Josuạ 1 - সান্তালী বাইবেল

Josuạ cetanre Probhu Isorakʼ hukum

¹ Probhu Isorren guti Moseyakʼ gujukʼ tayom Probhu Isor do Moseren gokʼṛoyicʼ Nanren hopon Josuại metadea,

² “Ińren guti Mose doe gocʼena. Ona iạte ńitokʼ do amge noko Israelko ona jordan gaḍa paromokʼ lạgitʼ sapṛaokom ar okaṭakʼ disạm onkoń emako lạgidokʼkan onḍe bolokʼme.

³ Ar okako jaegare apeakʼ jaṅga talka lebedokʼ onako joto do apeń emapea. Mose ṭhen iń do onageń gokʼleda.

⁴ Apeakʼ disạm do hahaṅkar khon Lebanon hạbicʼ ar purub reakʼ maraṅ gaḍa Uphreṭis hạbicʼ ar pạchim reakʼ maraṅ jalapuri hạbicʼ metakʼme Hittikoakʼ goṭa ṭoṭha.

⁵ Ar tinạkʼ din jiwetʼem tahen celege am upạrte do ohoko teṅgo daṛelena. Cetʼleka Mose sãoteń tahẽkan onkage am sãote hõń tahena; iń do tishõ bạń bạgi giḍimea ar bạń alaemea.

⁶ “Am do daṛean hoyokʼme, ar monre dil dohoyme, ente okaṭakʼ disạm emokʼ reakʼ katha nokoren hapṛamko ṭheniń gokʼletʼ, ona disạm do ạidạri lekate amge onkom hạṭińakoa.

⁷ Daṛean hoyokʼme ar dil dohoyme. Ińren guti Mose okako ạn-ạrikoe em oṭoakatʼ onako moneyakʼme ar dohoyme ona khon thoṛa hõ alom hante natekʼa. Ar onate jãhãregem calakʼ onḍege sarhekʼtama.

⁸ Ạn-ạri reakʼ niạ puthire okako ol menakʼ ona do jao okte amakʼ mocare tahenma. Ar ona jemonem pańja daṛeakʼ onate siń-ńindạm khondrondjoṅa. Onate jotowakʼrege sarhekʼtama ar bhạlại hoyokʼtama.

⁹ Iń do amiń hukum akatʼmea, onate daṛean hoyokʼme ar monre dil dohojoṅme. Ar alom botorokʼa se alom as chuṭạukʼa, ente jãhãtegem senokʼ onḍege amren Probhu Isor do am sãoteye tahena.”

¹⁰ Niạ katha ańjomkate Josuạ do hoṛkoren mukhiyạkoe metatʼkoa,

¹¹ “Ḍerate senkate hoṛko metakope jemon akoakʼ jomakʼ ar ńũiyakʼkote sapṛao akanko tahen. Ente onkoren Probhu Isor okaṭakʼ disạm do sompotti lekateye emako lạgidokʼkan onḍe senkate dokhol lạgitʼ pe din bhitrite nonḍe khon jordan gaḍa paromokʼ hoyokʼtakoa.”

¹² Ruben ar Gad gusṭiren sanamko ar Manase adha gusṭiren hoṛko do Josuại metatʼkoa,

¹³ “Probhu Isor do apeye jirạu ocoakatʼpea ar noa disạm hõ apeye emakatʼpea.’

¹⁴ Jordan reakʼ purub secʼ okaṭakʼ jaega Mose apeye emakatʼpe onḍe do aperen bạhuko, gidrạko ar ạsul janwarkoko tahẽ daṛeakʼa, menkhan ape talare okoe do lạṛhại lạgitʼko oḍok sen daṛeakʼ onko do aperen boehako lahate gaḍa paromokʼ hoyokʼtakoa.

¹⁵ Probhu Isor do tinạkʼ din ape leka aperen boehako jotowakʼ khon bae jirạu ocoko ar tinạkʼ din aperen Probhu Isore emakan disạm ạuriko dokhol unạkʼ din aperen boehakope goṛowakoa. Ar ona tayom dope ruạṛ hijukʼte apeakʼ jaega purạtepe dokholjoṅa one Probhu Isorren guti do jordan purub secʼ apeye emakawatʼpe.”

¹⁶ Onko do Josuạko metadea, “Am okam hukumakatʼle ona dole manaoa ar okarem kolle onḍegele calakʼa.

¹⁷ Cetʼleka ale do Moseyakʼ kathale manao ạguakatʼ, onkage amakʼ hõle manaoa. Amren Probhu Isor do Mose sãote cetʼlekae tahẽkan onkage ape sãote hõ baṛeye tahenma.

¹⁸ Ar jãhãege amakʼ hukum upạrteye teṅgokʼ ar amakʼ katha leka bae calakʼ enḍekhan uni doe gocʼ ocokʼa. Am do eken daṛean hoyokʼme ar dil dohojoṅme.”