Jakob 1 - সান্তালী বাইবেল

¹ Isor ar Probhu Jisu Mạsiren golam iń Jakob do dhạrti reakʼ sanam jaegareko chirchạtur akan Jihudikoren gelbar bõsrenko johariń emakokana.

Biswạsikoakʼ biḍạu

² E ińren boehako, ạḍi lekan biḍạurepe paṛaokʼlenre ona do rạskạ reakʼ kana mente alope hudisa,

³ entepe baḍaegea biswạs reakʼ biḍạuge apeakʼ soboriye baḍhao ocoyeda.

⁴ Ar ona soborige apeakʼ jionre purạte kạmire lagaope, jemon gạkhuṛ arpe niphuṭ utạr daṛeakʼ, metakʼme apeakʼ colonre okulạn alo tahen ma.

⁵ Apeko modre jãhãe akelteye khaṭoge khan uni do Isor ṭhene koejoṅ ma, ar Isor do onae emaea, ente uni do begor ạṛiste mimitʼko asambheṛe danakoa.

⁶ Menkhan uni hoṛ do begor digdhạte pạtiạukʼ salakʼ koejoṅ hoyokʼtaea, ente okoeye digdhạkʼ uni do hoete sokojokʼkan jalapuri reakʼ ḍheoko lekanae; hoege uni doe ṭhelao idiyea.

⁷ Nonkan hoṛ do Probhu Isor ṭhen khon jãhãnakʼe ńama mente aloe asokʼma.

⁸ Uni doe bar monan hoṛkana ar joto kạmirege bae ṭarhaokʼa.

⁹ Okoeṭakʼ biswạsi boehae nindhạnge, ar Isor do uniye usulkedete apnarte bhạganicʼe hudisokʼma.

¹⁰ Ar okoeye kisạ̃ṛge, Isor do uniye nindhạnkedete uni hõ apnarte bhạganicʼe bujhạukʼma, ente uni do ghãs reakʼ baha lekageye mosotʼ cabakʼa.

¹¹ Siń cando jharla jhạrli setoṅanteye rakapʼlenre ghãsko do rohoṛokʼa ar ona reakʼ sajaotetʼ do nosṭo cabakʼa. Onkage kisạ̃ṛ hoṛ hõ acʼakʼ jion reakʼ horkoreye tolmocʼ cabakʼa.

¹² Bhạgangeae uni do one okoe biḍạureye sombhuriyetʼkan, ente lek kanae menteye sạbudlen khan uni do jit reakʼ mala lekate jione ńama. Ar okoe Isorko dulạṛedekan onko do jion emako lạgitʼe gokʼakatʼkoa.

¹³ Jãhãege ontorre kại secʼe orokʼkana menteye bujhạule khan aloe menma, “Isor do kại secʼe oreń kana mente.” Ente jãhãn bạṛicʼakʼge Isor do kại horte bae idi daṛeaea.

¹⁴ Ontor reakʼ bạṛicʼ sanage manwa do kại secʼe or idiyedekana ar ghaḍlakʼreye giḍiyea.

¹⁵ Ona tayom bạṛicʼ sana purạulen khan kạiye janama, ar kại perecʼlen khan gujukʼe janam ocoya.

¹⁶ E ińren dulạṛiạ boehako, alope bhula.

¹⁷ Jion reakʼ mimitʼ bhage ar niphuṭ dan do serma khon pheḍ hijukʼ kana, ona do Isor ṭhen khonge hijukʼ kana, ar uni do sanam marsalkoren Baba kanae. Uni do parom calakʼkan umul leka bae pheraokʼa.

¹⁸ Acʼakʼ nij sanate sạriyakʼ katha hotete uni do acʼren gidrạkoe hoyocoketʼ bona, jemon uniyakʼ sirjonre pạhil utạrakʼ jo bon hoydaṛeakʼ.

Ańjomkate ona leka kạmi reaṅ

¹⁹ Ińren dulạṛiạ boehako, ińakʼ noa katha hetawakʼtińpe, ape mimitʼko ańjom lạgitʼ gagojokʼpe, menkhan usạrate katha alope roṛgoda se alope raṅgao godokʼa;

²⁰ ente abo ṭhen khon Isor oka dhorom jione asokʼkan ona do raṅgao talate oho hecʼlena.

²¹ Onate joto lekan bedhorom ar bạṛicʼakʼko ńit hõ apeakʼ jionre menakʼ khan ona do bạgiyakʼpe. Isorakʼ katha reakʼ itạ one oka do apeakʼ ontorre rohoe akan ona baṛe mạ̃hir salakʼ ataṅpe. Ar kại khon bańcaope reakʼ ektiạri do noa katharege menakʼa.

²² Eken Isorakʼ katha ańjomkate do baṅ hoyokʼa, onaleka kạmi hõ lagaokʼa. Eken Isorakʼ kathagepe ańjom ar ona leka bape kạmi enḍekhan ape do apnartegepe ṭhokakʼ kana.

^23-24 Okoe eken ona kathae ańjom menkhan ona leka bae kạmi uni do nonkan hoṛ lekanae, okoe do ạrsire acʼakʼ rup ńelkate unregeye hiṛińgotʼetʼkan.

²⁵ Menkhan okaṭakʼ purạ ạn manwa do sạdhintetʼe danae ona secʼ okoe mońjteye beṅged are hetawakʼ, uni do ona ạn reakʼ katha ańjomkate bae hiṛińa bickom ona lekae kạmiya. Onate uni do acʼakʼ sanam kạmire bhore ńama.

²⁶ Okoe apnarte dhorome hudisokʼkan menkhan acʼakʼ alaṅ bae sambṛao daṛeakʼkan uni do apnargeye bulạukʼkana. Ar uniyakʼ dhorom korom do ạuṛiyakʼgetaea.

²⁷ Rạnḍi maejiu ar tũạr amarko dukokʼ jokhecʼ hiriko ar dhạrti reakʼ joto lekan bạṛicʼakʼ khon apnartetʼ sahaṛ akae tahenge hoyokʼkana Isorakʼ mẽtʼre sạri dhorom ar khạṭitetʼ.