Obodiạ 1 - সান্তালী বাইবেল

Edomrenko upạrte nạbi katha

¹ Obodiạwakʼ dorson. Edom disạm babotre Probhu Isor do noa kathae roṛetʼkana. Ale do Probhu Isor ṭhen khon mitʼṭecʼ sombatle ańjom akada. Uni do jạt jạtrenko ṭhen mitʼṭecʼ goḍet kolkate noa katha lạlạiye metade tahẽkana, “Dela beretʼpe, Edom upạrte lạṛhại lạgitʼ bon oḍok calakʼa.”

² Probhu Isor do Edome metaekana, “Ńelme, jạt jạtrenko talareń huḍińmea; ar am dom nihạ̃t ocokʼa.

³ Am do huṭupʼ dhiri lopakʼrem girobasokʼ kana ar usul usul ṭhạ̃ikorem tahenkana ar mone monetem meneda, ‘okoe hale otre doe pheḍ daṛekińạ?’ Menkhan amakʼ ontor reakʼ bạḍạikoge am doe ṭhoka akatʼmea.

⁴ Am do pajhaṛ cẽṛẽ leka coṭrem ạphir baṛaekanre hõ ar ipilko talare oṛakʼem benaojoṅkanre hõ iń do onḍe khoniń or pheḍ ạgumea. Iń Probhu Isorge noa katha doń meneda.

⁵ “Hae, cetʼ lekan muhinge baṅ am lạgitʼe koyokʼ horakatʼ! Kombṛo am ṭhenko hecʼlenre; ar ḍạku hõ ńindạko hecʼlenre, onko do akoakʼ mone joṅakʼ lekageko kombṛo idiya. Ar darkha jo gogotʼ hoṛ am ṭhenko hecʼlenre am lạgitʼ thoṛa jo doko sarecʼ oṭokakʼgea.

⁶ Menkhan Esao do mitʼ dhaogeye luṭ ocokʼa, uniyakʼ dhon do jotoge luṭ idikʼtaea.

⁷ Amren sanam gate-rajosṭiko hõ amren ńir pharakokʼkan hoṛko akoakʼ simạna talate bako bolo ocoakoa. Ar amren gate hõ amko ṭhokamea ar ako secʼko or ạgumea; okoe amakʼko jometʼkan tahẽkan onko do am lạgitʼ jhãmpako oḍaoa, menkhan am do cetʼge bam bujhạu daṛeakʼa.”

⁸ Probhu Isore menetʼkana, “Enhilokʼ iń do Edomren ạkilan hoṛko ar Esao buru khon bujan hoṛko cetʼ bạń maraokoa?

⁹ E Teman, amren lạṛhại phạdko do heṛan botorko botorokʼa ar Esao bururen do sanamgeko gocʼ ocokʼa.

¹⁰ Amren boeha Jakob upạrte santao lạgitʼ am do lajaotem dapalokʼa; am do jaejug lạgitʼem marao utạrokʼa.

¹¹ Eṭakʼ disạmren hoṛko do tinre Jakobakʼ dhon-duribko idiyetʼ tahẽkana ar uniyakʼ phaṭok duạr secʼte bolokate Jerusalem lạgitʼko gulibãṭletʼ tahẽkana unre am do sạṅgińre teṅgo akanem tahẽkana; ar onkoren mitʼ hoṛ lekam hoylena.

¹² Am boehawakʼ hale ḍale oktere am do ạḍitetʼem kusiyena, ar Jihudạren hoṛkoakʼ maraokʼ dinre onko babotrem hulạsena ar onkoakʼ kosṭo hilokʼre do bạḍạitem perecʼlena.

¹³ Ińren hoṛkoakʼ muhin hilokʼre am do onkoakʼ phaṭok duạrkotem boloyena, onkoakʼ maraokʼ hilokʼ onkoakʼ muhim ńelte ạḍim kusiyena ar onkoakʼ dhon-duribem luṭana,

¹⁴ onkoren dạdạṛkan hoṛko gocʼko lạgitʼ onkoakʼ horrem tãṛãkʼlena, ar onkoakʼ kosṭokʼ hilokʼre onkoren paskaolen hoṛko do bạirikoakʼ tirem soprotketʼkoa. Noako am lạgitʼ lek do baṅ tahẽkana.

¹⁵ “Sanam jạtrenko lạgitʼ Probhu Isorakʼ din do sor hecʼakana. Am cetʼkom ceka akatʼ onkage amre hõ hoyokʼa; amakʼ kạmi reakʼ jo do amakʼ bohokʼ cetanrege ruạṛ hijukʼa.

¹⁶ Ińakʼ sonot burure cetʼleka bubulakʼem ńũletʼ onkage sanam jạtrenko do jaoge ińakʼ edre reakʼ bubulakʼko ńũiya; onko do ona jojomtegeko tahena ar purạteko caba utạrokʼa.

¹⁷ Menkhan Sion bururen adom hoṛko do rukhiyạko ńama; onko do Isor ńutumte begar akan hoṛ kanako. Ar Jakobakʼ bõsren hoṛ do akoakʼ sompottiko ńama.

¹⁸ Jakobakʼ bõsren doko hoyokʼa seṅgel ar Josephakʼ bõsrenko do seṅgel reakʼ lepʼge; Esao bõsrenko do lanḍha lekako hoyokʼa ar ona seṅgel do onakoe lo torocʼkoa. Esao bõsren do celege jiwetʼ bako tahena. Iń Probhu Isorge noa katha doń meneda.”

¹⁹ Negebre tahenkan Israelrenko do Esaoakʼ buruko dokhol joṅa ar latar buru ṭoṭharen hoṛ do Philisṭikoakʼ disạmko ạidạri joṅa. Onko do Ephrayim ar Samariạ reakʼ ṭhạ̃iko dokhol joṅa ar Benjạmin Gilead ṭoṭhako ạidạri joṅa.

²⁰ Bondi dosare tahen Israelko do hecʼkate Sarephat hạbicʼ Kananikoakʼ disạmko ạidạri joṅa; ar bondi dosare tahẽkan Jerusalemren hoṛ okoe do Sepharatre menakʼko onko do hecʼkate Negeb reakʼ atoko ạidạri joṅa.

²¹ Disạm cakʼlaoko do Sion buru khon Esaoakʼ buru ṭoṭhakoren hoṛko ḍanṭaokoa, ar rajosṭi do Probhu Isorakʼge hoyokʼa.