Jeheskel 1 - সান্তালী বাইবেল

Jeheskelakʼ pạhil dorson (1.1-27) Isorakʼ singhạson

¹ Pegel bochor reakʼ ponakʼ cando reakʼ mõṛẽakʼ dinre Kebar gaḍa aṛere bondi akan hoṛko talareń tahẽkanre iń samaṅre serma do jhicʼena ar Isorakʼ dorson iń ńelkeda.

² Un okte do Jehoyakin rajakʼ bondi tayom mõṛẽakʼ bochor tahẽkana.

³ Babelrenkoakʼ disạmre Kebar gaḍa aṛere Busiren hopon Jeheskel ṭhen, metakʼme Probhu Isorakʼ katha do iń ṭhen sodorena. Ar onḍe Probhu Isorakʼ ti do iń cetanre tahẽkana.

⁴ Iń do beṅgetʼ rakapʼketʼteń ńelkeda utạr secʼ khon mitʼṭecʼ birbão hoe hijukʼkana, mitʼṭecʼ maraṅ rimilre bijli malkaokʼ kana ar ona beṛhaete do jhak jhak marsal tahẽkana. Ona bijli talare pitạl reakʼ jhalkaokʼkan mitʼṭecʼ marsal tahẽkana.

⁵ Iń do onḍe ponea jiwetʼ jiwiyanko lekań ńelketʼkoa. Onko do ńelokʼte manwa lekako tahẽkana,

⁶ menkhan onko mimitʼkoakʼ do poneakate mẽtʼãhã ar poneakate phạ̃kṛạ̃kʼ tahẽkantakoa.

⁷ Onkoakʼ jaṅga do sojhege ar jaṅga thopa do mĩhũwakʼ khurạ leka tahẽkana; onako do jhalkaokʼkan pitạl leka tahẽkana.

⁸ Onkoakʼ beṛhaeteakʼ phạ̃kṛạ̃kʼ latarre do manwa tige tahẽkana. Onko mimitʼko do mẽtʼãhã ar phạ̃kṛạ̃kʼ tahẽkantakoa,

⁹ onkoakʼ phạ̃kṛạ̃kʼko do mitʼṭecʼ tulucʼ eṭakʼakʼ sãote jakʼ akan tahẽkana. Onko do jotoge laha secʼko calakʼkan tahẽkana, ar calakʼ jokhecʼ do bako ạcur ruạṛokʼkan tahẽkana.

¹⁰ Onkoakʼ mẽtʼãhã reakʼ muṭhạn do manwa muṭhạn lekage tahẽkana ar onko mimitʼkoakʼ jojomsa aṛe reakʼ muṭhạn do dhạcri kulakʼ mẽtʼãhã leka, ar leṅga secʼakʼ muṭhạn do ḍaṅgra mẽtʼãhã leka ar mitʼṭenkate pajhạṛ cẽṛẽyakʼ mẽtʼãhã leka hõ tahẽkantakoa.

¹¹ Onkoakʼ mẽtʼãhã do nonkage tahẽkana. Onkoakʼ phạ̃kṛạ̃kʼ do coṭ secʼ laplapa tahẽkana; mimitʼkoakʼ banar phạ̃kṛạ̃kʼ do uni banar secʼren jiwiyanicʼakʼ phạ̃kṛạ̃kʼre jakʼ akan tahẽkana, ar barea phạ̃kṛạ̃kʼte do hoṛmo esetʼge tahẽkantakoa.

¹² Onko mimitʼko do akoakʼ mẽtʼãhã lekate beṛhaeteko laha daṛeakʼkan tahẽkana. Onko jiwetʼ jiwiyankoren jiu oka secʼe calakʼkan tahẽkan onko hõ ontegeko calakʼkan tahẽkana, ar calakʼ jokhecʼ do bako ạcurkan tahẽkana.

¹³ Noko jiwetʼ jiwiyanko talare do aṅgra se mosal seṅgel leka jolokʼkan tahẽkana ona do onko jiwiyanko bhitrite oḍok bolokʼkan tahẽkana; ona seṅgel do jhalkaokʼkan tahẽkana ar ona tala khon bijliko oḍok hijukʼkan tahẽkana.

¹⁴ Jiwetʼ jiwiyanko do bijli malkaokʼ lekako calao hijukʼkan tahẽkana.

¹⁵ Onko jiwetʼ jiwiyanko secʼ iń beṅgetʼketʼ khan ponea jiwiyanko pheḍre otre mimitʼ goṭecʼ pạihạ̃ń ńelkeda.

¹⁶ Ona pạihạ̃ko reakʼ goṛhon do nonka leka tahẽkana- Boidorjomuni mạnik leka jhakjhak ar ona pạihạ̃ko ńelokʼte do mitʼge tahẽkana. Mitʼṭecʼ bhitrire armitʼṭecʼ pạihạ̃ menakʼa leka onako do benao tahẽkana.

¹⁷ Pạihạ̃ko tinre guṛdạukʼkan tahẽkana unre onko jiwiyanko beṛhaete jãhãsecʼge sojhete calakʼkan tahẽkana; calakʼ jokhecʼ pạihạ̃ko do baṅ ạcur ruạṛokʼkan tahẽkana.

¹⁸ Ona pạihạ̃ko do ạḍi maraṅ ar botorge tahẽkana ar ponea pạihạ̃ reakʼ beṛhaete do mẽtʼkote perecʼ tahẽkana.

¹⁹ Jiwetʼ jiwiyanko calakʼ jokhecʼ ona pạihạ̃ko hõ calakʼkan tahẽkana; jiwiyanko ot khonko rakapʼlen tayom pạihạ̃ko hõ rakabokʼkan tahẽkana.

²⁰ Jiwiyankoren Jiu do tinre jãhã secʼe calakʼkan tahẽkana pạihạ̃ko hõ ona são sãote calakʼkan tahẽkana, ente onko jiwetʼ jiwiyankoakʼ jiu do ona pạihạ̃rege tahẽkana.

²¹ Jiwiyanko tinreko calakʼkan tahẽkana unre pạihạ̃ hõ calakʼkan tahẽkana; ar jiwiyankoko teṅgokʼkan tahẽkanre pạihạ̃ko hõ teṅgokʼkan tahẽkana; arhõ jiwiyanko ot khonko rakapʼlenre pạihạ̃ko hõ onko são sãote rakabokʼkan tahẽkana, ente onko jiwetʼ jiwiyankoren jiu do pạihạ̃kore tahẽkana.

²² Onko jiwetʼ jiwiyankoakʼ bohokʼ cetanre cetʼ coṅ aṭetʼ akan tahẽkana; ona do him leka ponḍ ar botorge tahẽkana.

²³ Ona latarre onkoakʼ phạ̃kṛạ̃kʼ do laplapa akatʼ tahẽkana ar mitʼṭen reakʼ phạ̃kṛạ̃kʼ do eṭakʼ ar mitʼṭecʼ phạ̃kṛạ̃kʼre jakʼ akan tahẽkana. Eṭakʼ banar phạ̃kṛạ̃kʼte do mimitʼkoakʼ hoṛmoe esetʼkakʼ tahẽkana.

²⁴ Jiwiyankoko calaoen tayom iń do onkoakʼ phạ̃kṛạ̃kʼ reakʼ sabadiń ańjomkeda; ona do banbạsi ar ạtukʼ dakʼ reakʼ saḍe leka ańjomokʼkan tahẽkana, sanam daṛeanicʼ reakʼ aṛaṅ leka tahẽkana, mitʼṭen lạṛhại phạdkoakʼ kạumạu lekage. Jiwiyankoko teṅgokan tahẽkanre phạ̃kṛạ̃kʼ doko samṭaokatako kan tahẽkana.

²⁵ Onko do phạ̃kṛạ̃kʼ samṭaokate tinreko teṅgokʼkan tahẽkana unre onkoakʼ bohokʼ cetan reakʼ ona ṭhạ̃i khon mitʼṭecʼ aṛaṅ ańjomena.

²⁶ Ar onḍe nilkanto mạnik reakʼ siṅghạson leka ńelena. Ar ona coṭre menakʼ siṅghạson cetanre manwa muṭhạn leka mitʼ hoṛiń ńelkedea.

²⁷ Iń doń ńelkedea ḍanḍa khon cetan hạbicʼ uni do ńelokʼte jhalkaokʼkan pitạl leka, ona do seṅgelte perecʼ, ar ḍanḍa khon latar hạbicʼ do seṅgel leka ńelokʼkan tahẽkana; ar beṛhaete do marsalge tahẽkana.

²⁸ Dakʼ dinre rimil tala khon liṭạ akʼ leka ona beṛhaete ona marsal do ńelokʼkan tahẽkana. Okań ńelketʼ ona do Probhu Isorakʼ ṭhonokge tahẽkana. Ona ńelte iń do otreń ombakʼena ar mitʼ hoṛ katha roroṛiń ańjomkedea.