Nạhum 1 - সান্তালী বাইবেল

Niniwi cetanre Probhu Isorakʼ edre

¹ Niniwi babotre Isorakʼ katha. Elkosi atoren Nạhum oka dorsone ńelletʼ ona do noa puthire ol akana.

² Probhu Isor do nonkan Isor kanae uni do acʼakʼ kuṛạiye khojkana ar joe emokʼkana; Probhu Isor doe hala hạliya ar acʼren bạiriko lạgitʼ edreye dohokakʼa.

³ Probhu Isor do usạrate bae edrekʼa ar daṛete hõe maraṅgea. Uni do begor sạjạite bae aṛakʼa. Uniyakʼ hor do birbão ar hoere tahenkana, ar rimil do uniyakʼ jaṅga reakʼ dhuṛikana.

⁴ Uni do jalapuriye dhomkaoetʼte onae ańjetʼ ocoyeda; ar gaḍako doe rohoṛ ocoyeda. Bason ar Karmel do gosokʼkana ar Lebanon reakʼ bahako do tolmojokʼkana.

⁵ Maraṅ maraṅ buruko do uni samaṅre dal dalaokʼ kana ar huḍiń buruko do galaokʼkana. Uniyakʼ hạjirokʼre dhạrti ar onare tahen kan jotogeko thar tharokʼkana.

⁶ Uniyakʼ raṅgao samaṅre do okoeye ṭikạu tahẽdaṛekokʼa? Ar uniyakʼ botoranakʼ edre do okoeye sahao daṛeketaea? Uniyakʼ edre do seṅgel leka jolokʼkana; ar uni samaṅre lạṭu lạṭu dhiriko do gejerokʼ kana.

⁷ Probhu Isor doe bhagegea, ar gạr hilokʼren doe aotan gaṛ kana. Ar acʼre okoeko hirlạkʼkan onko doe baḍaeyetʼkogea.

⁸ Menkhan uni do ḍubạ dakʼte Niniwi nagrahae marao utạra; ar okoe acʼ secʼrenko baṅkan onko do ńutteye laga ńirkoa.

⁹ E Niniwiren hoṛko, Probhu Isor upạrte jãhãnakʼgepe cekae uni do ona bae jo baha ocoytapea. Uni doe caba utạra ar gạr do dohṛate baṅ rakapʼa.

¹⁰ Ape do jạnum jhạuạrepe ramphakʼa ar darkha rasa ńũtepe bulokʼa; ar lanḍha lekape lokʼa.

¹¹ Ente ape tala khon nonkan mitʼ hoṛe oḍok hecʼakana okoe do Probhu Isor upạrte bạṛicʼakʼe ponthayetʼ ar bạṛicʼ sopolhae emokʼkan.

¹² Probhu Isore meneda, “E Jihudạ, Ạsurrenko doko daṛegere hõ arko alekhagere hõ enhõ onko doko gocʼ ocokʼa. Iń do sạrigeń duk ocoakatʼmea, menkhan ar bạń duk ocomea.

¹³ Ńitokʼ do amakʼ taren khon onkoakʼ arãṛiń rạputʼ giḍikakʼa ar amakʼ tol koń topakʼ giḍikakʼa.”

¹⁴ E Niniwi, Probhu Isor do am reaṅe menetʼkana, “Amakʼ ńutum rukhiyại lạgitʼ amre cele hoṛge bako tahena. Amren debotakoakʼ mundilre oka boṅga muṭhạnko menakʼ onakoń marao giḍikakʼa. Ar ạḍitetʼem bạṛicʼgete amakʼ topań teartama.”

¹⁵ Okoeṭakʼ hoṛ bhage sombate ạguyetʼkan ar suluk reakʼe roṛetʼkan, ma ńelme uniyakʼ jaṅga do buru cetanre menakʼtaea. E Jihudạ, amakʼ porobko palonme ar okaṭakʼ manotem dohoakatʼ ona purạume. Dusṭạmi hoṛ do ar bako akromonmea; onko doko marao ocokʼa.