acʼren banar kimintetʼgeye metatʼkinạ, “Aben do bạhu bana hoṛge abenren eṅgat apatakʼ oṛakʼte ruạṛ senokʼ ben. Ar cetʼleka aben do gocʼakan jãwãere ar ińre pạtiạr ben tahẽkan onkage Probhu Isor hõ abenre daya baṛe tahentae ma.

⁹ Probhu Isor do abene bhora ben ma jemon arhõ sulukte jãwãe tulucʼ ben soṅsar daṛeakʼ.” Ar noa menkate uni doe cokʼatʼkinạ ar onko do ãṭ aṛaṅte rarakʼko ehopʼena.

¹⁰ Unkin dokin menkeda, “Baṅa Go, ạliń do aben sãote abenren hoṛko ṭhenliń ruạṛ calakʼa.”

¹¹ Naomiye menkeda, “Baṅa, bạhu, aben do oṛakʼtege ruạṛ calakʼ ben. Cedakʼ ạliń tulucʼ do ben calakʼa? Ạlińakʼ kukhire do cetʼ arhõ hoponkin janamokʼ reakʼ as menakʼa onate abenren jãwãekin hoedaṛekokʼ?

¹² Aben do bạhu, oṛakʼtege Do ruạṛ calakʼ ben. Ente ạlińakʼ do baplakʼ reakʼ umer hõ ar bạnukʼtạlińa. Ạliń do ạlińren hopon janamkin reakʼ aste ạlińren jãwãe ṭhen teheń ńindạge liń giticʼmitʼlen khan ar ạlińren hoponkin hoylen khan,

¹³ enḍekhan aben do cetʼ unkin harakʼ hạbicʼ ben tạṅgikakʼa? Ar unkin iạte cetʼ baben baplakʼa? Baṅa, bạhu, ona do baṅ hoyokʼa. Abenakʼ khon ạlińakʼ jiwi do ḍher haṛhatʼ getalińạ, ente Probhu Isor do ạliń upạrteye teṅgo akana.”

¹⁴ Niạ katha ańjomkate onko do arhõ ãṭ aṛaṅte rarakʼko ehopʼena. Ona tayom Orpa do acʼren hanhartetʼe cokʼadete bidại hataokeda menkhan Rut do uni tulucʼe tahẽyena.

¹⁵ Unre Naomiye menkeda, “Ńelben bạhu, abenre ńatat era do acʼren hoṛko ar acʼren debota ṭhene ruạṛ calaoena. Aben hõ uni leka calao joṅben.”

¹⁶ Menkhan Rute menkeda, “Ńelben, aben bạgikate calakʼ lạgitʼ do alo ben jormoṭ lińạ, se aben sãote senokʼ lạgitʼ hõ alo ben baron lińạ. Aben okate ben calakʼa ạliń hõ onḍege liń calakʼa ar okare ben tahena ạliń hõ onḍege liń tahena. Abenren hoṛge ạlińren hoṛko hoyokʼa ar abenren Isorge ạlińren Isore hoyokʼa.

¹⁷ Ar aben okare ben gujukʼ ạliń hõ onḍege liń gujukʼa ar onḍege jemon ạlińakʼ topa hõ hoyokʼ. Gujukʼ chaḍa eṭakʼ jãhãnakʼ iạte laṅ begarokʼ enḍekhan Probhu Isor do jemon bạṛicʼ sạjạiye imạń.”

¹⁸ Naomi do tinreye bujhạukeda, Rut do uni tulucʼ calakʼgeye mone muruk akada unre ar cetʼge bae metadea.

¹⁹ Inạ tayom bana hoṛ senokʼ kin ehopʼena ar mucạtʼre Bethlehemre kin seṭerena. Ar Bethlehem kin seṭeren khan goṭa ato unkin iạte umjhạuena. Atoren maejiuko menkeda, “Nui do cetʼ uni Naomi doe baṅkana?”

²⁰ Naomiye menkeda, “Iń do Naomi (metakʼme ‘landa’) do ar alope hohoạńạ, bickom Mara (metakʼme ‘haṛhatʼ’) hohoạńpe, ente sanam daṛean Isor do ińakʼ jiwiye haṛhatʼ akatʼtińạ.

²¹ Ale do jhaṅgoe paṭoele senlena menkhan Probhu Isor do eken tiye ruạṛ ạgukedeńạ. Probhu Isor do tinre iń upạrte gohae emeda ar sanam daṛean Isor do tinre kosṭoreye paṛao akadińạ unre cedakʼ Naomi dope hohoạń kana.?”

²² Nonkate Naomi do acʼren kimintetʼ Rut soṅgekate Moab disạm khone ruạṛ hecʼena. Unkin do jao irokʼ ehobokʼ jokhecʼ Bethlehem tekin seṭerena.