Kạhtukko 1 - সান্তালী বাইবেল

Kạhtukko reakʼ dam

¹ Dạudren hopon Israelren raj Solomonakʼ dhorom sopolha.

² Noako ol hoyakana jemon hoṛko do bhage bud ar cecetʼakʼko ńam, jemon onkoakʼ bud bicạr baḍhaokʼtako,

³ ar jemon eṭakʼko sãote hudiskateko calakʼ, jemon onko do jotoko tulucʼ lek leka, hok ar dhorom salakʼko beohar,

⁴ jemon lelha hoṛ do budanko hoyokʼ ar juạnko do bud ar ạkilko ńam,

⁵ Ạkilan hoṛ do noa sopolhako ańjomma arko cetʼjoṅ ma. Ar budanko do ańjomkate calakʼ horreko gạkhuṛokʼma.

⁶ Jemon hoṛko do phen reakʼ kathako ar khạndri reakʼ kathako ar ạkilankoakʼ kathako ar kudumko bujhạu daṛeakʼ.

⁷ Probhu Isor botorae do ạkil reakʼ etohopʼ kana, menkhan lelha hoṛ do ạkil ar sikhạunako nihạ̃tetʼ kana.

Juạnko lạgitʼ sopolha

⁸ E bạbu, ạpumakʼ solha baṛe ańjomtaeme; ar eṅgamakʼ cecetʼakʼko do alom phesṛao giḍikakʼa.

⁹ Onako do amakʼ bohokʼ lạgitʼ ṭhosok mukuṭ ar hoṭokʼ reakʼ do mala kana.

¹⁰ E gidrạtiń, kạkại hoṛ bạṛicʼ horteko idilem khan alogem rebenokʼa.

¹¹ Jãhãegeye metam, “Dela ale sãote hijukʼme, ar khũn lạgitʼ dela tãṛãkʼ akae bon tahenma, ar miridos hoṛ sabe lạgitʼ dela bon coko hataṛokʼma.

¹² Onko do jiwetʼ hoṛmowante cetʼleka patal purite, metatʼme ona khạndṛuṅteko pheḍokʼkan, onkage dela, abo do jiwetʼte onko bon utʼgotʼkakoma;

¹³ enḍekhan damanakʼ jinisko bon ńamjoṅa, ar luṭakʼ jiniskote aboakʼ oṛakʼ duạr bon perejtabona.

¹⁴ Amakʼ bhạg do ale sãotege dohoyme, ar aboakʼ ṭaka reakʼ thạilạkʼ do mitʼṭecʼge tahenma.”

¹⁵ E bạbu, onko tulucʼ do alom calakʼa, ar onko khon do sahaṛ akae tahenme;

¹⁶ ente onkoakʼ jaṅga do kại secʼge ńir calakʼ kana, ar mãyãm joro ocoy lạgitʼko thare marekʼ kana.

¹⁷ Hoṛko mena, “Ńeńelkan cẽṛẽ samaṅre pạsi oḍao do nahakgea.”

¹⁸ Noko hoṛ do akotege khũnokʼ lạgitʼko tãṛãgokʼ kana, ar ḍhao maraokʼ lạgitʼ apnargeko oko tahenkana.

¹⁹ Bạṛicʼ upạite jãhãnakʼ lab lạgitʼ okoeko dạdạrkan onko sanamkoakʼ dosa do onkage hoyokʼtakoa; ar okako lab onate onkoakʼ jion do nosṭokʼtakoa.

Ạkil reakʼ hoho

²⁰ Ạkil do hor horte ãṭ aṛanteye hohoyeda, ar bajarkore aṛaṅe ańjom ocoyeda.

²¹ Uni do ãṭ aṛaṅte rão rão kulhikore dobạṭiạkoreye hohoyeda, ar nagraha reakʼ phaṭok duạrte bolokʼ jokhecʼe meneda,

²² “E lelha hoṛko, ape do ar tinạkʼ din apeakʼ lelhatetʼpe dulạṛa? landa dhudhutʼko do ar tinạkʼ din onare rạskạko ńama? Ar bebujko hõ ar tinạkʼ din ạkilko kurudakʼa?

²³ Ińakʼ ḍanṭaope luturakʼ khan, ińren Jiu do apereń dulkea, ar ińakʼ mon reakʼ kathań baḍae ocokepea.

²⁴ Apeń hohowatʼpere ape do bape hetawatʼtińạ, ar tiyiń ạwilletʼre okoe hõ bape moneyada.

²⁵ Ape do ińakʼ hukumkoge bape hetawatʼa, doskoń udukʼatʼpere hõ bape aṅgocleda,

²⁶ Unre apeakʼ maraokʼ ńelte iń doń landaya, ar muhinrepe paṛaolenre apeakʼ tamasań ńela.

²⁷ Muhin do birbão leka apere hecʼlenre, ar hoedakʼ lekae oṭaṅ idilepere, gạr ar dukrepe unumlenre, unre iń do tamasań ńela.

²⁸ “Unre bebujkoko hohoạńạ menkhan bạń moneyakoa; ińko ńam baṛayińạ menkhan bako ńam daṛeạńạ.

²⁹ Onko do ạkilko kurud akawada ar Probhu Isor botorae hõ bako khojleda.

³⁰ Ona iạte onko do ińakʼ solha hõ bako ataṅleda, samka sạṭikʼ lạgitʼ okań menletʼ ona do jaṅgateko lebetʼ gańjaokeda;

³¹ Akoakʼ kạmi reakʼ kuṛại doko ńamgea, ar apnarakʼ sopolha reakʼ jotege lacʼko perejtakoa.

³² Lelha hoṛ do muhinteko calakʼge onkoakʼ gujukʼ reakʼ karon do hoyokʼa, bebujko do akoakʼ nicindokʼgeye ḍahao maraokoa;

³³ Menkhan okoe ińakʼ kathako ańjom onko do khạtirjomako girobasokʼa; onko do sulukteko tahena, ar bạṛicʼakʼ do bako botorakʼa.”