Rak̕joṅ 1 - সান্তালী বাইবেল

Jerusalem reakʼ duk

¹ Hae! ona nagraha do, mitʼ jokhecʼ onare hoṛkote perecʼ tahẽkana, uni do cetʼleka eskare duṛupʼ akana. Okaṭakʼ nagraha do mitʼ jokhecʼ jạt jạtrenko talare maraṅe tahẽkan, uni do ńitokʼ rạnḍi maejiu lekae hoyakana. Uni do disạmkoren rạniye tahẽkana ar ńitokʼ do kạ̃ṛmĩye hoyakana.

² Uni do ạyupʼ jokhecʼ ạḍiye rakʼetʼ kana, mẽtʼ dakʼte johakine lohotʼetʼtaea. Acʼren dulạṛiạko modren uniyakʼ jiwi raṛejtae lạgitʼ do okoehõ bạnukʼkoa. Uniren gateko do jotoge uniko eṛeakadea; onko jotoge uniren bạiriko hoyakana.

³ Kosṭo ar kajak khaṭaokʼ tayom Jihudạ do sạṅgińteye bondi idi ocoakana. Uni do eṭakʼ jạtrenko talareye girobasokʼ kana; ar okarehõ jirạu do bae ńam akada. Okoe uniko khudạulede onko do uniyakʼ dạrun dukko talatege uniko sapʼ tiyokʼ akadea.

⁴ Sion reakʼ kulhiko doe homor halaṅeda, ente niṭ akatʼ porobre okoehõ bako hijukʼkana. Uniyakʼ sanam phaṭok duạrte bolokʼ hor do khạligea. Uniren naekeko doko jare jarekʼ kana, ar juạn kuṛiko doko dukokʼ kana, onate uni do monre ạḍi duke ńameda.

⁵ Uni upạrtenko do uniren kisạ̃ṛko hoyakana; Uniren bạiriko do khạtirjomako tahenkana. Uniyakʼ ḍher ghạṭ iạte Probhu do dukreye paṛao ocoakadea. Uniren kạṭicʼ gidrạko do bondikate bạiriko laha lahateko senakana.

⁶ Sion kuṛiyakʼ sanam mahatto do caba akantaea. Uniren mukhiyạko do nonkan jel lekako hoyakana okoe do ạtiń ṭạnḍiko bako ńametʼkan; onko doko nijorente onko laha lahateko dạṛkeda. One okoe do onkoko khudạuetʼko.

⁷ Jerusalem do acʼakʼ kosṭo ar dãṛãbaṛae dinkore acʼakʼ sedaeakʼ dhon dorib reakʼ kathae disạyetʼ kana. Uniren hoṛko tinre bạirikoakʼ tireko paṛaolena unre uni goṛowae lạgitʼ okoehõ bako tahẽkana. Uniren bạiriko uni secʼko beṅgetʼ akada ar maraokʼ lạgitʼko landa-dhutʼae kan tahẽkana.

⁸ Jerusalem do ạḍiye ghạṭ akada, onate uni doe bhonḍ akana. Okoe uniko manotede tahẽkan onko jotoge uniko nihạ̃t giḍi akadea, ente onko do uniyakʼ lajaoakʼko ńel akatʼtaea; uni doe kuhrạueda ar mẽtʼãhãe betʼetʼtaea.

⁹ Uniyakʼ mạilạ do uniyakʼ kicricʼrege laṭkao akantaea; darakan din reakʼ do bae dạndilena. Uni doe sombotʼ bhindạṛ akana; jiwi raṛecʼtae lạgitʼ do celege bạnukʼkotaea. Uniye meneda, “E Probhu Isor, ińakʼ duk baṛe ńeltińme, ente bạiriko doko jitạu akana. ”

¹⁰ Uniren bạiriko do uniyakʼ damanakʼ jinisko joṭetʼ akatʼtaea; boṅgan hoṛ jạtrenko hõ acʼakʼ sonot ṭhạ̃ite bolokʼe ńelakatʼkoa. Noko doko onko hoṛ kangea okoe do amakʼ somajte bolokʼem baronletʼko.

¹¹ Uniren sanam hoṛko do jare jaretʼte jomakʼko ńam baṛakana; apnar bańcao tahen lạgitʼ onko do jomakʼ bodolte akoakʼ damanakʼ jinisko emakana. Jerusaleme meneda, “E Probhu Isor, beṅgedme, ar hudisme, iń doń nihạ̃t giḍi ocoakana.

¹² Ape okoe do iń aṛetepe parom calakʼkan ape do cetʼ jãhãnakʼge baṅ cekakʼ kantapea? Ạribạndhipe ar ńelpe. Iń cetʼ lekań harkhet sasetʼ ocokʼkan onka do cetʼ jãhãeko harkhet ocoakana, okaṭakʼ Probhu Isor do acʼakʼ jolokʼkan edre hilokʼe emakawạdiń?

¹³ Coṭ khon uni do ińakʼ jaṅkore seṅgelgeye kol akada. Ińakʼ jaṅga lạgitʼ uni do jhãmpae oḍao akada ar ạcur ruạṛokʼ lạgitʼe jormoṭ akadińạ. Uni do ińe eskar akadińạ, goṭa din nijorgeye dohoakadińạ.

¹⁴ Ińakʼ ghạṭko do arãṛ lekae tol joṛao akatʼtińạ; uniyakʼ titege onako doe tol mitʼakada. Ar ińakʼ tarenreye lade akawạdińạ, Probhu Isorge ińakʼ daṛe doe caba akattińạ. Ar okoe bạń teṅgo daram daṛeako onkoakʼ tireye soprot akadińa.

¹⁵ Probhu Isorge ińren sanam birbão hoṛkoe nihạ̃t giḍi akatʼkoa; uni do ińren juạnko chaka chunko lạgitʼ iń upạrte mitʼṭecʼ okteye ṭhik dohoakada. Darkha lelen kunḍre kuạ̃ri kuṛi Jihudạ do jaṅgateye lebetʼ gasmanḍao akadea.

¹⁶ Onatege iń doń rakʼeda, ińakʼ mẽtʼdakʼ do jorokʼ kantińạ. Jiwi raṛejtiń lạgitʼ do celege bạnukʼkoa, ar jiwi cerṭha ocoytiń lạgitʼ hõ bạnukʼkoa. Ińren gidrạko do ujạṛgeko hoyakana, ente bạiriko doko jitạuena. ”

¹⁷ Sion do acʼakʼ tiye tiạr akatʼtaea, menkhan uniyakʼ jiwi raṛejtae lạgitʼ do celege bạnukʼkoa. Probhu Isor do Jokob lạgitʼ noae hukum akada, aḍepaseren hoṛge uniren bạiriko hoyokʼa. Onko talare Jerusalem do mitʼṭecʼ bhonḍakʼ jinisge hoyakana.

¹⁸ Uni doe meneda, “Probhu Isor doe dhoromgea, iń do uniyakʼ hukum birudreń hul akada. Sanam jạtrenko, ańjompe, ińakʼ harkhet ńelpe; ińren juạn ar juạniko do bondikate sạṅgińteko idi ocoakana.

¹⁹ Ińren dulạṛiạkoń hohoatʼkoa menkhan onko doko eṛekedińa. Ińren naekeko ar murubbiko do apnar jiwetʼ tahen lạgitʼ jomakʼ sendra sendrate nagraha talaregeko ses utạrena.

²⁰ E Probhu Isor, ńelme, tinạkʼ iń kosṭokʼ kana! Iń bhitrire hõń sasetokʼ kana. Ińakʼ ontor do torasokʼ kantińạ, ente iń do huhulicʼ iń hoyakana. Nagraha bahrere do tarwaṛe jiwiye hataoeda, ar bhitrire do eken gujukʼge menakʼa.

²¹ Hoṛko do ińakʼ kuhrạuko ańjomakada, menkhan jiwi raṛejtiń lạgitʼ do celege bạnukʼkoa. Ińren sanam bạiriko do ińakʼ kosṭo reakʼ kathako ańjomakada; ar amem onka akatʼte onko doko rạskạkʼ kana. Ona din baṛe hecʼ ocoyme okaṭakʼem jạhirakatʼ jemon ona dinre iń lekako hoedaṛeakʼ.

²² Onkoakʼ sanam bạṛicʼ kạmiko do am samaṅre hijukʼma. Ińakʼ sanam ghạṭko iạte ińre okam ceka akatʼ onkorehõ baṛe onkaeme. Ińakʼ kuhrạu do ḍhergea, ińakʼ mon do kạhil akantińạ. ”