Levitikus 1 - সান্তালী বাইবেল

Jeredokʼ samaṅokʼakʼko

^1-2 Mitʼdin Probhu Isor do ńapamokʼ tạmbu khon Moseye hohoadea ar Israelko lạiyako lạgitʼe hukumadea, “Ape modre Probhu Isor ńutumte jãhãe jãhãnakʼ samaṅokʼakʼ lekate emogokʼ reakʼe menetʼ khan uni do mitʼṭen janware ạguyema; ar uni do jemon ḍaṅgra se bheḍa se meromge baṛeye hoyokʼma.

³ “Uni do ona jeredokʼ samaṅokʼakʼ ḍaṅgrateye menetʼ khan enḍekhan uni do niphuṭ ạnḍiạ ḍaṅgrage ạguiye hoyokʼtaea. Probhu Isor jemon uni cetanreye kusikʼ onate uni do ńapamokʼ tạmbu reakʼ duạr ṭhen ḍaṅgrae ạguiyea.

⁴ Ar uni do jeredokʼ samaṅokʼakʼ lạgitʼe ạgu akade ḍaṅgrawakʼ bohokʼre tiye dohoytaea; ar ona do acʼakʼ puruchun lạgitʼ ataṅokʼtaea.

⁵ Ona tayom Probhu Isor samaṅre uni ḍaṅgra do dãṛẽye hoyokʼa ar naeke Aronren hoponko do uniyakʼ mãyãmte ńapamokʼ tạmbu reakʼ duạr ṭhenakʼ pinḍ beṛhaeteko irciyakʼa.

⁶ Ar samaṅetʼkạnicʼ do uni ḍaṅgrae khalea ar phạṛi phạṛiye getʼ kuṭrạyea.

⁷ Ar naeke Aronren hoponko do pinḍ cetanre seṅgelko jola ar ona cetanre sahanko dohoya.

⁸ Ona tayom do pinḍ reakʼ jolokʼ sahan cetanre uni ḍaṅgrawakʼ bohokʼ, itil ar jel reakʼ kuṭrạko dohoya.

⁹ Ar samaṅedeyicʼ do uniyakʼ jaṅga ar lacʼ bhitri reakʼ sanam hạṭińko dakʼteye ạrupʼ saphaea ar naeke do onako sudhạ goṭa ḍaṅgrage pinḍreye jeretʼ cabayea. Noa do seṅgelteakʼ mitʼṭecʼ jeredokʼ samaṅokʼakʼ kana, one ona reakʼ jut so Probhu Isor doe kusiyakʼkan.

¹⁰ “Noa jeredokʼ samaṅokʼakʼ do bheḍa se meromteye hoyocoe khan uni do mitʼṭen niphuṭ merom boda se bheḍa baṛeye ạguiyema.

¹¹ Ar samaṅetʼkạnicʼ do pinḍ reakʼ utạr secʼre idikate Probhu Isor ńutumteye magea, ar Aronren hoponko do uniyakʼ mãyãm hataokate pinḍ beṛhaeteko irciyakʼa.

¹² Uni samaṅetʼkạnicʼ do phạṛi phạṛiye getʼ kuṭrạyea ar naeke do uniyakʼ bohokʼ, itil, ar jel reakʼ phạṛiko pinḍre jolokʼkan sahan cetanreye dohoya.

¹³ Ar samaṅetʼkạnicʼ do jaṅgako ar lacʼ bhitri reakʼ hĩsko dakʼteye ạrupʼ saphaea ar naeke do onako sudhạ goṭa ḍaṅgrage pinḍ cetanreye jeretʼ cabayea. Noa do seṅgelteakʼ mitʼṭecʼ jeredokʼ samaṅokʼakʼ kana one ona reakʼ jut so Probhu Isor doe kusiyakʼkan.

¹⁴ “Probhu Isor ńutumte noa jeredokʼ samaṅokʼakʼ do jãhãn cẽṛẽkote hoeocoye menetʼ khan samaṅetʼkạnicʼ do mitʼṭen potam se parwa baṛeye ạguiyema.

¹⁵ Ar naeke do pinḍ ṭhen idikate uniyakʼ bohokʼe peṭer topagtaea ar uniyakʼ mãyãm do roḍocʼ oḍokkate pinḍ reakʼ bhitreye joro hińjitʼ ocoytaea ar pinḍ cetanreye jeretʼ cabayea.

¹⁶ Ar samaṅetʼkạnicʼ do cẽṛẽyakʼ okotʼ ar uni bhitri reakʼ joto mạilạko ocokʼkate pinḍ purub aṛe reakʼ torocʼreye giḍikakʼa.

¹⁷ Uni do phạ̃kṛạ̃kʼre sapʼkate nonkae phạṛiyea jemon aloe topage. Ar ona tayom naeke do pinḍre jolokʼkan seṅgelreye jeretʼ cabayea. Noa do seṅgelteakʼ mitʼṭecʼ jeredokʼ samaṅokʼakʼ kana one ona reakʼ jut so Probhu Isor doe kusiyakʼkan.