Malaki 1 - সান্তালী বাইবেল

¹ Malaki hotete Israelko ṭhen Probhu Isorakʼ katha.

Jakob doe dulạṛ ocokʼa ar Esao doe nihạ̃t giḍikʼa

^2-3 Probhu Isore meneda, “Iń do apeń dulạṛ akatʼpea, ” Menkhan apepe meneda, “Am do oka lekam dulạṛketʼlea” Probhu Isor doe roṛ ruạṛakeda, “Esao do cetʼ Jakobren boeha bae tahẽkana? Enhõ Jakob iń dulạṛkedea menkhan Esao do bạń moneyadea. Ińge uniyakʼ burukoń jarkharketʼtaea ar uniyakʼ ṭhạ̃i do hahaṅkarren toyokoakʼ iń hoyoco akada.”

⁴ Edom doe men boteja, “Alele chakachun akanre hõ jarkharakʼko do arhõle benao rakaba.” Menkhan phạdkoren Probhu Isore meneda, “Onkoko beretʼ daṛeakʼa menkhan iń do onań rạputʼ giḍikatakoa. Onko do ‘bedhorom’ reakʼ disạmko menocokʼa one onko jạtrenko do jao okte Probhu Isorakʼ edre latarre menakʼko.

⁵ Ape do apeakʼ mẽtʼte onape ńela arpe roṛa, ‘Israelakʼ simạnako bahrere hõ Probhu Isor doe maraṅgea.’ ”

Naekeko upạrte Probhu Isorakʼ katha

⁶ Phạdkoren Probhu Isore meneda, “Hopon do acʼren apattetʼ ar guti do arcʼren kisạ̃ṛe manotea. Apatiń hoyakan khan ińakʼ manot do okare? Ar kĩsạ̃ṛiń hoyakan khan ińakʼ manot do okor? E naekeko, apege ińpe nihạ̃t giḍi akadińạ. Arpe meneda, ‘cekate ale do amle nihạ̃tetʼmea?”

⁷ Ape do ińakʼ pinḍ cetanre besaphawakʼ jomakʼ dohokate ińpe nihạ̃t giḍi akadińạ. Menkhan apepe meneda, ‘onate do cetʼ besaphayicʼem hoyakana?’ Apege, ‘Probhu Isorakʼ ṭebil do hirkhạwakʼ lek kana mentepe menetʼ khan,’ apege coṅ iń ma besaphayicʼpe mitạń kan.

⁸ Janwar samaṅokʼakʼ porob lạgitʼ ape do kãṛã janwarante tinrepe hijukʼkana unre ona do cetʼ apeakʼ behokakʼ do baṅkana? Ape do tinre leḍha ar ruạkʼkan janwarkote samaṅokʼakʼ porobpe porobokʼ kana, unre cetʼ ona do behokakʼ do baṅkana? Aperen disạm cakʼlaoko ṭhen onakope samaṅle khan uni do cetʼ apereye kusikokʼgea? Uni do cetʼ bae nihạ̃t giḍikepea? Iń phạdkoren Probhu Isorge apeń kuliyetʼpea.”

⁹ Ńitokʼ Isor ṭhen daya khojkate cetʼ lab? Apeakʼ tite nonkanakʼpe samaṅetʼ khan uni do cetʼ ape bae nihạ̃tpea? Ańjompe, phạdkoren Probhu Isor katha, uni okae menetʼ,

¹⁰ “Hae! Ape modre mitʼ hoṛ hõ mundil oṛakʼ reakʼ duạre sińlere ar ińakʼ pinḍ cetanre ạuṛiyakʼ reakʼ seṅgel bape jeretʼ lekhan iń do ạḍiń kusikokʼa. Ape cetanre iń doń khĩs akana ar samaṅokʼakʼ reakʼ jinisko hõ apeakʼ tite bạń ataṅa.

¹¹ Purub khon pạchim hạbicʼ sanam jạtrenko talare ińakʼ ńutum do maraṅokʼa. Iń ńutumte sanam ṭhạ̃irege dhupko jeredokʼa ar samaṅokʼ lạgitʼ sapha jinisko ạgukʼa, ente sanam jạtrenko talare ińakʼ ńutum do maraṅokʼtińạ.

¹² Menkhan ape do ińakʼ ńutumpe bemanot akada, entepe meneda, ‘Probhu Isorakʼ ṭebil do baṅ saphaoa ar ona cetan reakʼ jomakʼko hõ bạṛicʼgea.’

¹³ Ape do noa hõpe meneda, ‘Noako do samani haronokʼakʼ kana!’ Ape do luṭ ocoakan, leḍha se ruạkʼkan janwarpe ạguiyetʼkoa ar samaṅokʼren porob ńutumtepe samaṅetʼkoa, menkhan cetʼ iń do apeakʼ ti khon onań ataṅ daṛekea? Iń Probhu Isorge noa katha doń meneda.

¹⁴ Jãhãege palre menakʼkotae lek lekan janwarko khon emokʼ lạgitʼe manot akatʼ khan ar hoṛmore dusiyicʼ mitʼṭen janwar Probhu Isor ńutumteye samaṅakade khan, uni doe ṭhokgea. Uni cetanre do sarap paṛaokʼma. Iń kangeạń maraṅ raj do ar sanam jạtrenko do ińgeko botorạńạ. Ar iń phạdkoren Probhu Isorge noa katha doń meneda.”