Jesaea 1 - সান্তালী বাইবেল

¹ Jihudi disạmren Usiạ raj, Jotham raj ar Hiskiạwakʼ rajokʼ oktere Amosren hopon Jesaea do Jihudạ ar Jerusalem reaṅ oka dorsone ńamletʼ ona reaṅge nonḍe do ol akana.

Mitʼṭen huhulkan jạtrenko

² E serma ańjomme, E pirthimi ańjomme, Probhu Isore meneda, “Iń do hoponkoń joton hara akatʼkoa, menkhan onko do iń upạrteko hul akada.

³ Ḍaṅgra do acʼren kisạ̃ṛe oromedea, gadha hõ acʼren mạlikakʼ nandware oromeda, menkhan Israel do acʼren mạlik bae baḍaeyede kana, ar ińren hoṛ hõ iń do bako bujhạu edeńkana.”

⁴ Hae! Onko do kạite perecʼ mitʼṭen jạtrenkoge, dusi reakʼ bojhate perecʼ hoṛge, behoketʼren bõskoge, bạṛicʼakʼ kạmiyetʼkan hoponkoge. Onko do Probhu Isorko bạgi giḍi akadaea ar Israelren uni sonoticʼko nihạ̃t akadea arko dea giḍi akadea.

⁵ Ape do cedakʼ dalpe joma? Cedakʼ huhultegepe tahena? Ape do bohokʼrepe ghạl ocoakana, ar goṭa ontor do nijorgetapea.

⁶ Jaṅga talka khon bohokʼ upʼ hạbicʼ okare hõ niphuṭ do bạnukʼanaṅ, eken ghạl, dal reakʼ cinhạ ar ghaoko menakʼa. Ona do baṅ sapha akantapea se bedhao hõ baṅ hoyakana, ar sunum dulakʼte haso hõ baṅ komao akantapea.

⁷ Apeakʼ disạm do ujạṛ akantapea, nagrahako do seṅgelte jarkhar akana. Apeakʼ khetko reakʼ phosolko do apeakʼ mẽtʼ samaṅrege porjạtrenko luṭ idiyetʼ kana; ar bidisiạko do disạmko jarkhar akada.

⁸ Sion hoponera do nonkae bạgi giḍi ocoakana uni do darkha bagwanren pahradar oṛakʼ lekae hoyakana, uni do phosol goḍaren ḍera oṛakʼ ar bạiriko hotete gherao ạcurakatʼ mitʼṭecʼ nagraha lekageye hoyakana.

⁹ Phạdkoren Probhu Isor do abo lạgitʼ adom adom hoṛko jiwetʼ bae doholeko khan enḍekhan aboakʼ dosa do Sodom ar Gomora leka hoykokʼa.

¹⁰ E Sodomren mukhiyạko, Probhu Isorakʼ katha baṛe ańjompe. E Gomoraren hoṛko, aboren Isorakʼ bondobos reakʼ baṛe luturakʼpe.

¹¹ Probhu Isore meneda, “Aperen jãhãn teṅgenokʼko do baṅ jạruṛạńạ. Bheḍa ar lodgopʼ posao janwarkoakʼ itil reakʼ jeredokʼ samaṅokʼakʼ iń do bạń hạ̃sakʼ kana; ḍaṅgra, bheḍa ar meromakʼ mãyãm hõ bạń kusiyakʼ kana.

¹² Ape do iń ṭhenpe jarwakʼ ar ińakʼ racape lebetʼ gańjaotiń, noa do ape ṭhen okoeye khojkana?

¹³ Ạuṛiyakʼ samaṅokʼakʼ jinis do ar alope ạguiya. Iń do apeakʼ dhup jeredokʼakʼ doń hirkhạwakʼ kana. Molokʼ cando, jirạukʼ mãhã, dhorom sabha ar porobko reakʼ bedhoromakʼ kheloḍko iń do ar bạń sahao daṛeakʼ kana.

¹⁴ Apeakʼ molokʼ cando reakʼ rạskạ ar niṭ akatʼ porobko doń hirkhạwakʼ kana. Iń ṭhen noako do bojha leka hoyakana; noako gokʼ gokʼte iń doń laṅga caba akana.

¹⁵ Koejoṅ lạgitʼ tinre apeakʼ tipe rakabtapea unre ape secʼ do bạń beṅgeda. Ar ḍherpe koere hõ bạń ańjomtapea, ente apeakʼ ti do mãyãmte perecʼgetapea.

¹⁶ Ape do apnartetʼ khạṭikʼpe ar saphakʼpe. Ińakʼ mẽtʼãhã samaṅ khon apeakʼ sanam bạṛicʼ kạmiko sạṅgiń giḍikakʼpe; ar onako alope kạmiya.

¹⁷ Bhageakʼ kạmi reakʼ cetʼ joṅpe, hok reakʼ bicạrpe, sasantaoko sudhrạukope, reṅgecʼko secʼ tahenpe, ar rạnḍi maejiukoakʼ teṅgo goṛowakope.”

¹⁸ Probhu Isor do arhõe meneda, “Dela hijukʼpe, ńitokʼ bon galmarao phanḍaolege. Ente apeakʼ sanam kạiko sindur leka arakʼ akanre hõ enhõ ona do him leka ponḍokʼa; ar jeṅgetʼ arakʼ kanre hõ enhõ ona do bhiḍi upʼ leka ponḍokʼa.

¹⁹ Ape do tabe akan tahenpe aṅgocetʼ khan enḍekhan disạm reakʼ joto khon bhage phosolpe joma,

²⁰ menkhan tabe akae bape aṅgoc arpe hul enḍekhan khạṭige tarwaṛetepe marao ocokʼa.” Probhu Isor do acʼge niạ kathae roṛeda.

²¹ Hae, kũạri nagraha, ona do kusumbi leka hoyakana! Mitʼ okte uni do hok reakʼ bicạrte perecʼe tahẽkana; unire dhorom tahẽkana, menkhan ńitokʼ do khũniạhikoko girobasokʼ kana.

²² Amakʼ rupạ do mạilạ akana; amakʼ bhage darkha rasare do dakʼ mesal akana.

²³ Amren disạm cakʼlaoko do huhulko ar kombṛokoren gateko hoyakana; sanamkoge ghusko kusiyakʼa ar sandesko khoja. Onko do reṅgecʼ hoṛko secʼ bako teṅgon kana ar rạnḍi maejiukoakʼ mambla hõ onko ṭhen do baṅ seṭerokʼ kana.

²⁴ Ona iạte phạdkoren Probhu, Israelkoren daṛeanicʼ Isore meneda, “Aha, iń secʼren okoeko baṅkan onko khon iń do rukhiyạń ńama ar ińren bạiriko cetanreń hala hạliya.

²⁵ Am upạrte ińakʼ tiyiń rakab tińạ. Ar amakʼ mạilạ do kharteń oḍok giḍikakʼa ar amakʼ sanam bhejal doń sạṅgiń giḍikakʼa.

²⁶ Lahateakʼ dinko leka iń do disạm cakʼlaoko ar sopolhakoń emama; ar ona tayom do dhorom reakʼ nagraha, ar kũạri nagraham men ocokʼa.”

²⁷ Isor do acʼakʼ hokʼ reakʼ bicạrte Sione chaḍaoa, ar okoe kại khon monko ạcur onko do acʼakʼ dhoromteye chaḍaokoa.

²⁸ Menkhan huhulko ar kạikại hoṛ do jotoge mitʼ sãoteko maraokʼa, ar okoe Probhu Isorko bạgi akade onko doko caba utạrokʼa.

²⁹ “Hẽ, ape okoe do debdạru darepe sewawakʼ kan tahẽkan ape do ona iạtepe lajao ocokʼa, ar okako bagwanrepe sewayetʼ tahẽkan ona iạtepe nihạ̃t ocokʼa.

³⁰ Ape do ona debdạru dare lekan kope hoyokʼa one oka reakʼ sakam do tolmojokʼkan; ar ona bagwan lekan kope hoyokʼa one oka do dakʼte baṅ paṭao akatʼ.

³¹ Daṛean hoṛko do rohoṛ busupʼ lekan kope hoyokʼa, ona reakʼ kạmi do seṅgel reakʼ alaṅ leka. Ona do mitʼ dhaogeye lokʼa; ar okoehõ ona seṅgel do bako ĩṛĩcʼ daṛeakʼa.” bańcaoicʼ