Jobakʼ 1 - সান্তালী বাইবেল

Soetan do Jobe biḍạuede

¹ Kus disạmre Job ńutuman mitʼṭen hoṛe tahẽkana. Uni do bindusạn ar dhorom hoṛgeye tahẽkana. Uni do Isore botorae kan tahẽkana ar bạṛicʼakʼ khon sạṅgińreye tahenkan tahẽkana.

² Uniren do eae goṭen koṛa ar pea kuṛi hoponko tahẽkantaea.

³ Ar eae hajar bhiḍiko, pe hajar ũṭko, mõṛẽsae joṛa ḍaṅgra ar mõṛẽsae gadhako tahẽkantaea. Purub disạmren hoṛko modre unige jotoko khon kisạ̃ṛgeye tahẽkana.

⁴ Uniren hoponko do pạli pạlite apan ạpin oṛakʼreko bhojetʼ tahẽkana ar onko tulucʼ jom ńũi lạgitʼ hoṛ kolkate akoren pea boeha kuṛiko neotayetʼko tahẽkana.

⁵ Onkoakʼ bhoj reakʼ dinko sạtlen khan Job do onko hoho ạgukateye sonotetʼko tahẽkana. Uni do setakʼre onko lạgitʼ mimitʼ goṭenkate jeredokʼ samaṅokʼakʼ porobe hoeocoyetʼ tahẽkana. Uni doe hudisetʼ tahẽkana, “Ińren hopon ar hoponerako do pasecʼko kại akada ar mone monete Isorko henosta akadea.” Job do nonka jaogeye kạmikan tahẽkana.

Jobakʼ pạhil biḍạu

⁶ Mitʼdin sermaren goḍet do Probhu Isor samaṅreye senena ar Soetan hõ uni sãoteye hạjirena.

⁷ Unre Probhu Isor do Soetane kulikedea, “Am do oka khonem hecʼena?” Soetan do Probhu Isore roṛ ruạṛadea, “Dhạrti khon hante nate dãṛãbaṛa dãṛãbaṛate nonḍeń hecʼena.

⁸ Unre Probhu Isor do Soetane metadea, “Ińren guti Job do cetʼem kheyal akadegea? Dhạrtire uni lekan do ar celege bạnukʼkoa. Uni do bindusạn are dhoromgea. Uni do ińe botorạń kana ar sanam lekan bạṛicʼakʼ khon sạṅgińreye tahenkana.”

⁹ Unre Soetane menkeda, “Job do cetʼ emni emnitegeye botoram kana?

¹⁰ Am do cetʼ uni beṛhaete ar uniyakʼ oṛakʼ ar okako menakʼtae ona beṛhaete cetʼ bam esetʼ ạcurakadea? Am do unim bhor akawadea, onate uniren ạsul janwarkote disạm do perecʼ akana.

¹¹ Menkhan ma ti tiạrkate uniyakʼ jotowakʼre hạneme, enḍekhan khạṭige uni do am samaṅre henosta reakʼ kathae roṛa.”

¹² Unre Probhu Isor do Soetane metadea, “Bhagegea, uniyakʼ okako menakʼ ona do amakʼ tireń jimạkeda, menkhan uniyakʼ hoṛmo cetanre mitʼṭecʼ kạṭupʼ hõ alom calaoa.” Unre Soetan do Probhu Isor samaṅ khone oḍok calaoena.

Jobren hopon ar hoponerako, mĩhũ-meromko ar dhonko maraokʼkan

¹³ Mitʼdin Jobren hopon ar hoponerako do akoren maraṅ utạricʼ boehawakʼ oṛakʼreko jom-ńũiyetʼkan tahẽkana.

¹⁴ Nonkan jokhecʼ mitʼṭen hoṛ do hecʼkate Jobe metadea, “Amren ḍaṅgrakote do jumiko casetʼ tahẽkana ar gadha eṅgakohõ sorregeko ạtińkan tahẽkana.

¹⁵ Unre Sibayiko do luluṭ hecʼkate onkoko idiketʼkoa. Ar amren gutiko doko gocʼketʼkoa. Am khoboram lạgitʼ eken iń eskargeń paskao hecʼ akana.”

¹⁶ Uni hoṛ do unhõ kathae roroṛkan tahẽkanrege ar mitʼ hoṛ do hecʼkateye menkeda, “Serma khon Isorakʼ seṅgel ńurente amren bhiḍiko ar gutikoe maraoketʼkoa. Ar am khoboram lạgitʼ iń eskargeń sarecʼ akana.”

¹⁷ Dosaricʼ hoṛ do unhõ kathae roroṛkan tahẽkanrege ar mitʼ hoṛ do hecʼkateye khobore lạikeda, “Kolodiạko do pe hạṭińte hạṭińkate amren ũṭkoko idiketʼkoa. Onko do amren gutikoko gocʼketʼkoa. Ar am khoboram lạgitʼ eken iń eskargeń paskao akana.”

¹⁸ Tesaricʼ hoṛ do unhõ kathae roroṛkan tahẽkanrege ar mitʼ hoṛ do hecʼkateye menkeda, “Amren hopon ar hoponerako do akoren maraṅicʼ boehawakʼ oṛakʼreko jom-ńũiyetʼ tahẽkana.

¹⁹ Unre hahaṅkar khon ackage mitʼṭecʼ birbão hoe rakapʼ hecʼena ar ona oṛakʼre bajaoena. Onate oṛakʼ do onko cetanre ńurena ar onko doko gocʼ cabayena. Ar am khoboram lạgitʼ eken iń eskargeń sarecʼ akana.”

²⁰ Niạ katha ańjomkate Job doe beretʼente mon reakʼ kosṭote kicricʼe oṛecʼkeda are munḍrạyena. Ona tayom otre ombakʼkate Isor sewawadeteye menkeda,

²¹ “Eṅgatakʼ lacʼ khon iń do uluṅgeń hecʼlena ar uluṅgeń calakʼa. Probhu Isorgeye emadiń tahẽkana ar Probhu Isorgeye idiketʼkoa; Probhu Isorakʼge sarhao hoyokʼtaema.”

²² Niạko hoyenre hõ Job do bae kạileda se Isor hõ bae dusiledea.