Joel 1 - সান্তালী বাইবেল

Pohokoakʼ akromon ar mon ạcur reakʼ hoho

¹ Pethuel hopon Joel ṭhen Probhu Isorakʼ katha do sodorlena.

² E murubbiko, ape do noa katha ańjompe; E disạmre girobasokʼ kan hoṛko, apehõ ańjompe. Ape se aperen hapṛamkoakʼ oktere nonkan ghoṭna do cetʼ jãhãtis hoylena?

³ Niạ ghoṭna reakʼ katha do aperen hopon ar hoponerako lạiyakope ar onko hõ akoren hopon ar hoponera ṭhenko lạima ar onkoren hopon ar hoponerako do akoren bõsko lạiyakoma.

⁴ Jojom pohoko okaṭakʼko sarecʼ oṭokakʼ ona do dodon pohoko jomkeda; dodon pohoko okaṭakʼko sarecʼ oṭokakʼ ona do jal jalte jojom pohoko jomkeda; ar jal jalte jojom pohoko okaṭakʼko sarecʼ oṭokakʼ ona do rehetʼ sindetʼ jojom pohoko jomkeda.

⁵ E bul bhutạṛ hoṛko, ma cetaokʼpe ar rakʼjoṅpe. E sanam bubulakʼ hoṅgorko, ape do ṭaṭka darkha rasa reakʼ bubulakʼ lạgitʼ homorpe, ente apeakʼ moca khon ona do recʼ ocoakana.

⁶ Mitʼ jạtrenko do ińakʼ disạmko akromon akada; onko doko daṛeangea ar onkoren lạṛhại phạdko do alekha. Onkoakʼ ḍaṭa do dhạcri kulakʼ ḍaṭa leka ar onkoakʼ laser ḍaṭa do kul eṅgawakʼ jambe ḍaṭa leka.

⁷ Onko do ińakʼ darkha nạ̃ṛĩko nosṭo akada ar loa dare reakʼ ḍạr hõko rạputʼ akada. Ar ona reakʼ chal chaḍaokateko giḍiakada; onate ḍạrko do ponḍ akana.

⁸ E ińren hoṛko, okoe kũạri kuṛi do acʼakʼ juạn oktere acʼrene hoyokʼ lạgidokʼkan jãwãeakʼ gujukʼ iạte gõṛẽ kicricʼ horokʼkateye homoretʼkan ape do uni leka homorpe.

⁹ Probhu Isorakʼ oṛakʼ khon jomakʼ samaṅokʼakʼ ar coḍor samaṅokʼakʼ porob do sahaṛ akana. Okoe Probhu Isorko sewawae kan tahẽkan onko naekeko doko homor halaṅeda.

¹⁰ Sanam khetko do nosṭo akana, ot doe homoretʼkana, ente phosol do nosṭo caba akana, nãwã darkha rasa ańjetʼakana ar sunum hõ caba hijukʼkana.

¹¹ E cacasko, lajaokʼpe baṛe; ar okoe do darkha nạ̃ṛĩpe jotonetʼkan, ape do guhum ar jao lạgitʼ homor halaṅpe; ente khet reakʼ phosol do nosṭoakana.

¹² Darkha nạ̃ṛĩ do rohoṛ akana ar loa dare hõ gujukʼkana; ḍạlim dare, khijur dare, apel dare ar khet baṛge reakʼ joto dareko do rohoṛakana. Ar hoṛko tala khon rạskạ hõ caba akana.

¹³ E naekeko, ape do gõṛẽ kicricʼ horokʼkate homor halaṅpe; ar okoeko pinḍre sewa reakʼpe kạmikan ape do rakʼ homorpe. Okoe ińren Isorpe sewawae kan ape hõ hijukʼte gõṛẽ kicricʼ horokʼkate ńindạ tahẽ aṅgakʼpe, ente aperen Isorakʼ oṛakʼre jomakʼ samaṅokʼ ar coḍor samaṅokʼakʼ porob do akoṭakana.

¹⁴ Ape do sonot upạs reakʼ bebostaepe; mitʼṭecʼ sabha baṛe hoeocoype. Murubbiko ar disạmre girobasokʼ kan sanamko aperen Probhu Isorakʼ oṛakʼre hoho ạgukope ar Probhu Isor ṭhen rakʼ joṅpe.

¹⁵ Hae, hae, ona botoranakʼ din do! Ente Probhu Isorakʼ din do seṭerakana; jarkharakʼ din lekate ona din do phạdkoren Probhu Isor ṭhen khonge hijukʼkana.

¹⁶ Aboakʼ mẽtʼãhã samaṅrege jomakʼ ar aboren Isorakʼ oṛakʼ khon rạskạ ar hulạs do cetʼ baṅ sahaṛakana?

¹⁷ Itạko do ḍhelka hasa latarre rohoṛ roṅgoyena. Phosol reakʼ murại do jarkharena, gola oṛakʼ do jotoge rạputʼ giḍi ocoakana, ente phosol do jhãorayena.

¹⁸ Mĩhũ merom doko kuhrạũkʼkana! Gại ḍaṅgra pal doko anḍrokʼ sanḍrokʼ baṛaekana, ente onkoakʼ ạtiń ṭạnḍi do bạnukʼtakoa; ar bhiḍi merom doko andakʼ tawakʼ baṛaekana.

Probhu Isor ṭhen Joelakʼ katha

¹⁹ E Probhu Isor, iń do amgeń hohoam kana, ente ạtiń ṭạnḍiko do seṅgele jomakada ar seṅgel reakʼ lepʼ do ṭạnḍi reakʼ sanam darekoe lo roṅgo akada.

²⁰ Bir janwarko hõ am ṭhenko rakʼeda, ente ạtukʼ dakʼ do ańjetʼ rohoṛakana ar hahaṅkar reakʼ ạtiń ṭạnḍiko hõ seṅgele jomakada.