Hosea 1 - সান্তালী বাইবেল

¹ Jihudạren raj Usiạ, Jotham, Ahas ar Hiskiạwakʼ rajokʼ oktere ar Israel raj Joasren hopon Jerobiamakʼ oktere Beriren hopon Hosea ṭhen Probhu Isorakʼ katha do sodorena.

Hosearen bạhu ar uniren hopon ar hoponerako

² Hosea hotete pạhil dhao katha roṛ jokhecʼ Probhu Isor do uniye metadea, “Am do senkate mitʼṭen kusumbi ayo baplayem. Ar laṭghaṭren hoponko omonjoṅme, ente disạmren hoṛko do ạḍitetʼko laṭghaṭeda Probhu Isorko bạgi akadete.”

³ Onate Hosea do Diblayimren hoponera Gomere baplakedea ar Gomer doe bhạrti hoṛmoyena ar Hosea lạgitʼ mitʼṭen hopone janamkedea.

⁴ Unre Probhu Isor do Hoseae metadea, “Am do uniyakʼ ńutum Jisreyelem dohoytaea, ente Jisreyel nagrahare Jehu do ḍher hoṛe gocʼletʼkote iń do uniyakʼ bõsrenko cetanre usạrage sạjạiyiń ạguiya ar Israelakʼ rajosṭiń caba utạra.

⁵ Enhilokʼ iń do Jisreyelakʼ buru nalare Israelakʼ akʼ-sariń rạputʼ giḍikatakoa.”

⁶ Gomer do arhõe bhạrti hoṛmoyena ar uniren do armitʼṭen kuṛi hopone janamena. Unre Probhu Isor do Hoseae metadea, “Kuṛi hoponakʼ ńutum do Lo ruhamah. (metakʼme ‘Mãyãwạnicʼ do baṅa’) ente Israelren hoṛko do ar bạń dayawakoa, ar onko do baṅgeń ikạkoa.

⁷ Menkhan Jihudạren hoṛko doń dayawakoa ar onkogeń bańcaokoa. Ona bańcao do akʼ-sar se tarwaṛe se lạṛhại se sadom se aswariko hotete do baṅ hoyokʼa, bickom iń Probhu Isorge onkoń bańcaokoa.”

⁸ Lo-ruhamah do toa ńũńũi bạgiketʼ khan Gomer do arho mitʼṭen hopone janamkedea.

⁹ Unre Probhu Isor doe menkeda, “Nuiyakʼ ńutum do Lo-ammi (metakʼme ‘ińren hoṛ do baṅa’). ente ape do ińren hoṛ dope baṅkana ar iń hõ aperen Isor doń baṅkana.

¹⁰ Enhõ Israel do gaḍa aṛe reakʼ gitil lekako saṅgekʼa, oka do soṅ hõ baṅ soṅ daṛekokʼ se lekha hõ bako lekha daṛekokʼ. Oka jaegare onkoko men ocolen, ‘ape do ińren hoṛpe baṅkana’ onko do onḍegeko men ocokʼa, ‘jiwetʼ Isorren hoponko kanape.’

¹¹ Jihudạ ar Israelren hoṛko do arhõko midokʼa ar ako cetanre mitʼṭen mukhiyạko dohoyea. Ona laha oka disạmre bondi akanko tahẽkan onḍe khon onko doko calaojoṅa, ente Jisreyelakʼ ona din do maraṅge hoyokʼa.