Jona 1 - সান্তালী বাইবেল

Jonawakʼ bebatao

^1-2 Probhu Isorakʼ noa katha do Amitạiren hopon Jona ṭhen sodorena, “Am do ona maraṅ nagraha Niniwite senokʼme ar ona upạrte porcarme, ente hoṛkoakʼ bạṛicʼakʼ iń ńel ńametʼ kana.”

³ Menkhan Jona do Probhu ṭhen khon Tạrsiste ńir pharakokʼ lạgitʼe mohnḍayena. Uni do Jopha bondorre senkate Tạrsiste calakʼ reakʼ mitʼṭecʼ Jahaje ńamkeda. Ar bhaṛa em tayom ona jahajreye decʼena ar Probhu Isor ṭhen khon ńir pharakokʼ lạgitʼ Tạrsis secʼe mohnḍayena.

⁴ Unre Probhu Isor do jalapurire mitʼṭecʼ tạpis hoeye kolkeda. Ona iạte nonka botoranakʼ birbão hoe rakapʼena, jahaj do rạpudokʼ leka hoyena.

⁵ Onate jahaj cakʼlaoko do botorte apan ạpinren boṅga ṭhen rakʼ joṅko ehopʼena. Ar jahajre tahẽkan jinisko do jalapuri reakʼ dakʼreko capatʼ khadlekada jemon jahaj rawalokʼtako. Menkhan Jona do noa laharege jahaj bhitrire bolokateye giticʼente acete jạpitʼ akatʼ tahẽkana.

⁶ Unre jahajren cakʼlaoicʼ do Jona ṭhen senkateye metadea, “Cekate galasaṅem jạpitʼ akada? Ma beretʼme ar amren debota hohoaeme. Pasere pase uni do aboe beṅgetʼ abon ar onatebon bańcao daṛekokʼ.”

⁷ Ar jahaj cakʼlaoko hõ ako akoreko mepenena, “Noa muhinren dạyi do okoeye hoedaṛekokʼa, onate dela gulibãṭkate bon ńelma.” Arko gulibãṭketʼ khan onare Jonawakʼ ńutumge rakapʼena.

⁸ Unre onko do Jonako kulikedea, “Ma lạiyaleme, muhinre bon paṛao akanren dusi hoṛ doe okoekana? Am do cetʼkom kạmikana? Ar oka khonem hecʼakana? Am dom oka disạmren hoṛ kana? Ar oka jạtren kanam?”

⁹ Jonae roṛ ruạṛkeda, “Iń do mitʼṭen Ibri hoṛ kạnạń. Iń do sermaren Probhu Isoriń sewawae kana. Unige jalapuri ar ot doe benaoakada.”

¹⁰ Ar Probhu Isor ṭhen khone ńir pharakokʼ kan onko do onako baḍaekeda, ente Jona do ona kathae lạiyatʼkoa. Onate onko do botorente uniko kulikedea, “Noa do cetʼem ceka akada?”

¹¹ Jalapuri reakʼ haḍak ḍabakokʼ ḍheoko do arhõ tạpis idikʼkante uniko kulikedea, “Jalapuri jemon ḍelḍelokʼ ona lạgitʼ am dole cekamea?”

¹² Jonae roṛ ruạṛkeda, “Doreãore giḍikạńpe enḍekhan jalapuri do ḍelḍel thirokʼa. Ińiń baḍaea, ińakʼ dos iạtege noa birbão hoe do apere paṛao akana.”

¹³ Enhõ onko cakʼlaoko do ona baṅkate ghuṭu secʼ jahaj calao idiko kurumuṭukeda; menkhan bako daṛeada, ente jalapuri reakʼ haḍak ḍabakokʼ do arhõ bạṛti idiyena.

¹⁴ Unre onko do Probhu Isor hohoadeteko menkeda, “E Probhu Isor, nui hoṛakʼ gujukʼ iạte alo jemonle gujukʼ. Ar mitʼṭen miridos hoṛakʼ gujukʼ iạte ale do alom dusi ocolea, ente E Probhu Isor, am do amakʼ sana lekam kạmikana.”

¹⁵ Ona tayom onko do Jonako sapʼkedete jalapuri reakʼ dakʼreko khadlekedea, ar onate haḍak ḍabakokʼkan jalapuri do ḍelḍel thir hapeyena.

¹⁶ Ona iạte hoṛko do Probhu Isor ạḍiko botoradea. Onko do Probhu Isor ńutumte janwar dãṛẽko samaṅketʼkoa ar manotakʼko dohokeda.

¹⁷ Probhu Isor do Jona ude lạgitʼ mitʼṭen maraṅ okocʼ hakoe ṭhik dohoakade tahẽkana. Ar Jona do uni hakoakʼ lacʼre pe siń pe ńindại tahẽyena.