Hagae 1 - সান্তালী বাইবেল

Probhu Isorakʼ oṛakʼ benao lạgitʼ hukum

¹ Darjawes rajakʼ rajokʼ dosar bochorre Sealṭielren hopon Serubabel do Jihudạren disạm cakʼlaoicʼe tahẽkana ar Jehosadokren hopon Josuạ do maraṅ naekeye tahẽkana. Ar inạ bochorge turui cando reakʼ pạhilakʼ dinre Probhu Isor do Hagae nạbi hotete onkoe metatʼkoa,

² “Phạdkoren Probhu Isorgeń menetʼ kana, noko hoṛko meneda, ‘Probhu Isorakʼ oṛakʼ benao reakʼ okte do ńithõ ạuri seṭerokʼa.”

³ Unre nạbi Hagae hotete Probhu Isor do arhõe menkeda,

⁴ “Noa do cetʼ ṭhik hoyokʼkana, ape do noksa akatʼ oṛakʼrepe tahenkana ar ińakʼ oṛakʼ do dhaṅdhaserakʼ hoyakantińạ?

⁵ Iń phạdkoren Probhu Isorgeń meneda, okalekape calakʼkan ona mońjte hudiskate ńelpe.

⁶ Ape do ḍhergepe eretʼkana, menkhan thoṛagepe ireda. Jom dope jometʼgea, menkhan bape bikʼ kana. Darkha rasape ńũiyetʼkangea, menkhan ḍher do bape ńameda. Kicricʼpe horokʼetʼgea, menkhan bape lolokʼ kana. Ar beton ńamkate do bhugạkʼ thạilạkʼrepe dohoyetʼkana.

⁷ Onate ape okalekape calakʼkan ona do mońjte hudiskate ńelpe.

⁸ Ape do ńitokʼ burure decʼkate kaṭ ạguiype ar koejoṅ oṛakʼ benaope, jemoniń kusikʼ ar manotiń ńam.

⁹ “Ape do ḍher phosol ńam lạgitʼpe aslena, menkhan thoṛagepe ńam akada. Ar oṛakʼte tinạkʼpe aderan tahẽkan ona doń oṭaṅ giḍi akatʼtapea. Cedakʼ iń onka akatʼtapea? Ińakʼ oṛakʼ lạgitʼge ona doń onka akada, ente ińakʼ oṛakʼ do dhaṅ dhaser akana, ar ape do apan ạpin oṛakʼ lạgitʼpe odoṛ dhopuṛ baṛaekana.

¹⁰ Ona iạtege serma do acʼakʼ sisir dakʼ ar jumi do phosol emokʼe bondleda.

¹¹ Khet baṛge, buru-ḍuṅgri, phosolko, nãwã darkha rasa, sunum ar otre okako omonokʼ ona cetanre ar manwa, janwar ar apeakʼ tite kạmiyakʼ sanamakʼko cetanre dakʼ alo emokʼ lạgitʼ iń hukumleda.”

¹² Unre Sealṭiel hopon Serubabel, Jehosadek hopon maraṅ naeke Josuạ ar eṭakʼ sanam hoṛko do akoren Probhu Isorakʼ katha leka ar uniye kollede Hagae nạbiyakʼ katha lekako kạmikeda, ente onko do Probhu Isorko botorae kan tahẽkana.

¹³ Unre Probhu Isor do uniren goḍet Hagae hotete hoṛkoe metatʼkoa, “Iń Probhu Isor do ape são sãotege minạńạ.”

¹⁴ Inạ tayom Probhu Isor do Jihudạren disạm cakʼlaoicʼ Serubabelren, maraṅ naeke Josuạ ar sarecʼ sanam hoṛkoakʼ ontorre udgạuketʼtakoa. Onate onko do jotoge hecʼkate phạdkoren Probhu Isorakʼ oṛakʼ benao lạgitʼ kạmiko ehopʼkeda.

¹⁵ Ona kạmi do Darjawese rajokʼ dosar bochor reakʼ turuiyakʼ cando reakʼ bargel ponakʼ dinre ehopʼena.